អន្តរជាតិ
នយោបាយអន្តរជាតិ
តាលីបង់នៅពីក្រោយការបំផ្ទុះគ្រាប់សម្លាប់ ៦៩នាក់នៅប៉ាគីស្ថាន
×
ក្រុមឧទ្ទាមតាលីបង់ប៉ាគីស្ថានបានប្រកាសទទួលខុសត្រូវលើការវាយប្រហារអត្តឃាតនៅទីក្រុងឡាហ័រ ដែលបានសម្លាប់មនុស្ស៦៩នាក់ និងជាង៣០០នាក់ផ្សេងទៀតរងរបួស។ ការវាយប្រហារនេះសំដៅលើក្រុមអ្នកកាន់គ្រិស្តសាសនា ដែលកំពុងប្រារព្ធពិធីបុណ្យ Easter នៅថ្ងៃទី២៧ ខែមីនា។
អ្នកនាំពាក្យក្រុម Tehrik-e-Taliban ដែលជាបណ្ដាញរបស់ក្រុមតាលីបង់ប្រចាំប៉ាគីស្ថាន ចេញមកប្រកាសថាខ្លួននៅពីក្រោយការបំផ្ទុះគ្រាប់បែកនៅសួនសាធារណៈមួយកន្លែងក្នុងទីក្រុងឡាហ័រ ដែលបានសម្លាប់មនុស្ស៦៩នាក់ និងធ្វើឲ្យមនុស្សរងរបួសជាច្រើនរយនាក់ទៀត។ អ្នកនាំពាក្យក្រុមនេះនិយាយថា៖ «យើងទទួលខុសត្រូវលើការវាយប្រហារលើជនគ្រិស្តសាសនិក ដែលកំពុងតែប្រារព្ធបុណ្យរបស់ពួកគេ»។
ការវាយប្រហារនៅល្ងាចថ្ងៃទី២៧ ខែមីនា សម្លាប់មនុស្ស៦៩នាក់ដែលភាគច្រើនជាស្ត្រីនិងកុមារក្នុងទីក្រុងភាគខាងកើតប៉ាគីស្ថានមួយនេះ។ មន្ត្រីសម្របសម្រួលរងប្រចាំទីក្រុងឡាហ័រលោក Usman និយាយថា ក្នុងចំណោមអ្នកស្លាប់ទាំងអស់មានកុមារ២៣នាក់ ហើយកុមារដែលរបួស៥៦នាក់ផ្សេងទៀតត្រូវបានបញ្ជូនទៅមន្ទីរពេទ្យ។
ជាមួយគ្នានេះអធិការរងប៉ូលិសប៉ាគីស្ថានលោក Haider Ashraf និយាយដែរថា ជនបំផ្ទុះគ្រាប់បែកបានបំផ្ទុះខ្លួនឯងនៅចំណតឡានក្បែរច្រកចូលរបស់សួន Gulshan-e-Iqbal ក្នុងក្រុងឡាហ័រ ខេត្តពុនចាប (Punjab)។ លោកបន្តថា ចំណុចផ្ទុះស្ថិតនៅក្បែរកន្លែងក្មេងលេង និងកន្លែងលក់សំបុត្រ ហើយអ្នកបំផ្ទុះរើសចំណុចនេះព្រោះមានមនុស្សច្រើន។ មួយវិញទៀត សួនកម្សាន្តនោះមានមនុស្សច្រើននៅថ្ងៃអាទិត្យ ខណៈជនកាន់សាសនាគ្រិស្តភាគតិចដែលកំពុងប្រារព្ធបុណ្យ Easter ក៏បានទៅទីនោះផងដែរ។
ក្រោយពីការបំផ្ទុះនោះ ទីតាំងសួនកម្សាន្តទាំងអស់ត្រូវបានបិទ ហើយប្រជាជនត្រូវបានណែនាំមិនឲ្យចាកចេញពីផ្ទះនោះទេ។ ម្យ៉ាងវិញទៀត អ្នករបួសជាច្រើនត្រូវដឹកជញ្ជូនដោយឡានតាក់ស៊ី និងរទេះអូសទៅមន្ទីរពេទ្យ ដ្បិតមិនមានឡានសង្គ្រោះបន្ទាន់គ្រប់គ្រាន់នោះទេ។ ចំណែកឯកងទ័ពប៉ាគីស្ថានក៏បានទៅដល់កន្លែងកើតហេតុដើម្បីជួយជនរងគ្រោះផងដែរ។
បន្ទាប់ពីការផ្ទុះ មនុស្សម្នាជាច្រើនបានទៅដល់មន្ទីរពេទ្យ ដើម្បីស្វែងរកបងប្អូនរបស់ពួកគេ ប៉ុន្តែត្រូវបានបញ្ឈប់ដោយមន្ត្រីប៉ូលិសនៅត្រឹមក្លោងទ្វារ ព្រោះមន្ទីរពេទ្យតូចចង្អៀត។ មន្ត្រីប្រចាំតំបន់ក៏បានស្នើរកអ្នកបរិច្ចាគឈាមបន្ទាន់ផងដែរ សម្រាប់អ្នករងគ្រោះដែលខ្វះខាតឈាម និងផ្ដល់មធ្យោបាយសម្រួលដល់អ្នកដែលចង់បរិច្ចាគផងដែរ៕
Tag:
ប៉ាគីស្ថាន
តាលីបង់
ឡាហ័រ
© រក្សាសិទ្ធិដោយ thmeythmey.com