អន្តរជាតិ
នយោបាយអន្តរជាតិ
កូរ៉េខាងជើង ថាកូរ៉េខាងត្បូង ព្យាយាមបង្កើតរឿងបង្ខូចកេរ្តិ៍ឈ្មោះខ្លួន និងបញ្ឆោតភ្នែក
×
កូរ៉េខាងជើង បានច្រានចោលការចោទប្រកាន់របស់កូរ៉េខាងត្បូងដែលថាក្រុងព្យុងយ៉ាង បានវាយប្រហារប្រព័ន្ធ Smartphones របស់មន្ត្រីជាន់ខ្ពស់នៃរដ្ឋាភិបាលក្រុងសេអ៊ូលកន្លងទៅ។ កូរ៉េខាងជើង បានចាត់ទុកការចោទប្រកាន់នោះជារឿងឥតបានការ។
កាសែតរដ្ឋកូរ៉េខាងជើង Rodong Sinmun បានចុះផ្សាយនូវអត្ថបទមួយនៅថ្ងៃទី១៣ ខែមីនា ម្សិលមិញ ដោយបានប្រើពាក្យខ្លាំងៗដើម្បីឆ្លើយតបទៅនឹងការចោទប្រកាន់របស់កូរ៉េខាងត្បូងដែលបានចោទ កូរ៉េខាងជើងថាលួចស្តាប់ការសន្ទនានិងសារក្នុងប្រព័ន្ធទូរសព្ទ Smartphones របស់មន្ត្រីកូរ៉េខាងត្បូង។ កាសែតនោះ បានហៅការចោទថា ជារឿងដែលគួរឲ្យខ្មាស និងឥតប្រយោជន៍ពីសត្រូវដែលតែង តែរំខាន និងបង្ខូចកេរ្តិ៍ឈ្មោះនយោបាយកូរ៉េខាងជើង។
កាសែតដដែល ក៏បានបន្ថែមដែលថា ក្រុងសេអ៊ូល បាននិងកំពុងព្យាយាមប្រើប្រាស់ «ការគំរាមបែបបោកបញ្ឆោត» ដើម្បីទាក់ទាញការគាំទ្រសម្រាប់សេចក្តីព្រាងច្បាប់ប្រឆាំងនឹងបទល្មើសតាមអ៊ិនធ័រនែត ដែលផ្តល់អំណាចកាន់តែខ្លាំងទៅលើភ្នាក់ងារចារកម្មជាតិកូរ៉េខាងត្បូងលើប្រព័ន្ធគ្រប់គ្រងអ៊ិនធ័រនែត។ នេះ កូរ៉េខាងជើង ទំនងជាសំដៅលើភាពចម្រូងចម្រាសនៅក្នុងសភាកូរ៉េខាងត្បូងលើ សេចក្តីព្រាងច្បាប់ប្រឆាំងបទល្មើសតាមអ៊ីនធ័រនែតដែលកំពុងតែរាំងស្ទះដោយសារមានការជំទាស់ពីក្រុមបក្សប្រឆាំង ហើយធ្វើដូច្នេះ ទើបអាចជួយពន្លឿនសេចក្តីព្រាងច្បាប់នោះបាន។
សូមរម្លឹកផងដែរថា កាលពីសបា្តហ៍មុន ភ្នាក់ងារចារកម្មរបស់កូរ៉េខាងត្បូង បានចេញរបាយការណ៍មួយ ដោយចោទកូរ៉េខាងជើងថា បានវាយប្រហារប្រព័ន្ធទូរសព្ទ Smartphone របស់ប្រជាជនកូរ៉េខាងត្បូង ដែលរួមបញ្ចូលទាំងការផ្ញើរសារ និងសន្ទនារបស់មន្ត្រីរដ្ឋាភិបាលសំខាន់១០រូបក្នុង ចន្លោះខែកុម្ភៈ និងដើមខែ មីនាថ្មីៗនេះ។
ក្នុងពេលនោះដែរ ភ្នាក់ងារចារកម្មជាតិកូរ៉េខាងត្បូង បានប្រកាសកិច្ចប្រជុំជាបន្ទាន់មួយដើម្បីត្រួតពិនិត្យលើកប្រព័ន្ធគ្រប់គ្រងរបស់ភ្នាក់ងាររដ្ឋាភិបាលដើម្បីប្រឆាំងនឹងការវាយប្រហារតាមប្រព័ន្ធអ៊ិនធឺរនែតដែលមានការចូលរួមពីក្រសួងចំនួន១៤ ដែលរាប់បញ្ចូលទាំងមន្ត្រីសម្របសម្រួលគោលនយោបាយ អ្នកគ្រប់គ្រងផ្នែកហិរញ្ញវត្ថុ និងក្រសួងការពារជាតិ និងវិទ្យាសាស្ត្រផងដែរ៕
© រក្សាសិទ្ធិដោយ thmeythmey.com