ពិធីបុណ្យទន្លេលើកទី២ ឆ្នាំ២០១៦ ក្រោមប្រធានបទ«ទន្លេស្អាត សហគមន៍ល្អ» នៅខេត្តកំពង់ចាម រយៈពេល៣ថ្ងៃ ចាប់ពីថ្ងៃទី១១ ដល់ថ្ងៃទី១៣ ខែមីនា ឆ្នាំ២០១៦ បានប្រព្រឹត្តទៅក្រោមការពង្រឹងសន្តិសុខយ៉ាងតឹងរឹងរបស់គណៈអភិបាលខេត្តកំពង់ចាម។ ពិធីដែលដាក់ឲ្យមានការប្រកួត និងសម្តែងកីឡា១១ប្រភេទ បានបញ្ចប់ទៅដោយជោគជ័យ កាលពីថ្ងៃអាទិត្យទី១៣ ខែមីនា ម្សិលមិញ ខណៈកីឡា៥ប្រភេទទទួលបានការគាំទ្រច្រើនជាងគេ។
សន្តិសុខត្រូវបានរឹតបន្តឹងនៅក្នុងទីរួមខេត្តកំពង់ចាម ដោយមានសន្តិសុខ កងកម្លាំងនគរបាលប្រដាប់អាវុធ យាមកាមយ៉ាងតឹងរឹង នៅតាមបណ្តោយមាត់ទន្លេ តាមបណ្តាផ្លូវមួយចំនួន និងតាមស្តង់លក់ទំនិញ ជាពិសេសត្រង់ចំណុចរង្វង់មូលគល់ស្ពានគីហ្សូណា (KIZONA) រយៈពេល៣ថ្ងៃ នាពិធីបុណ្យទន្លេលើកទី២ ឆ្នាំ២០១៦។ ពិធីបុណ្យទន្លេ ក្រោមប្រធានបទ ទន្លេស្អាត សហគមន៍ល្អ នាខេត្តកំពង់ចាម និងខេត្តត្បូងឃ្មុំ បានបញ្ចប់ទៅដោយជោគជ័យកាលពីថ្ងៃទី១៣ ខែមីនា ឆ្នាំ២០១៦ ម្សិលមិញនេះ។
លោក លន់ លឹមថៃ អភិបាលខេត្តកំពង់ចាម បានថ្លែងថា ពិធីបុណ្យទន្លេនេះ បានប្រព្រឹត្តទៅដោយមានការការពារយ៉ាងម៉ឺងម៉ាត់ សម្រាប់រក្សាសន្តិសុខជូនប្រជាពលរដ្ឋដែលមកចូលរួមទស្សនា។ លោក បញ្ជាក់បែបនេះថា៖«យើងបានដាក់កម្លាំងរបស់យើងជាង៣ពាន់នាក់ ហើយក្នុងចំនួនជាង៣ពាន់នាក់នេះ ក៏មានខាងនគរបាលជាតិចំនួន២រយនាក់ មានខាងកងរាជអាវុធហត្ថថ្នាក់ជាតិមកជួយអន្តរាគមន៍ចំនួន១រយនាក់ផងដែរ»។
ពិធីបុណ្យទន្លេនេះ ក៏មានកីឡា១១ប្រភេទបានចូលរួម និងសម្តែងដើម្បីអបអរកម្មវិធីបុណ្យនេះផងដែរ រូមមាន ការរត់ប្រណាំងលក្ខណៈកម្សាន្ត កីឡាប្រដាល់ក្បាច់គុនខ្មែរ កីឡាចំបាប់បូរាណ កីឡាបាល់ទះ កីឡាហែលទឹក កីឡាអុកចត្រង្គ កីឡាទូកក្តោង កីឡាសម្តែងលើទឹក(Fly Boat) ការប្រណាំងទូកប្រពៃណី កីឡាឆត្រយោង និងកីឡាសីស្លាប-សីដក់ ហើយប្រភេទកីឡាចំនួន៥ ក្នុងចំណោម១១ប្រភេទនេះ បានទទួលការគាំទ្រខ្លាំងជាងគេ។
លោក វ៉ាត់ ចំរើន ដែលជាប្រធានអនុគណៈកម្មការបុណ្យទន្លេ និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានវាយតម្លៃបែបនេះថា៖«តាមការតាមដាន និងវាយតម្លៃរបស់ខ្ញុំ កីឡាដែលទទួលបានការគាំទ្រច្រើនជាងគេមានចំនួន៥ គឺ ការរត់ប្រណាំងកម្សាន្ត ការប្រដាល់ក្បាច់បុរាណខ្មែរ កីឡាបាល់ទះ កីឡាចំបាប់បុរាណ និងកីឡាសម្តែងលើទឹក»។
ជាមួយគ្នានេះដែរ លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា សង្កេតឃើញថា ពិធីបុណ្យទន្លេនៅខេត្តកំពុងចាមរយៈពេល ៣ ថ្ងៃមកនេះ មានអ្នកចូលរួមទស្សនាច្រើនជាងបុណ្យទន្លេ ដែលរៀបចំធ្វើនៅខេត្តក្រចេះកាលពីឆ្នាំមុន។ «សកម្មភាពនេះ អាចបញ្ជាក់បានថា ប្រជាពលរដ្ឋដែលរស់នៅខេត្តកំពង់ចាម និងខេត្តត្បូងឃ្មុំ មានការយល់ដឹង និងស្គាល់ច្រើនពីក្បាច់ចំបាប់បូរាណខ្មែរ ព្រោះពួគគាត់មិនត្រឹមតែមកចូលរួមទស្សនាប៉ុណ្ណោះទេ ថែមទាំងចូលរួមសម្តែងជាមួយយើងទៀតផង»។ នេះជាការបញ្ជាក់របស់លោក ធិន វិចិត្រ។
ចំពោះបញ្ហាអនាម័យវិញ លោក លន់ លឹមថៃ បានបញ្ជាក់ទៀតថា ដើម្បីរក្សាអនាម័យជូនប្រជាពលរដ្ឋដែលបានមកចូលរួមទស្សនាដើរកម្សាន្ត និងដើម្បីឲ្យស្របតាមប្រធានបទ«ទន្លេស្អាត សហគមន៍ល្អ» របស់ពិធីបុណ្យទន្លេលើកទី២នេះ ថ្នាក់ដឹកនាំខេត្តកំពង់ចាម បានដាក់ពង្រាយបន្ទប់អនាម័យចំនួន១៤កន្លែង និងធុងសំរាមជាច្រើននៅតាមបណ្តាស្តង់លក់ទំនិញ និងតាមដងផ្លូវសាធារណៈផ្សេងៗជាច្រើន ជាពិសេសមានការចូលរួមយុទ្ធនាការដើររើសសំរាមរបស់ សិស្ស និស្សិត ស្ម័គ្រចិត្តរបស់សាលាជាតិកសិកម្មខេត្តកំពង់ចាម។ កត្តាទាំងនេះបានធ្វើឲ្យកម្មវិធីបុណ្យទន្លេលើកទី២ មានរយៈពេល៣ថ្ងៃ និងមានអ្នកចូលរួមចន្លោះពី៤០ម៉ឺនទៅ៥០ម៉ឺននាក់មួយនេះមានភាពស្រស់ស្អាត និងមានបរិយាកាសល្អ។
គួរបញ្ជាក់ថា ការប្រកួតប្រណាំងទូកប្រពៃណីចំណុះ២២នាក់ដែលបានបញ្ចប់កាលពីថ្ងៃទី១៣ ខែមីនា ចំណាត់ថ្នាក់លេខ១បានទៅលើ ពិជ័យកុមារតេជោសែនជ័យ របស់ខេត្តកណ្តាល ខណៈលេខ២បានទៅ នាគរាជកោះសូទិន មកពីកោះសូទិន និងលេខ៣បានទៅ ហនុមានពេញតារារះ មកពីព្រៃឈរ៕