អន្តរជាតិ
នយោបាយអន្តរជាតិ
×![]()
យោធាមីយ៉ាន់ម៉ាបានសម្រេចដោះលែងទាហានកុមារចំនួន ៤៦នាក់បន្ថែមទៀតនៅថ្ងៃអាទិត្យទី ១៣ខែមីនាម្សិលមិញនេះ។ ការសម្រេចដោះលែងទាហានកុមារនេះ ជាការខិតខំប្រឹងប្រែងរបស់មីយ៉ាន់ម៉ាដើម្បីបញ្ចប់ការជ្រើសរើសនិងប្រើប្រាស់កុមារក្នុងជួរកងទ័ព ស្របតាមកិច្ចព្រមព្រៀងដែលប្រទេសបង្កើតជាមួយអង្គការសហប្រជាជាតិឆ្នាំ ២០១២ ។
ខណៈដែលមានការរិះគន់ថា យោធាមីយ៉ាន់ម៉ា យឺតយ៉ាវក្នុងការដោះស្រាយរឿងប្រើប្រាស់កុមារក្នុងជួរកងទ័ព ថ្ងៃទី ១៣ មីនា ម្សិលមិញនេះ ស្ថាប័នយោធាប្រទេសនេះបានសម្រេចដោះលែងទាហានកុមារចំនួន ៤៦នាក់បន្ថែមទៀត។
បើតាមទីភ្នាក់ងារព័ត៌មាន AFP កុមារទាំង៤៦នាក់នោះត្រូវបានយោធាមីយ៉ាន់ម៉ា «Tatmadaw» ដោះលែងនិងបញ្ជូនឲ្យទៅជួបជុំជាមួយក្រុមគ្រួសារពួកគេអស់ហើយ។
ការសម្រេចដោះលែងទាហានក្មេងៗក្រោមអាយុនេះ ត្រូវបានធ្វើឡើងតាំងពីឆ្នាំ ២០១២ មកម្ល៉េះនៅពេលដែលរដ្ឋាភិបាលពាក់កណ្តាលយោធាមីយ៉ាន់ម៉ាសម្រេចចុះកិច្ចព្រមព្រៀងជាមួយអង្គការសហប្រជាជាតិ។ ប៉ុន្តែការអនុវត្តរបស់យោធាមីយ៉ាន់ម៉ាហាក់មានការយឺតយ៉ាវខ្លាំង។
ក្នុងពិធីដោះលែងទាហានកុមារ ឧត្តមសេនីយ៍ Tauk Tun បានលើកឡើងថា៖« យោធាមីយ៉ាន់ម៉ាបានដោះលែងទាហានមិនទាន់គ្រប់អាយុ ៧៤៤នាក់ ដែលការដោះលែងមានចំនួន ១២ដងរាប់ទាំងពេលនេះផង»។
យ៉ាងណាមិញ គ្មានរបាយការណ៍ជាក់លាក់ ដែលបង្ហាញពីចំនួនកុមារទាំងអស់ដែលកំពុងស្ថិតក្នុងកាតព្វកិច្ចយោធាឡើយ។ ការរំលោភសិទ្ធិមនុស្សដោយបង្ខំឲ្យកុមារចូលបម្រើក្នុងវិស័យកងទ័ពនេះ កា្លយជាបញ្ហាប្រឈមធំបំផុតនៅមីយ៉ាន់ម៉ាតាំងពីយូរមកហើយ។ ខាងស្ថាប័នសិទ្ធិមនុស្សអង្គការសហប្រជាជាតិបានបង្ហើបថាយ៉ាងហោចណាស់ក្រុមឧទ្ទាម ៧ក្រុមបានជ្រើសរើសកុមារមិនគ្រប់អាយុឲ្យកាន់កាំភ្លើងប្រយុទ្ធ។
ការបន្តដោះលែងទាហានកុមារនេះ កើតឡើងស្របពេលដែលមីយ៉ាន់ម៉ាស្ថិតក្នុងដំណាក់កាលប្រជាធិបតេយ្យូបនីយកម្ម ឆ្ពោះទៅរកប្រជាធិបតេយ្យពេញលេញ។ ការបោះឆ្នោតជាប្រវត្តិសាស្ត្រខែវិច្ឆិកាឆ្នាំ មុន ដែលបក្សលោកស្រី អ៊ុងសាន ស៊ូជី ឈ្នះឆ្នោតភ្លូក ទឹកភ្លូកដី បង្ហាញពីសញ្ញាវិជ្ជាមានសម្រាប់ប្រទេសស្ថិតក្រោមរបបសឹកអស់រាប់ទសវត្សរ៍មកនោះ។ ប៉ុន្តែស្ថាប័នយោធានៅតែមានឥទ្ធិពលខ្លាំងក្នុងនយោបាយប្រទេសនេះ ព្រោះក្រុមឧត្តមសេនីយ៍នៅបន្តកាន់កាប់ក្រសួងសំខាន់បីមានក្រសួងការពារជាតិ ក្រសួងកិច្ចការព្រំដែន និងក្រសួងកិច្ចការផ្ទៃក្នុង។ គេមិនរំពឹងថា ឥទ្ធិពលពួកគេនឹងសាបរលាបឆាប់ៗឡើយ៕
Tag:
មីយ៉ាន់ម៉ា
ទាហានកុមារ
សិទ្ធិមនុស្ស
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
