អន្តរជាតិ
លោក ពូទីន បញ្ជាដកទ័ពរុស្ស៊ីពីស៊ីរីជាការដោះដៃចោល អាសាដ?
× ប្រធានាធិបតីរុស្ស៊ីបានបញ្ជាដកកងទ័ពចេញមួយចំនួនធំពីប្រទេសស៊ីរី ស្របពេលដែលកិច្ចចរចាសន្តិភាពស៊ីរីជុំទី១ ចាប់ផ្តើមនៅទីក្រុងហ្សឺណែវនៅថ្ងៃចន្ទទី ១៤ មីនា។ បទបញ្ជាដកទ័ពចេញពីស៊ីរីរបស់របបក្រេមឡាំង នេះក្លាយជាចម្ងល់ ព្រោះការចរចាសន្តិភាពស៊ីរីកំពុងស្ថិតក្នុងភាពស្រពេចស្រពិលនៅឡើយ។ ប៉ុន្តែវាមិនមែនមានន័យថារុស្ស៊ីបោះបង់ចោលរបបដឹកនាំក្រុងដាម៉ាសឡើយ។ អាចថា រុស្ស៊ីសម្រេចបាននូវគោលបំណងរបស់ខ្លួន ពោលគឺការពារកុំឲ្យរបបលោក អាសាដ រលំ ជួយពង្រឹងកម្លាំងទ័ពស៊ីរី និងផ្តួចផ្តើមការចរចាសន្តិភាពនិងផ្សះផ្សាជាតិស៊ីរី។
សូមស្តាប់ការបកស្រាយរបស់លោក សៅ ផលនិស្ស័យ៖
«ខ្ញុំបញ្ជាឲ្យរដ្ឋមន្ត្រីការពារជាតិ ចាប់ផ្តើមដកកងកម្លាំងសំខាន់របស់យើង ចេញពីប្រទេសស៊ីរី ព្រោះការងារទាំងឡាយដែលផ្តល់ឲ្យក្រសួងការពារជាតិ និងកងទ័ពត្រូវបានបំពេញរួចរាល់ហើយ»។ ខ្ញុំសង្ឃឹមថាការដកទ័ពរុស្ស៊ីចេញ ជាសញ្ញាល្អសម្រាប់ភាគីជម្លោះ ហើយទំនុកចិត្តរវាងគូភាគី នឹងកើនឡើងក្នុងការចរចាសន្តិភាព»។ នេះជាសម្តីលោក វ្ល៉ាឌីមៀ ពូទីន ដែលត្រូវបានស្រង់ដោយទីភ្នាក់ងារព័ត៌មានរដ្ឋរុស្ស៊ី TASS ដែលលើកឡើងក្នុងជំនួបជាមួយរដ្ឋមន្ត្រីការពារជាតិរុស្ស៊ី លោក Sergey Shoigu ថ្ងៃចន្ទទី ១៤ មីនា។
ការបញ្ជាដកទ័ពរុស្ស៊ីចេញពីទឹកដីស៊ីរីនេះ កើតឡើងស្របពេលដែលបណ្តាភាគីពាក់ព័ន្ ធជាពិសេសក្រុមអន្តរជាតិគាំទ្រស៊ីរី ក្រុមប្រឆាំង និងរដ្ឋាភិបាលស៊ីរីចាប់ផ្តើមដំណើរការចរចាសន្តិភាពនៅក្នុងទីក្រុងហ្សឺណែវ។ ការដកទ័ពនេះ កើតមានឡើងក្រោយរុស្ស៊ី អន្តរាគមន៍នៅទឹកដីជម្លោះនេះអស់ពេល៦ខែ ដោយទម្លាក់គ្រាប់បែកតាមផ្លូវអាកាសប្រឆាំងក្រុមរដ្ឋឥស្លាម ឬក្រុមដែស្ហ និងគាំទ្រទ័ពរដ្ឋាភិបាលស៊ីរីផង។ យ៉ាងណាក៏ដោយ មានកងទ័ពភាគច្រើនប៉ុណ្ណោះដែលត្រូវដកចេញ ហើយកងទ័ពនៅមូលដ្ឋានខេត្ត Latakia និងមូលដ្ឋានទ័ពជើងទឹកនៅសមុទ្រម៉េឌីទែរ៉ាណេ Tartus នៅបន្តប្រតិបត្តិការរបស់ខ្លួនជាធម្មតា។ ប៉ុន្តែគេនៅឆ្ងល់ថា មូលហេតុអ្វីបានជា លោក ពូទីន បញ្ជាដកកងទ័ពភាគច្រើនភ្លាមៗនៅពេលនេះ?
១.រុស្ស៊ីដោះដៃចោល អាសាដ ឬសម្រេចជោគជ័យក្នុងអន្តរាគមន៍៦ខែនេះ?
មានមូលហេតុច្រើននៃការសម្រេចដកទ័ពភាគមួយចំនួនធំចេញពីទឹកដីស៊ីរីនៅពេលនេះ។ វាគ្មានអ្វីដែលខាតបង់ឡើយសម្រាប់រុស្ស៊ីដែលត្រូវដកទ័ពចេញពេលនេះ ដ្បិតរុស្ស៊ីមានតួនាទីសំខាន់រួចហើយ ពោលគឺជាសហស្ថាបនិកដែលផ្តួចផ្តើមរៀបចំ និងដឹកនាំកិច្ចចរចាសន្តិភាពស៊ីរី អង្គុយស្មើមុខស្មើមាត់អាមេរិក ដែលប្រឡូកក្នុងសង្គ្រាមនេះរាប់ឆ្នាំមកនោះ។
តាមពិត មូលហេតុទីមួយ របបដឹកនាំក្រេមឡាំងសម្រេចបាននូវបំណងដែលខ្លួនចង់បាន ក្នុងនោះមានជួយរក្សារដ្ឋាភិបាលលោក បាសា អាល់អាសាដ ពង្រឹងកម្លាំងរដ្ឋាភិបាលស៊ីរី និងបង្ខំឲ្យលោកខាងលិចទទួលយកអាសាដ ជាភាគីស្របច្បាប់ក្នុងការចរចា។ ចាប់តាំងពីចុងខែកញ្ញាមក ទ័ពអាកាសរុស្ស៊ីវាយសំពងទាំងភេរវជនដែស្ហ និងក្រុមឧទ្ទាមប្រឆាំង អាសាដ រហូតជួយឲ្យរដ្ឋាភិបាលក្រុងដាម៉ាស វាយដណ្តើមទឹកដីមកវិញបានច្រើនសន្ធឹក និងត្រៀមលក្ខណៈបានរួចរាល់ក្នុងការប្រយុទ្ធ។ បើយោងតាមរបាយការណ៍ក្រសួងការពារជាតិរុស្ស៊ី រយៈពេលប៉ុន្មានខែនៃអន្តរាគមន៍នេះ រុស្ស៊ីជួយទ័ពរដ្ឋាភិបាលដណ្តើមទឹកដីបានតិចបំផុត១ម៉ឺនគីឡូម៉ែត្រការ៉េ និងដណ្តើមមកវិញទីតាំងសំខាន់ប្រហែល ៤០០កន្លែង។ ទាក់ទិននឹងការចរចា រុស្ស៊ីប្រើលេសប្រឆាំងភេរវកម្មក្នុងប្រទេសស៊ីរី ដាក់សម្ពាធលោកខាងលិច ឲ្យសហការជាមួយខ្លួន និងព្រមទទួលលោក អាសាដ ជាភាគីស្របច្បាប់ ក្នុងដំណើរការចរចាសន្តិភាពស៊ីរីថែមទៀត ទោះជាក្រុមប្រឆាំង មិនចង់ឲ្យមានវត្តមានលោកក៏ដោយចុះ។
មួយវិញទៀត ការបន្ថយចំនួនទ័ព មានន័យថាបន្ថយប្រតិបត្តិការដើម្បីប្រយុទ្ធ និងបន្ថយការចំណាយ។ ប៉ុន្តែហេតុផលបន្ថយការចំណាយក្នុងសង្គ្រាមក្រៅស្រុក ជាហេតុផលមិនសូវសំខាន់សម្រាប់អ្នកតាមដានស្ថានការណ៍ ប៉ុន្តែវាសំខាន់សម្រាប់រដ្ឋាភិបាលក្រុងមូស្គូបច្ចុប្បន្ន។ ទណ្ឌកម្មលោកខាងលិច និងការធ្លាក់ចុះនៃតម្លៃប្រេងឆៅលើទីផ្សារអន្តរជាតិ កំពុងរួមរឹតសេដ្ឋកិច្ចរុស្ស៊ី និងធ្វើឲ្យប្រជាជនរុស្ស៊ី ប្រឈមបញ្ហាលំបាកក្នុងជីវភាពរស់នៅប្រចាំថ្ងៃ។ ការចំណាយលុយធ្វើសង្គ្រាមនៅស៊ីរី ដែលបានផលមកវិញតិចជាងចំណាយ មិនមែនជាអ្វី ដែលប្រជាជនរុស្ស៊ីត្រូវការទេ។ ម្យ៉ាង លោក ពូទីន ក៏ត្រូវគិតគូរពីប្រជាប្រិយភាពរបស់ខ្លួន ក្នុងស្រុកមុនការបោះឆ្នោតឆ្នាំ ២០១៨ខាងមុខដែរ។
គ្រាន់តែលោក ប្រកាសដកទ័ពភា្លម លោក បារ៉ាក់ អូបាម៉ា ទូរសព្ទទៅជជែកជាមួយលោកភ្លាមដែរ។ លោកបាន ស្វាគមន៍ចំណាត់ការលោក ពូទីន ព្រោះវាជាសម័យអន្តរកាលនយោបាយនៅស៊ីរី ហើយអ្វីដែលចាំបាច់គឺពន្លឿនការបង្កើតដំណោះស្រាយនយោបាយ មិនមែនយោធាឡើយ។ បើយោងតាមទីភ្នាក់ងារព័ត៌មានចិន Xinhua ក្នុងកិច្ចសន្ទនាតាមទូរសព្ទ មេដឹកនាំទាំងពីរបានឯកភាពគ្នាបន្តសហការគ្នាឲ្យជិតស្និទ្ធដើម្បីធានាពីប្រសិទ្ធភាពនៃការអនុវត្តបទឈប់បាញ់ ចែកចាយជំនួយមនុស្សធម៌ និងប្រឆាំងក្រុមភេរវកម្មផង។
ហេតុផលសំខាន់មួយទៀត គឺលោក ពូទីន ចង់ឲ្យភាគីឆាប់ព្រមព្រៀងគ្នាបញ្ចប់ជម្លោះ និងមានការដកទណ្ឌកម្មប្រឆាំងរុស្ស៊ី ។ ការដកទ័ពរុស្ស៊ីចេញ វាជាអម្រែកធំមួយសម្រាប់រដ្ឋាភិបាលលោក អាសាដ។ លោក ពូទីន មិនអាចឲ្យលោក អាសាដ ឡើងចាងមិនបន្ទន់ឥរិយាបទនិងធ្វើសម្បទានខ្លះសម្រាប់ការចរចាសន្តិភាពឡើយ។ តាំងពីក្រុមឧទ្ទាមខ្សត់ខ្សោយកម្លាំងព្រោះការទម្លាក់គ្រាប់របស់រុស្ស៊ី របបដឹកនាំអាសាដ មិនសូវចង់ចរចាឡើយ ហើយព្រមានជារឿយៗថា បើនិយាយរឿងបញ្ចប់តំណែងខ្លួន ការចរចានឹងមិនកើតឡើងទេ។ ទាំងនេះបញ្ជាក់ច្បាស់ថាគ្មានផ្លូវដែលកិច្ចចរចាសន្តិភាពបច្ចុប្បន្ន ដែលមានមហាអំណាចគាំទ្រ ឈានទៅបញ្ចប់ជម្លោះរ៉ាំរ៉ៃ ៥ឆ្នាំនេះឡើយ បើគ្មានការដាក់សម្ពាធលើភាគីទាំងសងខាងទេ។
រឿងដែលគួរឲ្យកត់សម្គាល់ អ្នកនាំពាក្យសម្ព័ន្ធក្រុមប្រឆាំងស៊ីរី Salim al-Muslat បានស្វាគមន៍ការសម្រេចចិត្តរបស់លោក ពូទីន ដោយលោករំពឹងថា វានឹងជួយបង្កើតភាពវិជ្ជមានសម្រាប់ការចរចា។
ការហក់ចូលប្រឡូកក្នុងសង្គ្រាមស៊ីរី មិនមែនធ្វើឡើងដោយគ្មានគោលដៅ និងកម្មវត្ថុត្រឹមត្រូវនោះឡើយ។ លោក ពូទីន រំពឹងជាមុនស្រាប់ហើយថា បើអាចជួយបង្កើតសន្តិភាពស៊ីរីបាន ទណ្ឌកម្មលោកខាងលិចប្រឆាំងរុស្ស៊ី ជុំវិញបញ្ហាអ៊ុយក្រែន នឹងត្រូវលោកខាងលិចដកចេញតាមនោះដែរ។
២. ជម្លោះស៊ីរី៖ គ្មានផែនការបន្ទាប់ឡើយ បើការចរចាបរាជ័យ
ទុករឿងដកទ័ពរុស្ស៊ីមួយឡែកចុះ ព្រោះចេតនាលោក ពូទីន បែបណា ក៏ពិបាកប៉ាន់ស្មានដែរ។ ព្រោះនេះក៏ដោយសារ ការនិយាយវាស្រួលជាងធ្វើជាក់ស្តែង។ រឿងសំខាន់នៅពេលបច្ចុប្បន្ នគឺធានាថាកិច្ចចរចានៅហ្សឺណែវ នឹងមិនបរាជ័យទោះជាក្នុងកាលៈទេសៈណាក៏ដោយ។ យ៉ាងណាក៏ដោយ រឿងនេះមិនងាយស្រួលឡើយ ព្រោះភាគីទាំងសងខាង សុទ្ធតែមានការទាមទាររបស់ខ្លួនម្នាក់ៗ។ ក្រុមឧទ្ទាមចង់ឲ្យអាសាដ ចេញពីនយោបាយ និងអាចបង្កើតរដ្ឋសហព័ន្ធផង ខណៈដែលតំណាងរដ្ឋាភិបាលស៊ីរីព្រមានថា បើនិយាយពីជោគវាសនាលោក អាសាដ មិនបាច់ចរចាទៀតទេ។
កង្វល់ធំបំផុត គឺគ្មានផែនការបន្ទាប់ ឬផែនការ «ខ» ឡើយបើផែនការ«ក»នេះបរាជ័យ។ រឿងដែលត្រូវធ្វើគឺមានតែម្យ៉ាងគឺត្រលប់មកប្រយុទ្ធគ្នាឡើងវិញទៀត។ ប៉ុន្តែការចរចានឹងចាប់ផ្តើមទៅរយៈពេលបីជុំ ដើម្បីឲ្យភាគីមានពេលគ្រប់គ្រាន់សម្រាប់ស្វែងរកចំណុចរួមគ្នាបាន។ បើតាមបេសកជនពិសេសអង្គការសហប្រជាជាតិ និងជាអ្នកដឹកនាំការចរចាលោក Staffan De Mistura ការចរចាដែលចាប់ផ្តើមលើកទីមួយ ចាប់តាំងពីបទឈប់បាញ់ត្រូវបានភាគីឯកភាពអនុវត្តន៍ចុងខែកុម្ភៈកន្លងមកនោះ នឹងបន្តរហូតដល់ថ្ងៃ ២៤ មីនា។ ចំណែកឯការចរចាជុំទី ២ និងទី៣ នឹងត្រូវរៀបចំបន្តទៀតដើម្បីធានាថា សង្គ្រាមនឹងឈានដល់ទីបញ្ចប់៕
© រក្សាសិទ្ធិដោយ thmeythmey.com