កូរ៉េខាងជើងត្រៀមសាកល្បងក្បាលគ្រាប់នុយក្លេអ៊ែរ និងបាញ់មីស៊ីលបាលីស្ទិក

អន្តរជាតិ

កូរ៉េខាងជើងត្រៀមសាកល្បងក្បាលគ្រាប់នុយក្លេអ៊ែរ និងបាញ់មីស៊ីលបាលីស្ទិក

15, Mar 2016 , 8:59 pm

រូបភាព

ដោយ: តន ចាន់រិទ្ធារ៉ា

មេដឹកនាំកំពូលកូរ៉េខាងជើងលោក គីម ជុងអ៊ុន បានប្រកាសថា កូរ៉េខាងជើងនឹងសាកល្បងក្បាលគ្រាប់នុយក្លេអ៊ែរ និងបាញ់សាកល្បងមីស៊ីលបាលីស្ទិក ដែលមានសមត្ថភាពបំពាក់ក្បាលគ្រាប់នុយក្លេអ៊ែរ។ នេះបើយោងតាមការផ្សាយរបស់សារព័ត៌មានរដ្ឋកូរ៉េខាងជើង នៅថ្ងៃទី១៥ ខែមីនា ដោយបានបញ្ជាក់ថា លោក គីម ជុងអ៊ុន បានបញ្ជាការសាកល្បង នឹងធ្វើនៅពេលខាងមុខដ៏ខ្លី។

សូមស្ដាប់ព័ត៌មានលម្អិត៖

មិនយូរប៉ុន្មានក្រោយការសាកល្បងគ្រាប់បែកអ៊ីដ្រូសែន លោក គីម ជុងអ៊ុន និយាយថា ខ្លួននឹងសាកល្បងម្ដងទៀតលើក្បាលគ្រាប់នុយក្លេអ៊ែរ ដែលខ្លួនទើបបង្កើត ព្រមទាំងសាកល្បងបាញ់មីស៊ីលប្រើបច្ចេកវិទ្យាបាលីស្ទិក ដែលអាចបំពាក់ក្បាលគ្រាប់នេះបាន នៅពេលខ្លីខាងមុខ។ សារព័ត៌មានរដ្ឋកូរ៉េខាងជើងផ្សាយថា លោក គីម ជុងអ៊ុន និយាយដូច្នេះ ក្រោយពេលដឹកនាំការសាកល្បងដោយជោគជ័យ លើការចូលទៅលំហអាកាសរបស់ក្បាលគ្រាប់ដែលបាញ់ចេញពីមីស៊ីលបាលីស្ទិក។

បន្ទាប់ពីទទួលជោគជ័យលើការសាកល្បងបច្ចេកវិទ្យានាំក្បាលគ្រាប់ទៅលំហអាកាស មេដឹកនាំវ័យក្មេងរូបនេះ ក៏បានប្រកាសសាកល្បងក្បាលគ្រាប់ និងបាញ់មីស៊ីលបាលីស្ទិកជាច្រើនគ្រាប់ និងប្រាប់ដល់គ្រប់ផ្នែកពាក់ព័ន្ធទាំងអស់ ត្រូវរៀបចំឲ្យរួចរាល់។ ម្យ៉ាងលោក គីម ជុងអ៊ុន ចាត់ទុកជោគជ័យលើការសាកល្បងបច្ចេកវិទ្យា នាំក្បាលគ្រាប់ចូលលំហនេះ ជាជំហានរីកចម្រើនរបស់កូរ៉េខាងជើង ក្នុងការអភិវឌ្ឍរ៉ុក្កែតបាលីស្ទិក។ វាក៏ជួយពង្រឹងដល់សមត្ថភាពការពារជាតិ និងឧស្សាហកម្មអាវុធផងដែរ។

លើសពីនេះទៅទៀត ការប្រកាសត្រៀមសាកល្បងនេះ ធ្វើឡើងក្រោយពេលដែលរដ្ឋកុម្មុនីស្តមួយនេះប្រកាសថា ខ្លួនបានជោគជ័យក្នុងការបង្កើតក្បាលគ្រាប់នុយក្លេអ៊ែរកាលពីសប្ដាហ៍មុន។ សារព័ត៌មានរដ្ឋកូរ៉េខាងជើងផ្សាយថា ក្បាលគ្រាប់នេះ គឺអាចបំពាក់លើមីស៊ីលបាលីស្ទិកបាន ដែលនេះធ្វើឲ្យសមត្ថភាពរបស់កូរ៉ខាងជើង កាន់តែខ្លាំងថែមមួយកម្រិតទៀត។

អ្វីដែលគួរឲ្យព្រួយបារម្ភ វាក៏ចំពេលដែលសមយុទ្ធដ៏ធំរួមគ្នា រវាងអាមេរិក និងកូរ៉េខាងត្បូង កំពុងតែធ្វើនៅឧបទ្វីបកូរ៉េ។ កងទ័ពអាមេរិក និងកូរ៉េខាងត្បូងច្រើនជាងបីសែននាក់ កំពុងតែចូលរួមក្នុងលំហាត់ប្រចាំឆ្នាំ ដែលរបបកូរ៉េខាងជើងចាត់ទុកជា ទង្វើបង្ករឿងរបស់សត្រូវ។ ក្រៅពីកងទ័ពដ៏ច្រើន អាមេរិកក៏ទើបតែបញ្ជូននាវាមុជទឹកដើរដោយនុយក្លេអ៊ែរ ទៅចូលរួមសមយុទ្ធថែមទៀតផង។ របបក្រុងព្យុងយ៉ាង ក៏តែងតែព្រមានជារឿយៗដែរថា ខ្លួននឹងវាយបក ប្រសិនបើសមយុទ្ធនេះ បំពានដែនអធិបតេយ្យរបស់ខ្លួន ហើយក៏វាយបកដល់ទឹកដីអាមេរិកថែមទៀត។

កូរ៉េខាងជើងទើបតែទទួលរងការដាក់សម្ពាធថ្មីមួយទៀត ពីសហគមន៍អន្តរជាតិ តាមរយៈការដាក់ទណ្ឌកម្មដ៏ធ្ងន់មួយ នៅដើមខែមីនានេះ។ ប៉ុន្តែមេដឹកនាំប្រទេសក្រីក្រមួយនេះ ហាក់ដូចជាមិនញញើត នឹងវិធានការក្ដៅរបស់អន្តរជាតិនោះទេ ហើយបែរជាផ្គើនម្ដងហើយម្ដងទៀតទៅវិញ។ ការបាញ់មីស៊ីលបាលីស្ទិក និងការប្រកាសពីការទទួលជោគជ័យក្នុងការផលិតក្បាលគ្រាប់នុយក្លេអ៊ែរ ជាសញ្ញាដែលបង្ហាញពីការរឹងទទឹងរបស់កូរ៉េខាងជើង ដែលជម្នះបន្តអភិវឌ្ឍន៍កម្មវិធីនុយក្លេអ៊ែររបស់ខ្លួន។ គេអាចយល់បានថា អ្វីដែលរបបកូរ៉េខាងជើងចង់បាន គឺមហាអំណាចនុយក្លេអ៊ែរ ដែលមានរយៈចម្ងាយឆ្ងាយ និងអាចបាញ់ដល់អាមេរិក៕