ព័ត៍មានសុខភាព
លាងសម្អាតមុខ ប៉ុន្មានដងក្នុងមួយថ្ងៃ ទើបល្អទៅ?
× មនុស្សគ្រប់គ្នា ប្រាថ្នាចង់បាន មុខស ទន់ និងភ្លឺរលោង។ ដើម្បីបានមុខស្អាតបែបនេះ អ្នកជំនាញជាច្រើន បានណែនាំយើង លាងសម្អាតមុខ ឲ្យបានស្អាត ប៉ុន្តែ យើងមិនធ្លាប់សួរ តបទៅវិញទេថា អញ្ចឹង តើគួរលុបលាងមុខ ប៉ុន្មានដងក្នុងមួយថ្ងៃ ទើបល្អទៅ?
អ្នកជំនាញបានណែនាំថា អ្នកគួរតែលាងសម្អាតមុខ ៖
- មួយថ្ងៃពីរដង សម្រាប់អ្នកដែលមានស្បែកខ្លាញ់ច្រើន
- ម្តងក្នុងមួយថ្ងៃ សម្រាប់អ្នកមានស្បែកស្ងួត។
យ៉ាងណាមិញ ការលាងសម្អាតមុខ ច្រើនដងពេក ពិតជាមិនល្អនោះទេ សម្រាប់សុខភាពស្បែករបស់អ្នក ជាពិសេស អ្នកដែលមានស្បែកស្ងួត។
ការលាងសម្អាតមុខ ច្រើនដងពេក អាចបណ្តាលឲ្យ ៖
- ស្បែករបស់អ្នក កាន់តែស្ងួតលើសដើម
- បាត់បង់សំណើម
- អាលែកស៊ី
- ឡើងកន្ទួលក្រហម
- ស្បែកមុខកាន់តែស្តើង។
ទោះបីជាយ៉ាងណាក៏ដោយ សម្រាប់អ្នកដែលបញ្ហាខ្លាញ់មុខច្រើន អ្នកគួរតែប្រើសាប៊ូលាងមុខ ដែលមានសារធាតុកម្ចាត់ជាតិខ្លាញ់ ហើយព្យាយាមដុសសម្អាត មួយថ្ងៃពីរទៅបីដង។
ចំពោះអ្នកដែលជួបបញ្ហាខូច ឬប្រេះខ្លាំង អ្នកគួរតែលប់ មួយថ្ងៃបីទៅបួនដង ប៉ុន្តែ កុំប្រើផលិតផលអ្វីទាំងអស់ គឺប្រើតែទឹកប៉ុណ្ណោះ។
វិធីលុបលាងមុខ
នៅពេលព្រឹក ក្រោយភ្ញាក់ពីគេង អ្នកគួរតែដុសធ្មេញ និងលាងសម្អាតមុខ ដោយប្រើផលិតផល កម្ចាត់មុន ឬខ្លាញ់ ទៅតាមប្រភេទស្បែករបស់អ្នក ដើម្បីបំបាត់ភាពកខ្វក់ ចេញពីផ្ទៃមុខ ហើយជួយឲ្យអ្នកស្រស់ថ្លា នៅក្នុងអារម្មណ៍។
បន្ទាប់ពីអ្នក ត្រលប់មកពីរៀន ឬធ្វើការវិញ អ្នកគួរតែលុបលាងមុខម្តងទៀត ដើម្បីកម្ចាត់បាក់តេរី និងភាពកខ្វក់ ដែលតោងប្រឡាក់អ្នក ពេញមួយថ្ងៃមកនេះ ហើយយកល្អ អ្នកគួរតែប្រើ ផលិតផលធម្មជាតិៗ។
ក្នុងរដូវក្តៅ អ្នកគួរតែសាកល្បង ប្រើម៉ាសបិទមុខធម្មជាតិ ដែលអ្នកអាចធ្វើដោយខ្លួន ដើម្បីការពារ និងផ្តល់សំណើតដល់ស្បែក។ អ្នកត្រូវចងចាំថា អ្នកអាចលុបមុខច្រើនដងបាន ប៉ុន្តែ មិនត្រូវប្រើសាប៊ូគ្រប់ពេលឡើយ ពីព្រោះ សារធាតុដែលមាននៅក្នុងនោះ នឹងផ្តល់អាក្រក់ ច្រើនជាងផលល្អ ចំពោះសុខភាពស្បែករបស់អ្នក។
ចូរបង្ហូរទឹកត្រជាក់ល្មមៗ ពេលអ្នកលាងមុខ ដើម្បីទទួលអារម្មណ៍ស្រស់ស្រាយ ប៉ុន្តែ សម្រាប់អ្នកដែលមានស្បែកឆាប់ប្រតិកម្ម យកល្អ គួរតែប្រើទឹកអ៊ុនៗ។
ចំណាំ ៖ អំឡុងពេលលាងមុខ មិនត្រូវប្រើរយៈពេល លើសពី ២ នាទីឡើយ ហើយកុំដុសវាខ្លាំង ឬច្រើនដងពេក៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com