កិច្ចចរចាសន្តិភាពស៊ីរីចាប់ផ្តើមនៅថ្ងៃចន្ទនេះនៅហ្សឺណែវ ខណៈដែលបញ្ហាចម្រូងចម្រាសរឿងបង្កើតរដ្ឋសហព័ន្ធ និងតួនាទីរបស់ប្រធានាធិបតីស៊ីរី កា្លយជាប្រធានបទចម្រូងចម្រាសបំផុត។ រដ្ឋាភិបាលស៊ីរីថាកិច្ចចរចានឹងបរាជ័យ បើជជែករឿងបោះឆ្នោតនិងបង្កើតរដ្ឋសហព័ន្ធ។ ប៉ុន្តែលោកខាងលិចដែលគាំទ្រក្រុមប្រឆាំងបានព្រមានរដ្ឋាភិបាលក្រុងដាម៉ាសថាកុំព្យាយាមយកលេសរារាំងដំណើរការចរចាសន្តិភាពនេះ។
លោក សៅ ផលនិស្ស័យ លម្អិតព័ត៌មាន
ខណៈដែលបទឈប់បាញ់ត្រូវបានភាគីអនុវត្ត តំណាងក្រុមអន្តរជាតិគាំទ្រស៊ីរី កំពុងប្រមូលផ្តុំគ្នានៅទីក្រុងហ្សឺណែវដើម្បីចាប់ផ្តើមដំណើរការចរចាសន្តិភាពស៊ីរីឡើងវិញនៅថ្ងៃចន្ទទី ១៤ ខែមីនានេះ។
ប្រធានបទ «អាសាដ ត្រូវនៅបន្តតំណែងទៀតឬអត់» នោះស្រាប់តែក្លាយជារឿងចម្រូងចម្រាសនិងក្តៅខ្លាំងជាថ្មីសម្រាប់ការចរចាលើកនេះ ហើយការកំណត់យកការបែងចែករដ្ឋបាលតាមរដ្ឋសហព័ន្ធនោះក៏ត្រូវបានគេកំណត់យកមកជជែកដូចគ្នា។
១.ការចរចារចាប់ផ្តើមទាំងភាគីខ្វែងគំនិតមើលមុខគ្នាមិនចំ
រដ្ឋមន្ត្រីការបរទេសស៊ីរី លោក Walid al-Moallem បានចេញមុខថ្លែងថា រដ្ឋាភិបាលស៊ីរីនឹងមិនពិភាក្សា ជាមួយអ្នកដែលចង់យកបញ្ហាប្រធានាធិបតី និងការបោះឆ្នោតស៊ីរីមកលើតុចរចាឡើយ។ ហើយលោកក៏សង្កត់ធ្ងន់ដែរថា បើសិនជាភាគីម្ខាងទៀតបន្តចរចេសទាមទារឲ្យអាសាដចេញពីតំណែង ការចរចានឹងបរាជ័យ ព្រោះការបញ្ចប់ជម្លោះមិនមែនពឹងតែលើរដ្ឋាភិបាលក្រុងដាម៉ាសម្ខាងឡើយ។
លោកលើកឡើងបែបនេះ ស្របពេលដែលក្រុមឧទ្ទាមដែលគាំទ្រដោយលោកខាងលិច លើកឡើងម្តងហើយម្តងទៀតថា ការបណ្តេញ លោក អាសាដ ចេញពីតំណែងជារឿងតែមួយគត់ដែលអាចបញ្ចប់សង្គ្រាមស៊ីវិលបង្ហូរឈាមគ្នា ដល់៥ឆ្នាំមកនេះ។ សម្រាប់ក្រុមឧទ្ទាមប្រឆាំងរបបអាសាដ ថាខ្លួនព្រមបញ្ចប់ជម្លោះដរាបណាអាសាដលែងមានវត្តមានក្នុងនយោបាយ។
ក្រៅពីនេះ ប្រមុខការទូតស៊ីរីខាងលើ បានឆ្លៀយវាយប្រហារបេសកជនពិសេស អង្គការសហប្រជាជាតិលោក Staffan de Misturaផង ដែលលោកបានលើកឡើងថា ការបោះឆ្នោតប្រធានាធិបតីនៅស៊ីរីនឹងចាប់ផ្តើមក្នុងរយៈពេល១៨ខែទៅមុខ ហើយប្រធានបទស្តីពីការបង្កើតរដ្ឋសហព័ន្ធនៅស៊ីរី មិនត្រូវដកចេញពីតុចរចាថ្ងៃចន្ទឡើយ។
ការបង្កើតរដ្ឋសហព័ន្ធនៅស៊ីរីដែលត្រួវត្រាយផ្លូវសម្រាប់ការប្រតិភូកម្មអំណាច ស្វ័យភាពច្រើនដល់អាជ្ញាធរថ្នាក់ក្រោមជាពិសេសទៅដល់ជនជាតិផ្សេងទៀតក្នុងប្រទេសស៊ីរី ជាអ្វីដែលក្រុមប្រឆាំងនិងលោកខាងលិចចង់បាន។ ប៉ុន្តែរដ្ឋាភិបាលក្រុងដាម៉ាសទាត់ចោលគំនិតនេះ ដោយអះអាងថា ដំណោះស្រាយល្អសម្រាប់ស៊ីរីគឺរក្សារដ្ឋទោលដែលមានការឯកភាពជាតិខ្ពស់ដូចពេលបច្ចុប្បន្ន។
២.បារាំង អាមេរិកព្រមានរដ្ឋាភិបាលស៊ីរី កុំព្យាយាមបង្អាក់កិច្ចចរចាសន្តិភាព
ការខ្វែងគំនិតគ្នារឿងប្រធានបទនៃកិច្ចចរចាជាឧបសគ្គយ៉ាងធំសម្រាប់ការបញ្ចប់ជម្លោះនៅស៊ីរី។ គ្មានការឯកភាពគ្នាកើតឡើងរវាងក្រុមប្រឆាំងនិងរដ្ឋាភិបាលសោះជុំវិញ ការកំណត់របៀបវារៈនៃកិច្ចប្រជុំពិភាក្សាគ្នា ខណៈដែលភាគីម្ខាងៗអួតថាខ្លួនមានឆន្ទៈស្វែងរកដំណោះស្រាយនយោបាយបញ្ចប់ជម្លោះ។
លោក ចន ឃែរី រដ្ឋមន្ត្រីការបរទេសអាមេរិកបានចោទប្រកាន់ សមភាគីស៊ីរីថា កំពុងព្យាយាមបង្អាក់ការចរចាពេលនេះ។ ហើយលោកបានព្រមានបណ្តាសម្ព័ន្ធមិត្តរដ្ឋាភិបាលស៊ីរី មានអ៊ីរ៉ង់ និងរុស្ស៊ី ពីលទ្ធភាពនៃការបរាជ័យនៃបទឈប់បាញ់ដ៏ផុយស្រួយដែលបានចូលជាធរមានពីថ្ងៃ ២៧កុម្ភៈកន្លងមកនោះ។ ចំណែកសមភាគីបារាំងលោក Jean-Marc Ayrault ក៏បានទិតៀនពាក្យសម្តីរដ្ឋមន្ត្រីការបរទេសស៊ីរីផងដែរ តែលោកបានអំពាវនាវឲ្យបណ្តាភាគីពាក់ព័ន្ធក្នុងជម្លោះស៊ីរីប្រឹងប្រែងទាំងអស់គ្នាដើម្បីរក្សាឲ្យបានដំណើរការចរចារកសន្តិភាពនេះ៕