អន្តរជាតិ
ហ្វីលីពីន ដោះលែងនាវាដឹកទំនិញកូរ៉េខាងជើងវិញហើយ
× ក្រោមអំណាចនៃសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ហ្វីលីពីន បានរឹបអូស នាវាដឹកទំនិញកូរ៉េខាងជើងមួយគ្រឿងដែលសង្ស័យថាជាប់ពាក់ព័ន្ធជាមួយនឹងរដ្ឋាភិបាលក្រុងព្យុងយ៉ាង។ តែនាវានោះ ត្រូវបានដោះលែងវិញហើយ បន្ទាប់ពីមានការបញ្ជាក់ពីអង្គការសហប្រជាជាតិ។
លោកមេបញ្ជាការ Armand Balilo អ្នកនាំពាក្យទាហានល្បាតសមុទ្រហ្វីលីពីន បានអះអាងថា នាវាដឹកទំនិញកូរ៉េខាងជើង «Jin Teng » ដែលមាននាវិក២១នាក់ផងដែរនោះ បានចាកចេញពីកំពង់ផែហ្វីលីពីនឆ្ពោះទៅកាន់ចិននៅថ្ងៃទី២៤ ខែមីនាវិញហើយ។ ការដោះលែងនេះ ធ្វើឡើងបន្ទាប់ក្រុមប្រឹក្សាសន្តិសុខបានរកឃើញថាមិនមានជាប់ពាក់ព័ន្ធនឹងការគេចពន្ធ។
សូមបញ្ជាក់ផងដែរថា Jin Teng ដែលជានាវាផ្ទុកទំនិញកូរ៉េខាងជើងចំណុះ ៦៨៣០ តោន ត្រូវបាន អាជ្ញាធរហ្វីលីពីន រឹបអូសទុកនៅថ្ងៃទី០៥ ខែមីនា កន្លងទៅ។ ចំណាត់ការនោះ ធ្វើឡើងស្របទៅនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលជាប្រភេទទណ្ឌកម្មថ្មីដ៏ធ្ងន់ធ្ងរបំផុតប្រឆាំងនឹងការសាកល្បងការបាញ់មីស៊ីល និងការអភិវឌ្ឍកម្មវិធីនុយក្លេអ៊ែររបស់កូរ៉េខាងជើង។
សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតលេខ២២៧០ ប្រឆាំងសកម្មភាពដ៏ឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។
សេចក្ដីសម្រេចលេខ២២៧០ ឆ្នាំ២០១៦ ជាសេចក្តីសម្រេចទី៥ ដែលមាន៥២ចំណុចត្រូវបានចាត់ទុកថា ជាប្រភេទទណ្ឌកម្មបន្ថែមដ៏ធ្ងន់ធ្ងរបំផុតលើទណ្ឌកម្មចាស់ ប្រឆាំងនឹងកូរ៉េខាងជើង។ ក្នុងនោះរាល់សមាជិកទាំងអស់ តម្រូវឲ្យមានការត្រួតពិនិត្យលើទំនិញទាំងអស់ដែលនាំចេញនិងនាំចូលពីកូរ៉េខាងជើង មិនថាធ្វើឡើយតាមផ្លូវអាកាសឬសមុទ្រ កំណត់ពីការហាមឃាត់ការនាំចេញធ្យូងថ្ម ដែក មាស និងរ៉ែមានតម្លៃដទៃទៀត ពីកូរ៉េខាងជើងផងដែរ ដែលនេះគឺសំដៅដល់ការកាត់ផ្ដាច់ធនធានហិរញ្ញវត្ថុរបស់ក្រុងព្យុងយ៉ាង។ កូរ៉េខាងជើងទទួលបានចំណូលជាច្រើនលានក្នុងការនាំចេញភោគផលរ៉ែទាំងនេះ ដែលត្រូវប្រើសម្រាប់ការចំណាយរបស់ខ្លួន។
ក្រៅពីនោះ ក្រុមប្រឹក្សាសន្តិសុខក៏ពង្រឹងលើការហាមធ្វើពាណិជ្ជកម្មអាវុធ ជាពិសេសអាវុធធុនស្រាល និងបានអនុញ្ញាតឲ្យឃាត់កប៉ាល់ដែលសង្ស័យថា មានដឹកទំនិញខុសច្បាប់ទៅកូរ៉េខាងជើង។ សូម្បីនាឡិកាទំនើប ដូចជាសម្ភារៈកីឡាក៏ត្រូវបានហាមឃាត់ចូលទៅកូរ៉េខាងជើងផងដែរ ដែលការហាមឃាត់នេះសំដៅដល់ក្រុមមេដឹកនាំជាន់ខ្ពស់កូរ៉េខាងជើង។ លើសពីនេះទៅទៀត ប្រទេសជាសមាជិកអង្គការសហប្រជាជាតិមានសិទ្ធិបណ្ដេញអ្នកការទូត កូរ៉េខាងជើង ដែលពាក់ព័ន្ធនឹងការរត់ពន្ធអាវុធខុសច្បាប់ផងដែរ៕
© រក្សាសិទ្ធិដោយ thmeythmey.com