អន្តរជាតិ
នយោបាយអន្តរជាតិ
ព្រោះចាញ់ ដូណាល់ ត្រាំ លោក Marco Rubio បង្ខំចិត្តដើរចេញពីការប្រជែងក្នុងបក្ស
× សមាជិកព្រឹទ្ធសភាបក្សសាធារណរដ្ឋនៅរដ្ឋ Florida លោក Marco Rubio បានសម្រេចចិត្តឈប់ប្រកួតប្រជែងក្នុងបក្សទៀត ក្រោយពេលលោកមិនអាចផ្តួលគូប្រជែងរបស់លោក លោក ដូណាល់ ត្រាំ ក្នុងការបោះឆ្នោតនៅរដ្ឋ Florida នាថ្ងៃអង្គារទី ១៥មីនានេះ។ ការដកខ្លួនរបស់បេក្ខជនរូបនេះរឹតតែផ្តល់ក្តីសង្ឃឹមច្រើនដល់សេដ្ឋីអចលនាទ្រព្យថែមទៀត។
លទ្ធផលបោះឆ្នោតថ្ងៃ អង្គារ «Super Tuesday II» បង្ហាញថា លោក ដូណាល់ ត្រាំ បានទទួលជ័យជម្នះនៅរដ្ឋចំនួន ៤ក្នុងចំណោមរដ្ឋ ៥ ក្នុងនោះមានទាំងរដ្ឋ Florida ផង។ គេរំពឹងជាមុនថា លោក Marco Rubio ឯណេះទេ ជាអ្នកឈ្នះនោះ។ ក្រោយដឹងថា ចាញ់ឆ្នោតលោក Marco Rubio ក៏ប្រកាសឈប់បន្តឃោសនាបោះឆ្នោតប្រជែងក្នុងបក្សដែរ ម្សិលមិញនេះ។
បរាជ័យនៅរដ្ឋ Florida ជារដ្ឋដែលខ្លួនធ្វើជាសមាជិកព្រឹទ្ធសភា អាចថា ជាបរាជ័យដ៏ធំមួយ និងជារឿងអាម៉ាសបំផុតមួយដែលសម្រាប់លោក Marco Rubio ព្រោះសូម្បីតែលោកខ្លួនឯងក៏មិនដែលធ្លាប់គិតថាលទ្ធផលវាបែបនេះដែរ។
ថ្លែងទៅកាន់អ្នកគាំទ្រទាំងទឹកមុខស្ងួតស្ងប់ លោកថា៖« យើងរស់នៅក្នុងប្រទេសសាធារណរដ្ឋ ហើយអ្នកបោះឆ្នោតរបស់យើងជាអ្នកបង្កើតការសម្រេចចិត្តនេះ។ សហរដ្ឋអាមេរិកពេលនេះកំពុងនៅកណ្តាលព្យុះនយោបាយ ជារលកយក្សស៊ូណាមីពិត ហើយយើងគួរមើលឃើញហើយថាវាកំពុងបកបោកសំដៅមករកយើង»។
សមាជិកព្រឹទ្ធសភាវ័យ ៤៤ឆ្នាំនេះចង់ប្រាប់ទៅកាន់អ្នកគាំទ្រលោកថា ការបន្តឈ្នះហើយឈ្នះទៀតរបស់បេក្ខជនដូចជាលោក ដូណាល់ ត្រាំ ជាបញ្ហាធំរបស់អាមេរិក តែប្រជាជនអាមេរិកខ្លួនឯងទេជាអ្នកសម្រេចចិត្ត។ ហើយលោកក៏យល់ឃើញដែរថា ពេលវេលានេះមិនស័ក្តិសមឡើយសម្រាប់លោកក្នុងការឈានទៅចាប់យកឱកាសក្លាយជាប្រធានាធីបតី។
កន្លងមកលោកបានអះអាងថា មានតែលោកម្នាក់ប៉ុណ្ណោះដែលអាចបញ្ឈប់លោក ដូណាល់ ត្រាំ បាន ហើយលោកបន្តព្រួតដៃជាមួយបេក្ខជនផ្សេងទៀតដើម្បីវាយប្រហារនិង ទម្លាក់ប្រជាប្រិយភាពរបស់សេដ្ឋីអចលនទ្រព្យផងដែរ។ ប៉ុន្តែចុងក្រោយលោកត្រូវដើរចេញពីសង្វៀននយោបាយ ទាំងឈឺចិត្ត៕
Tag:
ដូណាល់ ត្រាំ
ហ៊ីឡារី គ្លីនតុន
Super Tuesday
© រក្សាសិទ្ធិដោយ thmeythmey.com