រឿងអាស្រូវពុករលួយ៖ ប្រធានាធិបតីប្រេស៊ីលប្រកាសថាមិនចេញពីតំណែង

អន្តរជាតិ

នយោបាយអន្តរជាតិ

រឿងអាស្រូវពុករលួយ៖ ប្រធានាធិបតីប្រេស៊ីលប្រកាសថាមិនចេញពីតំណែង

14, Mar 2016 , 7:39 pm

រូបភាព

ដោយ: សៅ ផលនិស្ស័យ (Sao Phal Niseiy)

ប្រធានាធិបតីប្រេស៊ីល លោកស្រី Dilma Rousseff នឹងមិនចេញពីតំណែងឡើយ ទោះជាមានចលនាបាតុកម្មកើតឡើងទាមទារឲ្យលោកស្រីចុះចេញពីតំណែងព្រោះរឿងពុករលួយក៏ដោយ។ លោកស្រីថា គ្មានហេតុផលអ្វីដែលលោកស្រីត្រូវលាលែង ហើយអ្នកប្រឆាំងលោកស្រីក៏គ្មានអ្វីជាមូលដ្ឋានបង្ខំឲ្យលោកស្រីចាកចេញដែរ។

ចលនាបាតុកម្មនៅតាមទីក្រុងធំៗដូចជា Brasilia និង Rio de Janeiro ត្រូវបានរៀបចំឡើងថ្ងៃអាទិត្យម្សិលមិញ ដើម្បីទាមទារឲ្យប្រមុខរដ្ឋប្រេស៊ីល លោកស្រី Dilma Rousseff ចុះចេញពីតំណែង។ ប៉ុន្តែ លោកស្រី Dilma Rousseff បានប្រកាសជាមុនហើយថា «កុំសង្ឃឹមលោកស្រីចុះចេញពីតំណែងឲ្យសោះ»។

តាមពិតទៅបាតុករទាមទារឲ្យលោកស្រីលាលែងពីតំណែង ព្រោះពួកគេចង់ឲ្យប្រធានាធិបតីបច្ចុប្បន្នលាលែងពីតំណែងដើម្បីបោះឆ្នោតជាថ្មី ព្រោះលោកស្រីប្រព្រឹត្តអំពើពុករលួយ។ តែក្រៅពីការប្រមូលផ្តុំគ្នារបស់បាតុករប្រឆាំងរដ្ឋាភិបាល គេឃើញមានបាតុករគាំទ្ររដ្ឋាភិបាលច្រើនល្មមដែរនាំគ្នាប្រមូលផ្តុំគ្នាទាមទារឲ្យក្រុមប្រឆាំងបញ្ឈប់ការតវ៉ា់នេះទៀត។

យោងតាមសារព័ត៌មាន Al Jazeera បាតុករម្នាក់ជាវិស្វករឈ្មោះ Alexandre Cortesដែលបានចូលរួមក្នុងចលនាបាតុកម្មនេះបានអះអាងថា៖« ខ្ញុំគាំទ្រការដកហូតតំណែងរបស់លោកស្រី និងមានការបោះឆ្នោតថ្មី ព្រោះតែការបោះឆ្នោតឆ្នាំ ២០១៤កន្លងទៅលោកស្រីប្រើប្រាស់លុយកខ្វក់ ពុករលួយ»។

លោកស្រី Dilma Rousseff បានទទួលជ័យជម្នះលើកទីពីរក្នុងការបោះឆ្នោតឆ្នាំ ២០១៤ ប៉ុន្តែលោកស្រីបានទទួលសំឡេងច្រើនជាងគូប្រជែងលោកស្រីបន្តិចបន្តួចប៉ុណ្ណោះ។ ហើយមកដល់ពេលបច្ចុប្បន្ន ប្រជាប្រិយភាពរបស់លោកស្រីក៏ធ្លាក់ចុះទាបបំផុតទៀត។

ពាក់ព័ន្ធរឿងអាស្រូវពុករលួយនេះ កាលពីខែតុលាឆ្នាំមុនតុលាការកំពូលប្រេស៊ីលបានប្រកាសថា ការប្រើប្រាស់លុយកម្ចីពីធនាគាររដ្ឋ របស់រដ្ឋាភិបាលលោកស្រី Dilma Rouseff កាលពីឆ្នាំ ២០១៤ ពិតជារំលោភច្បាប់។ ហើយក្រោយមកក៏មានការស៊ើបអង្កេតពាក់ព័ន្ធយុទ្ធនាការឃោសនានយោបាយក្នុងឆ្នាំ ២០១៤ របស់លោកស្រីផងដែរ។

ក្រៅពីរឿងពុករលួយ លោកស្រីក៏ត្រូវប្រជាជនប្រេស៊ីលរិះគន់ខ្លាំងដែរ ព្រោះតែរដ្ឋាភិបាលលោកស្រីអសមត្ថភាព ដោះស្រាយបញ្ហាសេដ្ឋកិច្ចដ៏ធ្ងន់ធ្ងរ។ សេដ្ឋកិច្ចប្រេស៊ីលធ្លាក់ចុះខ្លាំងមិនធ្លាប់មានក្នុងរយៈពេល ២៥ឆ្នាំមកនេះ ហើយការធ្លាក់ចុះនៃតម្លៃប្រេងឆៅនៅក្នុងទីផ្សារអន្តរជាតិក៏ជាហេតុផលមួយដែលធ្វើឲ្យសេដ្ឋកិច្ចប្រទេសមហាអំណាចអាមេរិកខាងត្បូងនេះប្រឈមវិបត្តិដែរ៕