អន្តរជាតិ
នយោបាយអន្តរជាតិ
×![]()
ប្រធានាធិបតីចិនលោក ស៊ី ជិនពីង បានសង្កត់ធ្ងន់ពីសារសំខាន់នៃការកែប្រែថ្មីទាំងផ្នែកទ្រឹស្ដីនិងបច្ចេកវិទ្យា និងបានចាត់ទុកនេះជាចំណុចគន្លិះសម្រាប់ការអភិវឌ្ឍយោធានិងកងទ័ពនៅទូទាំងប្រទេស។ លោក ស៊ី ថ្លែងដូចនេះក្នុងជំនួបជាមួយសមាជិកសភាមកពីយោធារបស់កងទ័ពរំដោះប្រជាជនចិន ដែលចូលរួមក្នុងកិច្ចប្រជុំសភាតំណាងប្រជាជនចិននៅថ្ងៃទី១៣ ខែមីនា។ លោក ស៊ី ក៏បានជំរុញឲ្យកងទ័ពត្រូវតែអភិវឌ្ឍខ្លួនឯងនៅគ្រប់បរិបទទាំងអស់។
ថ្លែងទៅកាន់សមាជិកសភាយោធានៃកងទ័ពរំដោះប្រជាជនចិន លោក ស៊ី ជិនពីង បានលើកឡើងពីអនាគតរបស់កងទ័ពរំដោះប្រជាជនចិន ដែលពឹងផ្អែកលើការកែប្រែថ្មីនិងការកែទម្រង់។ ប្រធានាធិបតី ស៊ី ជិនពីង ថែមទាំងទទូចឲ្យកងទ័ពអនុវត្តយុទ្ធសាស្ត្រអភិវឌ្ឍន៍ប្រកបដោយការច្នៃប្រឌិត និងកំណត់សមត្ថភាពប្រយុទ្ធនៅគ្រប់ការងារទាំងអស់ ព្រមទាំងបង្កើនគំនិតកែប្រែថ្មីនៅគ្រប់ផ្នែក។
លោក ស៊ី ជិនពីង ដែលជាប្រធានគណៈកម្មាការយោធារបស់បក្សកុម្មុយនីស្តផងនោះ ក៏បានបញ្ជាក់ពីចំណុចមួយចំនួនទៀតដែលត្រូវកែលម្អ ដូចជារដ្ឋបាលយោធា និងសមត្ថភាពរបស់កងទ័ព។ លោក ក៏បានស្នើឲ្យកងទ័ពរំដោះប្រជាជនចិនផ្ដោតទៅការងារអាទិភាពទាំងនេះ ដើម្បីចាប់ផ្ដើមការអភិវឌ្ឍនៅគ្រប់ផ្នែក និងធ្វើឲ្យកងទ័ពប្រទេសចិនកាន់តែខ្លាំងឡើង។
ប្រធានគណៈកម្មការយោធារូបនេះក៏បានលើកឡើងដែរថា គំនិតច្នៃប្រឌិតថ្មីគឺជាចំណុចស្នូលនៃការប្រកួតប្រជែងរបស់កងទ័ព ហើយវានឹងជួយបង្កើនសមត្ថភាពប្រយុទ្ធទៀតផង។ ត្រង់ចំណុចនេះ លោក ស៊ី ជិនពីង បានទទូចដល់មន្ត្រីទាំងអស់ឲ្យគាំទ្រដល់គំនិតថ្មីៗ ដែលនឹងជួយជំរុញគុណភាព ប្រសិទ្ធភាព និងស្ថិរភាពរបស់វិស័យការពារជាតិនិងការអភិវឌ្ឍយោធា។
បន្ថែមពីការលើកឡើងពីសារៈសំខាន់នៃការអភិវឌ្ឍយោធា លោក ស៊ី ជិនពីង បានប្រាប់មន្ត្រី យោធាដែលចូលរួមប្រជុំក្នុងសភាតំណាងប្រជាជនចិន ពីផែនការប្រាំឆ្នាំលើកទី១៣ (២០១៦-២០២០)។ លោកថា ផែនការនេះដើរតួនាទីយ៉ាងសំខាន់ក្នុងវិស័យការពារជាតិ និងការអភិវឌ្ឍលើវិស័យយោធា។ ក្រៅពីនេះ លោកបានទទូចឲ្យកងទ័ព ត្រូវការពារសុច្ចរិតភាពនយោបាយ ការកែទម្រង់និងនីតិរដ្ឋ ព្រមទាំងបន្តពង្រឹងសមត្ថភាពប្រយុទ្ធផងដែរ។
ការលើកឡើងរបស់លោក ស៊ី ជិនពីង ធ្វើឡើងក្រោយពេលដែលលោកបានប្រកាសធ្វើការផ្លាស់ប្ដូរដ៏ធំមួយក្នុងវិស័យការពារជាតិរបស់ប្រទេសមហាអំណាចមួយនេះ។ អង្គភាពកងទ័ពសំខាន់ៗ ដែលរួមមានទីបញ្ជាការរួមកងទ័ព កងកម្លាំងរ៉ុក្កែត និងកងកម្លាំងគាំទ្រ ត្រូវបានបង្កើតនៅក្រោមកងទ័ពរំដោះប្រជាជនចិន។ កងទ័ពចិន ក៏បានបន្ថយភូមិភាគយោធាមកត្រឹមប្រាំ ខណៈពីមុនមានដល់ប្រាំពីរភូមិភាគ។ ជាមួយគ្នានេះ កាលពីដើមខែកន្លងទៅ ចិនបានប្រកាសពីកំណើនទាបបំផុតលើថវិកាប្រចាំឆ្នាំរបស់វិស័យការពារជាតិក្នុងរយៈពេល៦ឆ្នាំមកនេះ។ រដ្ឋាភិបាលចិនគ្រោងនឹងបង្កើនការចំណាយនៅត្រឹម៧.៦ភាគរយ គឺទាបជាងឆ្នាំមុនដែលមាន១០.១ភាគរយ៕
Tag:
ចិន
ស៊ីជិនពីង
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
