សហព័ន្ធកីឡាបាល់ទាត់នឹងបង្កើតឲ្យមានសមាគម អ្នកគាំទ្រ គ្រូបង្វឹក និងអាជ្ញាកណ្តាល

កីឡាជាតិ

ជាតិ

សហព័ន្ធកីឡាបាល់ទាត់នឹងបង្កើតឲ្យមានសមាគម អ្នកគាំទ្រ គ្រូបង្វឹក និងអាជ្ញាកណ្តាល

16, Mar 2016 , 3:59 pm

រូបភាព

ដោយ:

លោក សៅ សុខា ប្រធានសហព័ន្ធកីឡាបាល់ទាត់កម្ពុជា នាមហាសន្និបាតសហព័ន្ធកីឡាបាល់ទាត់កម្ពុជាលើកទី១០ កាលពីព្រឹកថ្ងៃទី១៦ ខែមីនា នៅសណ្ឋាគារភ្នំពេញ បានបញ្ជាក់ថា ដើម្បីឆ្លើយតបទៅនឹងការខិតខំប្រឹងប្រែង និងលើកទឹកចិត្តដល់មន្ត្រីសហព័ន្ធ គ្រូបង្វឹក អាជ្ញាកណ្តាល និងអ្នកគាំទ្រ សហព័ន្ធ នឹងបង្កើតឲ្យមានសមាគម អ្នកគាំទ្រ គ្រូបង្វឹក និងអាជ្ញាកណ្តាល ដើម្បីជួយការពារផលប្រយោជន៍ដល់ពួកគេទាំងនេះ។

សហព័ន្ធកីឡាបាល់ទាត់កម្ពុជានៅក្នុងឆ្នាំ២០១៦ នេះ នឹងបង្កើតឲ្យមានសមាគម អ្នកគាំទ្របាល់ទាត់ គ្រូបង្វឹក និងអាជ្ញាកណ្តាល ក្នុងគោលបំណងដើម្បីការពារផលប្រយោជន៍ ក្នុងវិស័យនីមួយៗ។ ម្យ៉ាងវិញទៀត ដោយសារខាងសហព័ន្ធនឹងបង្កើតឲ្យមានពានរង្វាន់លើកទឹកចិត្តដល់ កីឡាករ គ្រូបង្វឹក អាជ្ញាកណ្តាល ដៃគូសហការ អ្នកឧបត្ថម្ភ និងអ្នកគាំទ្រផងដែរ។ សមាគមទាំងនេះ នឹងក្លាយជាចំណែកដ៏សំខាន់លើការសម្រេចចិត្ត នៅពេលដែលពួកគេបានកា្លយជាសមាជិករបស់សហព័ន្ធកីឡាបាល់ទាត់កម្ពុជា មិនត្រឹមតែប៉ុណ្ណោះសមាគមនេះនឹងមានសំឡេងមួយក្នុងការអនុម័ត ការសម្រេច ការពិភាក្សា និងរាល់កិច្ចការងារបាល់ទាត់ក្នុងព្រះរាជាណាចក្រកម្ពុជា។

នាមហាសន្និបាតសហព័ន្ធកីឡាបាល់ទាត់កម្ពុជា កាលពីព្រឹកថ្ងៃទី១៦ ខែមីនា នៅសណ្ឋាគារភ្នំពេញ លោក សៅ សុខា បានបញ្ជាក់ដូច្នេះថា៖«នៅថ្ងៃខាងមុខនេះយើងនឹងបង្កើតឲ្យមានសមាគមអ្នកគាំទ្រ គ្រូបង្វឹក អាជ្ញាកណ្តាល ដើម្បីការពារផលប្រយោជន៍របស់វិស័យនីមួយៗ។ សមាគមទាំងនោះនៅយើងរៀបចំមានក្បួនខ្នាតត្រឹមត្រូវ ហើយជាសមាជិករបស់សហព័ន្ធ នឹងមានសំឡេងមួយក្នុងការអនុម័ត ការសម្រេច និងពិភាក្សារាល់កិច្ចការងារគ្រប់បែបយ៉ាងនៅក្នុងសហព័ន្ធ»។

ការបង្កើតឲ្យមានពានរង្វាន់លើកទឹកចិត្តកីឡាករ គ្រូបង្វឹក អាជ្ញាកណ្តាល មន្ត្រីពាក់ព័ន្ធ និងអ្នកគាំទ្រនេះ ក្នុងគោលបំណងដើម្បីឆ្លើយតបទៅនឹងការខិតខំប្រឹងប្រែង ក្នុងការជួយឲ្យវិស័យកីឡាបាល់ទាត់កម្ពុជាមានការរីកចម្រើនយ៉ាងខ្លាំងក្នុងរយៈពេល១០ឆ្នាំកន្លងទៅ។ ប្រធានសហព័ន្ធកីឡាបាល់ទាត់កម្ពុជារៀបរាប់ដូច្នេះថា៖«សហព័ន្ធកីឡាបាល់ទាត់កម្ពុជាបានពិនិត្យឃើញថា បាលទាត់កម្ពុជាមានការរីកចម្រើននេះ គឺបានមកពីការរួបរួមកម្លាំងពីគ្រប់មជ្ឈដ្ឋានទាំងអស់ ដូច្នេះដើម្បីឆ្លើយតបទៅនឹងការខិតខំប្រឹងប្រែង ការលះបង់ទាំងនេះ សហព័ន្ធកីឡាបាល់ទាត់កម្ពុជា បានត្រៀមខ្លួនដើម្បីរៀបចំគោលនយោបាយថ្មី គឺការរៀបចំការលើកទឹកចិត្តដល់អ្នកដែលបានចូលរួមទាំងនោះ»។

ជាមួយគ្នានេះ ប្រធានសហព័ន្ធកីឡាបាល់ទាត់កម្ពុជាបានរៀបរាប់បន្តទៀតថា តាមរយៈការរៀបចំពានរង្វាន់លើកទឹកចិត្ត កីឡាករ គ្រូបង្វឹក អាជ្ញាកណ្តាល អ្នកគាំទ្រ និងមន្ត្រីសហព័ន្ធ វាមិនត្រឹមតែជាការឆ្លើយតមនៃកិច្ចខិតខំប្រឹងប្រែង និងការថ្លែងអំណរគុណប៉ុណ្ណោះទេ ថែមទាំងជាការបំផុសសកម្មភាព ដើម្បីជួយឲ្យវិស័យកីឡាបាល់ទាត់កម្ពុជាកាន់តែមានការរីកចម្រើន និងមានការគាំកាន់តែច្រើន៕