ជាតិ
នយោបាយជាតិ
សមាជិកគណៈរដ្ឋមន្ត្រី ២៤ រូប ត្រូវបានផ្លាស់ប្តូរ បញ្ចប់តួនាទី និងតែងតាំងថ្មី រូបថតពីហ្វេសប៊ុកសម្តេច ហ៊ុន សែន ពេលកំពុងបើកកិច្ចប្រជុំគណៈរដ្ឋមន្រ្តីកាលពីព្រឹកមិ
× រដ្ឋាភិបាលបានបង្ហាញឈ្មោះគណៈរដ្ឋមន្ត្រីមន្ត្រីដែលខ្លួនបានរុះរើនៅពាក់កណ្តាលអាណត្តិទី ៥ នេះ។ បើតាមលិខិតរបស់សម្តេចនាយករដ្ឋមន្ត្រីដែលផ្ញើជូនសម្តេច ហេង សំរិន កាលពីថ្ងៃទី ១៦ ខែមីនា ដែលលោក ផៃ ស៊ីផាន បង្ហោះនៅលើគណនីហ្វេសប៊ុកផ្ទាល់ខ្លួន សមាជិកគណរដ្ឋមន្ត្រី ដែលត្រូវគណៈរដ្ឋមន្ត្រីរបស់សម្តេច ហ៊ុន សែន បញ្ចប់តួនាទី ផ្លាស់ប្តូរ និងតែងតាំងបន្ថែមទាំង ២៤ រូបនោះ មានឈ្មោះដូចចខាងក្រោម៖
លោក គាត ឈន់ ត្រូវបានរដ្ឋាភិបាលបញ្ចប់មុខងារជាឧបនាយករដ្ឋមន្ត្រីប្រចាំការ តាមសំណើរបស់សាមីខ្លួន ឯលោក ហោ ណាំហុង រដ្ឋាភិបាលបញ្ចប់មុខងារជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ តែរក្សាទុកតំណែងជាឧបនាយករដ្ឋមន្ត្រីដដែល ទៅតាមសំណើរបស់សាមីខ្លួន។ ចំណែក លោក អ៊ឹម ឈុនលឹម បាត់បង់មុខងារ ជាទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ តាមសំណើសាមីខ្លួន។
ដោយឡែករដ្ឋាភិបាលបានតែងតាំងលោក ប្រាក់ សុខុន ជាទេសរដ្ឋមន្ត្រី និងជារដ្ឋមន្ត្រីក្រសួងការបរទេស ស្របពេលដែលលោក អូន ព័ន្ធមុនីរត្ន ឡើងជាទេសរដ្ឋមន្ត្រី និងនៅតែជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដដែល។ គណៈរដ្ឋមន្ត្រីរបស់សម្តេច ហ៊ុន សែន ក៏តែងតាំង លោក ស៊ុន ចាន់ថុល បច្ចុប្បន្នជារដ្ឋមន្ត្រីក្រសួងពាណិជ្ជកម្ម ជាទេសរដ្ឋមន្ត្រី និងឲ្យធ្វើជារដ្ឋមន្ត្រីក្រសួងសាធារណការ និងដឹកជញ្ជូន ជំនួសលោក ត្រាំ អ៊ីវតឹក ដែលលោក អ៊ីវតឹក ត្រូវទៅកាន់តំណែងជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ ហើយលោក ប៉ាន សូរស័ក្តិ ឡើងជារដ្ឋមន្ត្រីក្រសួងពាណិជ្ជកម្មបន្តពីលោក ស៊ុន ចាន់ថុល។
លោក ជា សុផារ៉ា បច្ចុប្បន្នជារដ្ឋមន្ត្រីក្រសួងអភិវឌ្ឍជនបទ ត្រូវតែងតាំងជាទេសរដ្ឋមន្ត្រី និងជារដ្ឋមន្ត្រីក្រសួងដែនដីនគរូបនីយកម្មជំនួសលោក អ៊ឹម ឈុនលឹម។ លោក ហ៊ឹម ឆែម តែងតាំងជាទេសរដ្ឋមន្ត្រី និងជារដ្ឋមន្ត្រីក្រសួងធម្មការ និងសាសនា ឯលោក មិន ឃិន ត្រូវរដ្ឋាភិបាលតែងតាំងជាទេសរដ្ឋមន្ត្រី (ទទួលបន្ទុកបេសកម្មពិសេស)។ ជាមួយគ្នានេះ លោក វេង សាខុន រដ្ឋលេខាធិការក្រសួងធនធានទឹក និងឧត្តុនិយម ត្រូវតែងតាំងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសលោក អ៊ុក រ៉ាប៊ុន ដោយសារតែ លោក អ៊ុក រ៉ាប៊ុន រដ្ឋាភិបាលឲ្យទៅកាន់តំណែងជារដ្ឋមន្ត្រីក្រសួងអភិវឌ្ឍជនបទ បន្តពីលោក ជា សុផារ៉ា។
ដោយឡែកចំពោះតំណែងរដ្ឋលេខាធិការក្រសួងវិញ រដ្ឋាភិបាលបានតែងតាំង លោក ឈិត សុខុន បច្ចុប្បន្នជាអភិបាលខេត្តកំពតប្តូរទៅកាន់តំណែងជារដ្ឋលេខាធិការទីស្តីការគណៈរដ្ឋមន្ត្រី ហើយតែងតាំងលោក ខូយ ឃុនហួរ ជារដ្ឋលេខាធិការទីស្តីការគណៈរដ្ឋមន្ត្រីដែរ។ ចំណែកអតីតប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី ឡើងជារដ្ឋលេខាធិការក្រសួងមហាផ្ទៃ ឯរដ្ឋលេខាធិការក្រសួងមហាផ្ទៃដែលទើបតែងតាំងថ្មីម្នាក់ទៀត គឺលោក ប៉ាវ ហមផាន អតីតអភិបាលខេត្តរតនគិរី។ លោក ជៀង អំ បច្ចុប្បន្នជាអភិបាលខេត្តស្វាយរៀង ក៏ត្រូវរដ្ឋាភិបាលប្តូរតំណែងទៅជារដ្ឋលេខាធិការក្រសួងការពារជាតិ ឯលោក ហាស់ សារ៉េត អតីតអភិបាលខេត្តព្រៃវែង ឡើងជារដ្ឋលេខាធិការក្រសួងកសិកម្ម ហើយលោក អ៊ូ សំអ៊ួន អតីតអភិបាលខេត្តកំពង់ស្ពឺឡើង ជារដ្ឋលេខាក្រសួងអភិវឌ្ឍជនបទ។ លោក ផៃ ប៊ុនឈឿន អតីតអភិបាលខេត្តកណ្តាល តែងតាំងជារដ្ឋលេខាធិការក្រសួងបរិស្ថាន លោក គោស៊ុំ សារឿត បច្ចុប្បន្នជាអភិបាលខេត្តបន្ទាយមានជ័យ ប្តូរមកកាន់តំណែងជារដ្ឋលេខាធិការក្រសួងធនធានទឹក និងឧត្តុនិយម ស្របពេលដែលរដ្ឋាភិបាលតែងតាំងលោក ផែង សុវិជ្ជានោ បច្ចុប្បន្នជាអ្នកនាំពាក្យក្រសួងសាធារណៈការនិងដឹកជញ្ជូន ជារដ្ឋលេខាធិការក្រសួងសាធារណៈការ និងដឹកជញ្ជូន ហើយចុងក្រោយតែងតាំងលោក ជួន វន អតីតអនុរដ្ឋលេខាធិការក្រសួងឧស្សាហកម្ម និងសិប្បកម្ម ឡើងជារដ្ឋលេខាធិការក្រសួងឧស្សាហកម្ម និងសិប្បកម្ម៕
© រក្សាសិទ្ធិដោយ thmeythmey.com