សម្ដេច ហ៊ុន សែន ព្រមានដាក់ទោសអង្គការផ្ដល់ប្រាក់កម្ចីដែលចង់រឹបអូសផ្ទះពលរដ្ឋ

ជាតិ

នយោបាយជាតិ

សម្ដេច ហ៊ុន សែន ព្រមានដាក់ទោសអង្គការផ្ដល់ប្រាក់កម្ចីដែលចង់រឹបអូសផ្ទះពលរដ្ឋ

14, Mar 2016 , 11:24 am

រូបភាព

ដោយ: រំដួល ចិត្រា (Romdoul Chetra)

សម្ដេច ហ៊ុន សែន បានបញ្ជាក់ថា អង្គការក្រៅរដ្ឋាភិបាល មុននឹងប្រែក្លាយខ្លួនទៅជាមីក្រូហិរញ្ញវត្ថុ ដែលផ្ដល់សេវាប្រាក់កម្ចីជូនពលរដ្ឋនោះ ភាគច្រើនមានចេតនារឹបអូសដីធ្លី និងផ្ទះសម្បែងប្រជាពលរដ្ឋ។ នាយករដ្ឋមន្ត្រីអះអាងថា អង្គការផ្ដល់ប្រាក់កម្ចីទាំងនោះ មានគោលការណ៍ធូរលុងក្នុងការផ្ដល់ប្រាក់កម្ចីជូនប្រជាពលរដ្ឋ ដោយមិនបានពិនិត្យឲ្យបានគ្រប់ជ្រុងជ្រោយ ដែលហាក់ដូចជាមានគម្រោងឲ្យពលរដ្ឋខ្ចីប្រាក់បំណុលវ័ណ្ឌក ដោយគ្មានប្រាក់សងវិញគឺរឹបអូសយកផ្ទះសម្បែងតែម្ដង។

ប្រមុខរដ្ឋាភិបាល ក៏បានស្នើឲ្យក្រសួងសេដ្ឋកិច្ច និងហិរញ្ញវត្ថុ និងធនាគារជាតិ ត្រួតពិនិត្យលើលើបញ្ហាអង្គការក្រៅរដ្ឋាភិបាល និងគ្រឹះស្ថានហិរញ្ញវត្ថុទាំងនោះឡើងវិញ ដោយលោកបានបញ្ជាឲ្យអាជ្ញាធរ ចាត់វិធានការផ្លូវច្បាប់ទៅលើអង្គការ និងបុគ្គលដែលធ្វើខុសច្បាប់មួយចំនួននេះ ដោយមិនគួរលើកលែងទោសឲ្យពួកគេរួចពីសំណាញ់ច្បាប់ឡើយ។

ថ្លែងនៅក្នុងពិធីបើកសន្និសីទជាតិស្តីពី ការអភិវឌ្ឍវិស័យមីក្រូហិរញ្ញវត្ថុនៅកម្ពុជានៅព្រឹកនេះ សម្ដេច ហ៊ុន សែន បានបញ្ជាក់ដូច្នេះថា៖«កន្លងទៅនេះការធ្វើសកម្មភាពឯកឯងរបស់អង្គការមួយចំនួន កាលមុននេះជាអង្គការក្រៅរដ្ឋាភិបាល ប៉ុន្ដែប្រែក្លាយខ្លួនទៅជាមីក្រូហិរញ្ញវត្ថុ ហើយអ្នកទាំងនោះកន្លែងខ្លះហាក់ដូចជាមានចេតនាតែម្ដង។ ឧទាហរណ៍ធម្មតាគោលការណ៍សម្រាប់ការឲ្យខ្ចី យើងតែងតែដឹងថាតើសមត្ថភាពនេះមានសមត្ថភាពសងឬអត់ នេះជាបញ្ហាសំខាន់។ប៉ុន្ដែនេះអត់ទេហាក់ដូចជាមានចេតនាដើម្បីរឹបអូសយកផ្ទះសម្បែងនឹងដីធ្លីតែម្ដង តាមរយៈភាពធូរលុងក្នុងការឲ្យខ្ចី ជួនកាលឲ្យខ្ចីទិញម៉ូតូជិះលេង ដល់ជិះលេងទៅគ្មានលទ្ធភាពសងពីណា ដល់ពេលកំណត់គឺចាប់ផ្ដើមរឹបអូសយកផ្ទះសម្បែងដីធ្លីតែម្ដង»។

បើទោះជាមិននិយាយចំឈ្មោះអង្គការណាក៏ដោយ តែលោកនាយករដ្ឋមន្ត្រី ហ៊ុន សែន បានលើកទិដ្ឋភាពជាក់ស្ដែងក្នុងករណីថ្មីៗនេះ ដែលប្រជាជនជាប់ជំពាក់ប្រាក់ធនាគារជាង៧២ម៉ឺនរៀល ហើយបានយកប្រាក់ទៅសង តែបែរជាធនាគារធ្វើហាក់ដូចជាមិនព្រមទទួល ដោយមានគោលបំណងចង់រឹបអូសផ្ទះពលរដ្ឋតែម្តង រហូតទាល់តែមានការអន្តរាគមន៍ដោយផ្ទាល់ពីភរិយារបស់សម្ដេច ទើបផ្ទះពលរដ្ឋនោះអាចរួចផុតពីការរឹបអូស។ សម្ដេចថា ធនាគារ ឬមីក្រូហិរញ្ញវត្ថុបែបនេះ ក្រសួងសេដ្ឋកិច្ច និងហិរញ្ញវត្ថុ និងធនាគារជាតិត្រូវពិនិត្យឡើងវិញជាបន្ទាន់។

ជាមួយគ្នានេះ ប្រមុខរដ្ឋាភិបាល ក៏ព្រមានទៅកាន់មន្ត្រី និងអាជ្ញាធរនៅតាមមូលដ្ឋានទាំងអស់ កុំចេះតែជូយធនាគារធ្វើបាបប្រជាពលរដ្ឋឡើយ ពោលគឺមិនត្រូវលូកដៃចូលក្នុងការជួយរឹបអូសយកផ្ទះប្រជាពលរដ្ឋដាក់លក់ឡៃឡុងតាមសំណើធនាគារនោះទេ៕