ប្រធានក្រុមប្រឹក្សាធម្មនុញ្ញលោក ឯក សំអុល ចប់អាណត្តិ សភារើសសមាជិកថ្មីជំនួស

ជាតិ

នយោបាយជាតិ

ប្រធានក្រុមប្រឹក្សាធម្មនុញ្ញលោក ឯក សំអុល ចប់អាណត្តិ សភារើសសមាជិកថ្មីជំនួស

14, Mar 2016 , 6:59 pm

រូបភាព

ដោយ: ម៉ៅ សុផា

រដ្ឋសភា ប្រកាសជ្រើសរើសឥស្សរជនមួយរូប ដើម្បីឈរឈ្មោះជាបេក្ខជនសមាជិកក្រុមប្រឹក្សាធម្មនុញ្ញ ជំនួសលោក ឯក សំអុល ដែលជាប្រធាននៃស្ថាប័នកំពូលមួយនេះ។ នេះបើតាមសេក្តីជូនដំណឹងរបស់រដ្ឋសភា ដែលបានចុះផ្សាយនៅថ្ងៃទី១៤ ខែមីនា ឆ្នាំ២០១៦ ។

លោក ឯក សំអុល នឹងត្រូវលាលែងពីតំណែងប្រធានក្រុមប្រឹក្សាធម្មនុញ្ញ ក្រោយពីលោកបញ្ចប់អាណត្តិក្នុងឆ្នាំ២០១៦នេះ។ លោក ឯក សំអុល ដែលរដ្ឋសភាជាអ្នកជ្រើសរើស បានកាន់តំណែងជាប្រធានក្រុមប្រឹក្សាធម្មនុញ្ញ តាំងពីឆ្នាំ២០០៧ មកម្ល៉េះ។

អ្នកនាំពាក្យរដ្ឋសភា លោក ឡេង ប៉េងឡុង បានមានប្រសាសន៍ថា ឥស្សរជនថ្មីមួយរូប នឹងកាន់តំណែងជាសមាជិកក្រុមប្រឹក្សាធម្មនុញ្ញជំនួសលោក ឯក សំអុល ក្រោយពីរដ្ឋសភាជ្រើសរើសរួចរាល់។ លោក ឡេង ប៉េងឡុង បញ្ជាក់ថា ឥស្សរជនថ្មីនេះ នឹងក្លាយជាសមាជិកធម្មតាប៉ុណ្ណោះ ព្រោះតំណែងជាប្រធានក្រុមប្រឹក្សាធម្មនុញ្ញ គឺអាស្រ័យលើកសមាជិកទាំង៩រូប ជាអ្នកបោះឆ្នោតជ្រើសរើស។

លោកបន្ថែមថា ព្រះមហាក្សត្រ នឹងតែងតាំងសមាជិកថ្មី១រូប ចំណែកឯឧត្តមក្រុមប្រឹក្សានៃអង្គចៅក្រម ក៏នឹងជ្រើសតាំងសមាជិកថ្មី១រូបដែរ ព្រោះសមាជិកនៃក្រុមប្រឹក្សាធម្មនុញ្ញចំនួន៣រូប តែងតែត្រូវបានផ្លាស់ប្តូរ ជារៀងរាល់៣ឆ្នាំម្តង។

យោងតាមរដ្ឋធម្មនុញ្ញ ប្រធានក្រុមប្រឹក្សាធម្មនុញ្ញមានឋានៈនិងបុព្វសិទ្ធិ ស្មើនឹងប្រធានរដ្ឋសភា។ ចំណែកឯសមាជិកមានឋានៈនិងបុព្វសិទ្ធិស្មើនឹងអនុប្រធានរដ្ឋសភា។ សមាជិកទាំងអស់ត្រូវបានតែងតាំង ឬជ្រើសតាំងពីចំណោមឥស្សរជន ដែលមានសញ្ជាតិខ្មែរពីកំណើត មានអាយុយ៉ាងតិច ៤៥ឆ្នាំ មានបទពិសោធការងារយ៉ាងតិច ១៥ឆ្នាំ និងមានសញ្ញាប័ត្រឧត្ដមសិក្សាឡើងទៅ ក្នុងវិស័យច្បាប់ រដ្ឋបាល ការទូត និង សេដ្ឋកិច្ច។

សូមបញ្ជាក់ថា សមាសភាពនៃក្រុមប្រឹក្សាធម្មនុញ្ញមានប្រធាន ១រូប និងសមាជិកចំនួន ៨រូប។ ក្នុងចំណោមសមាជិកទាំង៩រូបនោះ ៣រូបជ្រើសតាំងដោយរដ្ឋសភា និង៣រូបជ្រើសតាំងដោយឧត្តមក្រុមប្រឹក្សានៃអង្គចៅក្រម រីឯ៣រូបទៀតតែងតាំងដោយព្រះមហាក្សត្រ៕