អន្តរជាតិ
នយោបាយអន្តរជាតិ
គំនិតផ្តួចផ្តើមចិន «ខ្សែក្រវ៉ាត់មួយ វិថីមួយ» មិនមែនជាការពង្រីកអំណាច តែបម្រើប្រយោជន៍ពិភពលោក
×
ថ្មីៗនេះ រដ្ឋមន្ត្រីការបរទេសចិន លោក វ៉ាង យី (Wang Yi) បានបញ្ជាក់ថា «គំនិតផ្តួចផ្តើមខ្សែក្រវ៉ាត់មួយ និងវិថីមួយ» មិនគួរត្រូវបានចាត់ទុកថាជាការពង្រីកអំណាចរបស់នោះទេ ក៏ប៉ុន្តែវា គឺជាការបង្កើតឱកាសសម្រាប់ពិភពលោកទៅវិញនោះទេ។ ការអះអាងនេះ ក៏ទទួលបានការយល់ស្របពីសំណាក់អ្នកស្រាវជ្រាវសកលមួយចំនួនផងដែរ។
«គំនិតផ្តួចផ្តើម (ខ្សែក្រវ៉ាត់មួយ វិថីមួយ) គឺជាគំនិតរបស់ចិន ក៏ប៉ុន្តែឱកាស គឺត្រូវបានបង្កើត និងជាកម្មសិទ្ធិរបស់ពិភពលោក»។ នេះគឺជាការលើកឡើងរបស់រដ្ឋមន្ត្រីការបរទេសចិន លោក វ៉ាង យី នៅក្នុង សន្និសីទកាសែតក្រៅកិច្ចប្រជុំកំពូលប្រចាំឆ្នាំនៃសភាចិនទាំងពីរ។
គំនិតផ្តួចផ្តើមខ្សែក្រវ៉ាត់ និងវិថី សំដៅលើវិថីសូត្រ និងខ្សែក្រវ៉ាត់សេដ្ឋកិច្ច ដែលផ្សារភ្ជាប់ចិនជាមួយ អឺរ៉ុប តាមរយៈអាស៊ីកណ្តាល និងអាស៊ីខាងលិច ហើយ វិថីសូត្រសមុទ្រសតវត្សរ៍ទី២១ តភ្ជាប់ចិនជាមួយប្រទេសនៅអាស៊ីអាគ្នេយ៍ អាហ្វ្រិក និងអឺរ៉ុប។ វិថីទាំងពីរ ត្រូវបានផ្តួចផ្តើមឡើងដោយប្រធានាធិបតីចិនលោក ស៊ី ជិនពីង (Xi Jinping ) ក្នុងពេលដែលលោក ធ្វើទស្សនកិច្ចប្រទេសអាស៊ីកណ្តាល និងអាស៊ីអាគ្នេយ៍ក្នុងឆ្នាំ២០១៣។ ហើយផែនការសកម្មភាពត្រូវបានចេញផ្សាយនៅឆ្នាំ២០១៥ និងបច្ចុប្បន្ន គំនិតផ្តួចផ្តើមនេះ កំពុងតែត្រូវបានអនុវត្តហើយ។
បើតាមអះអាងរបស់លោក វ៉ាងក្នុងសន្និសីទកាសែត មកទល់ពេលនេះ មានប្រទេស៧០ និងអង្គការអន្តរជាតិជាច្រើនផ្សេងទៀត បានបង្ហាញពីការចាប់អារម្មណ៍ និងប្រទេស៣០ហើយ បានចុះកិច្ចព្រមព្រៀងជាមួយនឹងចិនដើម្បីកសាង«ខ្សែក្រវ៉ាត់ និងវិថី»នោះ។ លោក ក៏បានបញ្ជាក់ដែរ ខណៈពេលដែលធនាគារវិនិយោគហេដ្ឋារចនាសម្ព័ន្ធអាស៊ីដែលជាគំនិតផ្តួចផ្តើមរបស់ចិនបាននិងកំពុងតែប្រតិបត្តិការគម្រោងជំហានដំបូងដែលផ្គត់ផ្គង់ដោយមូលនិធិសូត្រសមុទ្រ ក៏ត្រូវបានដំណើរការផងដែរ។
ជាក់ស្តែងនោះ លោក វ៉ាង បានលើកពីសមទ្ធិផលមួយចំនួនដែលស្ថិតក្រោមគម្រោងនោះដែលមានដូចជាខ្សែរថភ្លើងលឿនបំផុតដែលតភ្ជាប់ដោយផ្ទាល់ពីចិនទៅអឺរ៉ុបតាមរយៈខ្សែរថភ្លើងដែលកំពុងតែស្ថិតក្រោមការសាងសង់នៅ Budapest Belgrade Jakarta និង Bandung ផងដែរ។ ដោយឡែកសម្រាប់គម្រោងនៅប៉ាស៊ីហ្វិកដែលជាគម្រោងចម្បងតាមរយៈគំនិតផ្តួចផ្តើមនោះដែរ លោក វ៉ា់ង បានពន្យល់ថាគម្រោងបានចាប់ផ្តើមដំណើរការហើយក្នុងនោះមានដូចជាផ្លូវរថភ្លើងចិន-ឡាវ និងផ្លូវរថភ្លើងចិន-ថៃ។
ក្នុងក្រសែភ្នែកអ្នកស្រាវជ្រាវ និងអ្នកតានដានគោលនយោបាយការបទេសនេះ បានចាត់ទុកសមទ្ធិផល គឺជាការបម្រើផលប្រយោជន៍ពិភពលោកមួយដ៏ធំ។ លោក Masood Khalid អគ្គរដ្ឋទូតបាគីស្ថានប្រចាំចិន បានសាទរពីតួនាទីរបស់កិច្ចសហប្រតិបត្តិការចិន-បាគីស្ថាន ដែលលោកថា គំនិតផ្តួចផ្តើមនេះ នឹងផ្តល់អត្ថប្រយោជន៍ទាំងប្រជាជន និងប្រទេសក្នុងតំបន់ទៀតផង។
ជាមួយគ្នានេះផងដែរ លោក Jaeho Hwang អ្នកស្រាវជ្រាវនៃសាកលវិទ្យាល័យសិក្សាបរទេសកូរ៉េខាងត្បូង បានកំណត់សម្គាល់ផងដែរថាសកម្មភាពការទូតរបស់ចិន នឹងបង្ហាញពីតួនាទីរបស់ខ្លួនកាន់តែល្អប្រសើរតាមរយៈគំនិតផ្តួចផ្តើមខ្សែវ៉ាត់ និងវិថីនោះ។ លោក Hwang បានបន្ថែមដែរថាតាមរយៈការកសាងវិថី ចិននឹងគោរពតាមគោលការណ៍នៃការពិគ្រោះយោបល់ ការផ្តល់ និងរលែកផលប្រយោជន៍រួមដែលចាត់ជាគំនិតផ្តួចផ្តើមដែលមានការបើកចំហរ ជាជាងការពង្រីកឥទ្ធិពល៕
© រក្សាសិទ្ធិដោយ thmeythmey.com