អន្តរជាតិ
នយោបាយអន្តរជាតិ
អតីតរដ្ឋមន្ត្រីហិរញ្ញវត្ថុក្លាយជានាយករដ្ឋមន្ត្រីថ្មី ខណៈតៃវ៉ាន់នឹងជំរុញកំណើនសេដ្ឋកិច្ច
× ប្រធានាធិបតីជាប់ឆ្នោតរបស់តៃវ៉ាន់លោកស្រី Tsai Ing-wen បានតែងតាំងអតីតរដ្ឋមន្ត្រីហិរញ្ញវត្ថុលោក Lin Chuan ជានាយករដ្ឋមន្ត្រីថ្មីរបស់រដ្ឋាភិបាលរបស់លោកស្រី ដែលនឹងចូលកាន់ដំណែងនៅខែឧសភាខាងមុខ។ ការតែងតាំងនៅថ្ងៃអង្គារនេះ គឺស្របពេលដែលរដ្ឋាភិបាលថ្មីរបស់លោកស្រី Tsai Ing-wen នឹងផ្ដោតការងាររបស់ខ្លួនទៅលើការជំរុញកំណើនសេដ្ឋកិច្ច និងងាកចេញពីការពឹងផ្អែកលើសេដ្ឋកិច្ចរបស់ចិន។
អតីតរដ្ឋមន្ត្រីហិរញ្ញវត្ថុលោក Li Chuan ត្រូវបានតែងតាំងជានាយករដ្ឋមន្ត្រីថ្មី របស់កោះតៃវ៉ាន់ ដែលនេះបានបង្ហាញពីការយកចិត្តទុកដាក់របស់ប្រធានាធិបតីស្ត្រីជាប់ឆ្នោតរបស់តៃវ៉ាន់លោកស្រី Tsai Ing-wen ក្នុងការពន្លឿនល្បឿនសេដ្ឋកិច្ចដែលមិនសូវជាល្អនោះ។ គេរំពឹងដែរថា គណៈរដ្ឋមន្ត្រីថ្មីដែលនឹងចូលកាន់ដំណែងនៅខែឧសភា ក៏មានការចូលរួមពីមនុស្សមានសមត្ថភាពដទៃទៀត ដើម្បីស្រោចស្រង់សេដ្ឋកិច្ចរបស់តៃវ៉ាន់។
លោក Li Chuan គឺជារដ្ឋមន្ត្រីសេដ្ឋកិច្ចចាប់ពីឆ្នាំ២០០២ដល់ឆ្នាំ២០០៦ ហើយមានតួនាទីជាប្រធាននាយកដ្ឋានថវិកា គណនេយ្យ និងស្ថិតិ។ លោកជាមនុស្សជិតស្និទ្ធ នឹងលោកស្រី Tsai Ing-wen ប្រធានគណបក្សប្រជាធិបតេយ្យជឿនលឿន និងចូលរួមក្នុងយុទ្ធនាការបោះឆ្នោតកាលពីដើមខែមករា ដែលលោកស្រីបានទទួលជោគជ័យជម្នះលើបក្សគួកមីងតាំង។ គេរំពឹងថា លោក Lin ដែលធ្លាប់ប្រឡូកក្នុងវិស័យហិរញ្ញវត្ថុ នឹងជួយជំរុញសេដ្ឋកិច្ចរបស់កោះតៃវ៉ាន់ ដែលពឹងផ្អែកខ្លាំងលើចិន។
ប្រធានាធិបតីជាប់ឆ្នោតលោកស្រី Tsai Ing-wen ប្រកាសពីការតែងតាំងលោក Lin នៅថ្ងៃទី១៥ ខែមីនានេះ និងបានសន្យាថា គណៈរដ្ឋមន្ត្រីថ្មីទីមួយរបស់លោកស្រីនឹងផ្ដោតលើបញ្ហាសេដ្ឋកិច្ចនិងហិរញ្ញវត្ថុ។ លោកស្រីចាត់ទុកអតីតរដ្ឋមន្ត្រីរូបនេះ ជាជម្រើសដ៏ល្អ ហើយគណៈរដ្ឋមន្ត្រីថ្មីនឹងចម្រុះដោយសមាសភាពផ្សេងៗ ក្រៅពីអ្នកសេដ្ឋកិច្ចនិងហិរញ្ញវត្ថុផងដែរ។
ការជាប់ឆ្នោតរបស់លោកស្រី Tsai Ing-wen គឺចំពេលដែលសេដ្ឋកិច្ចរបស់កោះតៃវ៉ាន់ កំពុងប្រឈមនឹងបញ្ហា ដែលបណ្ដាលមកពីការពឹងផ្អែកខ្លាំងលើការនាំចេញ និងនៅតែមិនអាចរួចផុតពីការធ្លាក់ចុះ។ បើតាមទូរទស្សន៍ Channel NewsAsia ទំនិញភាគច្រើនរបស់តៃវ៉ាន់ត្រូវនាំចេញទៅទីផ្សារចិន ខណៈចិនជាទិសដៅវិនិយោគដ៏ធំរបស់អ្នកជំនួញតៃវ៉ាន់។
យ៉ាងណាមិញ ទំនាក់ទំនងរវាងចិន និងតៃវ៉ាន់ មិនមានភាពល្អប្រសើរនោះទេ ក្រោយពេលដែលបក្សប្រឆាំងរបស់លោកស្រី Tsai Ing-wen ទទួលជោគជ័យក្នុងការបោះឆ្នោតសភានិងប្រធានាធិបតីកាលពីខែមករា។ ជារឿយៗ លោកស្រី តែងបង្ហាញពីគំនិតប្រកាសឯករាជ្យ ប៉ុន្តែនេះជាអ្វីដែលទីក្រុងប៉េកាំង មិនចង់ឲ្យកើតឡើងនោះទេ និងថែមទាំងប្រកាសប្រើកម្លាំងទ័ពវាយដណ្ដើមតៃវ៉ាន់ទៀតផង។
បន្ថែមពីនេះ ប្រធានាធិបតីចិនលោក ស៊ី ជិនពីង ក៏បានប្រកាសដែរថា ចិននឹងមិនអនុញ្ញាត ឲ្យមានកំហុសប្រវត្តិសាស្ត្រ ដោយសារតែការបំបែករបស់តៃវ៉ាន់ម្ដងទៀតនោះទេ។ នេះជាការព្រមានទុកមុនរបស់ចិន ប្រសិនបើមេដឹកនាំតៃវ៉ាន់ នៅតែចង់ប្រកាសឯករាជ្យទៀតនោះ៕
© រក្សាសិទ្ធិដោយ thmeythmey.com