អន្តរជាតិ
ដោយសារគ្រោះរាំងស្ងួត ក្រុងបាងកកកំណត់ការលេងជះទឹកត្រឹមបីថ្ងៃនៅពេលចូលឆ្នាំ
× ទីក្រុងបាងកកបានសម្រេចកំណត់សកម្មភាពលេងជះទឹករបស់ប្រជាជនក្នុងអំឡុងពេលបុណ្យចូលសង្ក្រានឬបុណ្យចូលឆ្នាំថ្មី ដើម្បីសន្សំទឹកទុក នៅពេលដែលគ្រោះរាំងស្ងួតកំពុងតែវាយប្រហារខេត្តជាច្រើន។ មន្ត្រីប្រចាំទីក្រុងបាងកកនិយាយនៅថ្ងៃទី១៥ ខែមីនាថា ការសម្រេចនេះ គឺដើម្បីបង្ហាញពីសាមគ្គីភាពជាមួយកសិករថៃ ដែលកំពុងតែប្រឈមមុខនឹងគ្រោះរាំងស្ងួតធ្ងន់ធ្ងរក្នុងឆ្នាំនេះ។
សូមស្ដាប់ព័ត៌មានលម្អិត៖
នៅស្របពេលដែលកសិករថៃកំពុងរងគ្រោះដោយគ្រោះរាំងស្ងួត អាជ្ញាធរក្រុងបាងកកបានដាក់កំហិតលើការលេងជះទឹកដ៏មានប្រជាប្រិយភាព ក្នុងពេលបុណ្យសង្ក្រានឬបុណ្យចូលឆ្នាំថ្មីខាងមុខ។ ថៃកំពុងប្រឈមមុខនិងការខ្វះខាតទឹកដ៏អាក្រក់ក្នុងរយៈពេលម្ភៃឆ្នាំចុងក្រោយនេះ ដោយគ្រោះរាំងស្ងួតបានវាយប្រហារខេត្តចំនួន១៤ក្នុងចំណោមខេត្តទាំង៧៦ ហើយផ្ទៃដីកសិកម្មភាគច្រើនប្រឈមមុខនឹងគ្រោះថ្នាក់។
អភិបាលរងក្រុងបាងកកលោក Amorn Kitchawengkul និយាយថា ការលេងជះទឹកអាចធ្វើបានតែបីថ្ងៃចាប់ពីថ្ងៃទី១២ ដល់ថ្ងៃទី១៤ ខែមេសាប៉ុណ្ណោះ ហើយស្រុកទាំង៥០ក្នុងក្រុងបាងកក អាចមានសកម្មភាពជះទឹកត្រឹមម៉ោង៩ល្ងាច។ អភិបាលរងក្រុងរូបនេះបន្ថែមថា យើងមិនចង់ឲ្យអ្នកទីក្រុងជះទឹកដោយអត់ប្រយោជន៍ នៅពេលដែលកសិករកំពុងតែខ្វះខាតទឹកនោះទេ។ បុណ្យចូលសង្ក្រានឬបុណ្យចូលឆ្នាំនៅប្រទេសថៃក្នុងឆ្នាំ២០១៦នេះ មានរយៈពេល៥ថ្ងៃ ចាប់ផ្ដើមពីថ្ងៃទី១២ ដល់ថ្ងៃទី១៧ ខែមេសា។
ការលេងជះទឹកស្ទើរតែក្លាយជាប្រពៃណីរបស់អ្នករស់នៅទីក្រុងបាងកកទៅហើយ នៅរាល់ពេលបុណ្យសង្ក្រានរៀងរាល់ឆ្នាំ។ ល្បែងនេះមានប្រជាប្រិយភាពខ្លាំង និងបានទាក់ទាញអ្នកទេសចរជាច្រើនមកទីក្រុងបាងកក ហើយសកម្មភាពអបអរនេះតែងតែធ្វើរហូតដល់យប់ជ្រៅ។
បើតាម Bangkok Post ការសម្រេចដាក់កំណត់សកម្មភាពជះទឹកដ៏មានប្រជាប្រិយនេះ ធ្វើឡើងបន្ទាប់ពីមានកិច្ចប្រជុំរួមគ្នារវាងសាលាក្រុងបាងកក ក្រសួងទេសចរណ៍ថៃ ប៉ូលិស និងផ្នែកឯកជន។ លោក Amorn និយាយដែរថា វិស័យឯកជនយល់ពីបញ្ហានេះ ហើយនឹងជួយចូលរួមក្នុងវិធានការសន្សំទឹកទុកនេះ ដោយពួកគេនឹងមិនលក់ទឹកទៅក្រុមអ្នកចូលរួមនោះទេ។ នៅរៀងរាល់បុណ្យសង្ក្រាន ការប្រើប្រាស់ទឹក បានកើនឡើងពីតម្រូវការធម្មតាចំនួនបីដង។
ជាមួយគ្នានេះ អាជ្ញាធរក្រុងបាងកក នឹងធ្វើយុទ្ធនាការផ្សព្វផ្សាយពីការសម្រេចខាងលើ ដល់ប្រជាជនទីក្រុងបាងកក ជាពិសេសតំបន់ដែលសម្បូរទេសចរបរទេស។ យុទ្ធនាការនេះធ្វើឡើងក្នុងគោលបំណងដើម្បីឲ្យជនបរទេសយល់ពីស្ថានការខ្វះខាតទឹក និងទទូចឲ្យកាត់បន្ថយការប្រើប្រាស់ទឹកតិចបំផុត៕
Tag:
បាងកក
បុណ្យចូលឆ្នាំ
© រក្សាសិទ្ធិដោយ thmeythmey.com