វិហារអ៊ីស្លាម MASJID PUTRA ទាក់ទាញទេសចរ នៅ PUTRAJAYA ម៉ាឡេស៊ី

អន្តរជាតិ

វិហារអ៊ីស្លាម MASJID PUTRA ទាក់ទាញទេសចរ នៅ PUTRAJAYA ម៉ាឡេស៊ី

15, Mar 2016 , 7:39 pm

រូបភាព

ដោយ:

គូឡាឡាំពួ-ម៉ាឡេស៊ី៖ ព្រះវិហារអ៊ីស្លាម MASJID PUTRA កំពុងរួមចំណែកទាក់ទាញភ្ញៀវទេសចរដែលបានមកកម្សាន្តនៅម៉ាឡេស៊ី។ សំណង់ព្រះវិហារពណ៌ផ្កាឈូក និងក្បាច់រចនាយ៉ាងស្រស់ស្អាត បានទាក់ចិត្តភ្ញៀវទេសចរឲ្យថតរូបភ្ជាប់និស្ស័យ និងទុកជាអនុស្សាវរីយ៍ ក្រោយពេលដែលពួកគេបានឈានជើងចូលមកដល់។ MASJID PUTRA គឺជាវិហារដ៏សំខាន់មួយសម្រាប់សាសនិកអ៊ីស្លាម នៅក្នុងប្រទេសម៉ាឡាស៊ី។ វិហារនេះ ជាកន្លែងអធិដ្ឋាន និងជាកន្លែងសិក្សាផងដែរ សម្រាប់សាសនាអ៊ីស្លាម ហើយសាលទាំងមូលអាចផ្ទុកអ្នកថ្វាយបង្គំបានចំនួន ១៥០០០នាក់។

ដើម្បីអាចចូលទៅផ្តិតយករូបភាពនៅក្នុងសាលនេះបាន ភ្ញៀវទេសចរជាបុរសត្រូវដោះស្បែកជើង និងតម្រង់ជួរយ៉ាងត្រឹមត្រូវ។ ចំណែកឯភ្ញៀវទេសចរជាស្ត្រីដែលគ្មានស្បៃគ្របក្បាលវិញ អាជ្ញាធរនៅទីនោះ តម្រូវឲ្យពាក់អាវធំពណ៌ផ្កាឈូក ដោយទុកតែរង្វង់មុខ។ MASJID PUTRA ត្រូវបានសាងសង់ឡើងនៅឆ្នាំ១៩៩៧ និងបានបញ្ចប់នៅរយៈពេលពីរឆ្នាំក្រោយមក។ វិហារពណ៌ផ្កាឈូកនេះ មានទីតាំងស្ថិតនៅជាប់នឹងការិយាល័យរបស់នាយករដ្ឋមន្ត្រីម៉ាឡេស៊ី ដែលមានឈ្មោះថា (Perdana Putra) និងនៅជាប់បឹង Putrajaya ដែលមនុស្សជាអ្នកបង្កើតឡើង នៅក្នុងតំបន់ PUTRAJAYA ក្បែរទីក្រុងគូឡាឡាំពួ។

ខាងក្រោមនេះជាទិដ្ឋភាពនៅព្រះវិហារអ៊ីស្លាម MASJID PUTRA ក្នុងតំបន់ PUTRAJAYA ប្រទេសម៉ាឡេស៊ី ដែលសារព័ត៌មានថ្មីៗបានផ្តិតយករូបភាពដោយផ្ទាល់ពីទីនោះ សូមទស្សនាដូចតទៅ៖