អន្តរជាតិ
រុស្សីជួយស៊ីរីដណ្ដើមបានទីក្រុងបុរាណ Palmyra ពីក្រុមរដ្ឋឥស្លាម
× កងកម្លាំងស៊ីរីបានដណ្ដើមបានទីក្រុងបុរាណ Palmyra ពីក្រុមជ្រុលនិយមរដ្ឋឥស្លាមឬដែស្ហ ក្រោយពីក្រុមនេះបានកាន់កាប់ទីតាំងបុរាណនេះតាំងពីឆ្នាំ២០១៥មក។ កងទ័ពស៊ីរី ដោយមានការគាំទ្រពីកងកម្លាំងអាកាសរបស់រុស្សី បានបើកការវាយប្រហារយ៉ាងខ្លាំងលើមូលដ្ឋានរបស់ក្រុមរដ្ឋឥស្លាមក្នុងប្រតិបត្តិការជាងមួយខែមកនេះ ក្នុងការកាន់កាប់តំបន់បេតិកភណ្ឌរបស់ UNESCO ឡើងវិញ។
ដោយមានជំនួយពីកម្លាំងទ័ពអាកាសរុស្សី កងកម្លាំងស៊ីរីបានដណ្ដើមត្រលប់មកវិញទីក្រុងបុរាណ Palmyra ក្នុងការប្រយុទ្ធយ៉ាងខ្លាំងរវាងទាហានរដ្ឋាភិបាល និងក្រុមជ្រុលនិយមរដ្ឋឥស្លាមឬក្រុមដែស្ហ (Daesh) ។ ការវាយប្រយុទ្ធគ្នានៅសមរភូមិPalmyra ធ្វើឲ្យក្រុមរដ្ឋឥស្លាមខូចខាតយ៉ាងខ្លាំង ដោយបានបាត់បង់សកម្មជនរបស់ខ្លួនជាច្រើនក្នុងសមរភូមិនេះ។
ទីបញ្ជាការយោធាស៊ីរីនិយាយថា កងកម្លាំងរបស់ខ្លួនបានដណ្ដើមកាន់កាប់ Palmyra នៅថ្ងៃទី២៧ ខែមីនា ក្រោមការគាំទ្រដោយការវាយប្រហារផ្លូវអាកាសរបស់កម្លាំងរុស្សីនិងស៊ីរីផ្ទាល់។ ជ័យជម្នះលើកនេះ គឺជាការបើកផ្លូវទៅទិសខាងកើតសំដៅមូលដ្ឋានរឹងមាំរបស់ក្រុមជ្រុលនិយមរដ្ឋឥស្លាមទីក្រុងRaqqa និងDeir al-Zor។ ជាមួយគ្នានេះ ការបាត់បង់ទីក្រុង Palmyra ក៏ជាការវាយប្រហារដ៏ធ្ងន់លើក្រុមជ្រុលនិយម ចាប់តាំងពីការប្រកាសបង្កើតរដ្ឋមួយនៅឆ្នាំ២០១៤។
ទាក់ទិននឹងការប្រយុទ្ធនៅ Palmyra ក្រុមអង្កេតការណ៍សិទ្ធិមនុស្សស៊ីរីនិយាយថា ក្រុមរដ្ឋឥស្លាមបានបាត់បង់យុទ្ធជនរបស់ខ្លួនយ៉ាងតិច៤០០នាក់ ខណៈដែលខាងកងកម្លាំងរដ្ឋាភិបាលស៊ីរីមានចំនួនអ្នកស្លាប់១៨៨នាក់។
ជាការពិតណាស់ ការគាំទ្ររបស់កងកម្លាំងរុស្សីដល់ស៊ីរី បានដាក់ទម្ងន់យ៉ាងខ្លាំងដល់ក្រុមរដ្ឋឥស្លាមដែលកំពុងតែបរាជ័យនាពេលកន្លងមក ជាក់ស្ដែងនោះគឺប្រតិបត្តិការនៅទីក្រុងបុរាណ Palmyra ដែលជាសម្បត្តិបេតិកភណ្ឌពិភណលោកនេះតែម្ដង។ បើទោះជាលោក ពូទីន ប្រកាសដកកងកម្លាំងត្រលប់មកវិញមួយភាគធំក៏ដោយ រុស្សីបន្តរក្សាកម្លាំងអាកាសមួយចំនួនទៀត ដើម្បីជួយរដ្ឋាភិបាលលោក អាសាដ ប្រយុទ្ធនឹងក្រុមជ្រុលនិយម។
ទីភ្នាក់ងារព័ត៌មាន Reuters ផ្សាយថា ប្រធានាធិបតីស៊ីរីលោក អាសាដ បាននិយាយទូរសព្ទជាមួយសមភាគីរុស្សីលោក វ្ល៉ាឌីមៀរ ពូទីន នៅក្រោយការដណ្ដើមបានPalmyraបានមកវិញ ។ ដោយលោកបញ្ជាក់ថា ការគាំទ្ររបស់រុស្សីបានដើរតួយ៉ាងសំខាន់ក្នុងការដណ្ដើម Palmyra ហើយទីក្រុងនេះនឹងត្រូវកសាងឡើងវិញផងដែរ។
សូមរម្លឹកដែរថា ទីក្រុងបុរាណ Palmyra ត្រូវបានក្រុមរដ្ឋឥស្លាមដណ្ដើមកាន់កាប់កាលពីឆ្នាំ២០១៥ និងបានបើកយុទ្ធនាការបំផ្លាញសម្បត្តិបេតិកភណ្ឌUNESCO។ សំណង់មួយចំនួននៅទីនោះត្រូវបានកម្ទេច ដែលសកម្មភាពនោះត្រូវបាន UNESCO ចាត់ទុកជាឧក្រិដ្ឋកម្មសង្គ្រាម។ លើសពីនោះPalmyra ក៏ក្លាយជាវាលពិឃាតសម្រាប់ក្រុមរដ្ឋឥស្លាមសម្លាប់មនុស្សជាសាធារណៈផងដែរ៕
Tag:
ស៊ីរី
ក្រុមរដ្ឋឥស្លាម
Palmyra
© រក្សាសិទ្ធិដោយ thmeythmey.com