អន្តរជាតិ
មេយោធាមីយ៉ាន់ម៉ា សន្យាធ្វើការជាមួយរដ្ឋាភិបាលថ្មី តែតួនាទីយោធានៅតែជាតួនាទីនាំមុខ
× នៅសល់តែប៉ុន្មានថ្ងៃទៀតតែប៉ុណ្ណោះ រដ្ឋាភិបាលថ្មីមីយ៉ាន់ម៉ាដែលនឹងត្រូវដឹកនាំដោយលោកប្រធានាធិបតីត្រៀមកាន់តំណែងនៃបក្សសម្ព័ន្ធជាតិដើម្បីប្រជាធិបតេយ្យ ធិន ច នឹងត្រូវចាប់ផ្តើមនីតិកាលថ្មីហើយ ។ ស្របជាមួយនឹងដំណើរការនេះ ប្រមុខយោធាដែលជាស្ថាប័នកំពូលមីយាន់ម៉ា លោក មិន អ៊ុងឡាំង ក៏បានផ្ញើសារទៅរដ្ឋាភិបាលថ្មីដោយសន្យាសហការជាមួយ តែតូនាទីយោធានៅតែជាតួនាទីនាំមុខ។
លោកមេបញ្ជាការកងទ័ពមីយ៉ាន់ម៉ា មិន អ៊ុងឡាំង (Min Aung Hlaing) បានប្រកាសថាយោធានឹងធ្វើកិច្ចសហប្រតិបត្តិការ ជាមួយនឹងរដ្ឋាភិបាលថ្មី ដែលនឹងត្រូវចាប់ផ្តើមនៅថ្ងៃទី០១ខែមេសាខាងមុខ ដើម្បីសម្រេចឲ្យបានជោគជ័យក្នុងការបម្រើផលប្រយោជន៍ប្រទេសជាតិ និងប្រជាជន។ សេចក្តីប្រកាសនេះ ធ្វើឡើងក្នុងឱកាសនៃខួបលើកទី៧១នៃការបង្កើតកងទ័ពមីយ៉ាន់ម៉ាដែលមានទាំងការធ្វើព្យុហយាត្រាផងដែរនោះ។
នៅចំមុខយោធាជាច្រើននាក់ ប្រមុខកំពូលយោធា បានផ្ញើសារទាំងវិជ្ជមានផង និងក្រើនរម្លឹកផងទៅកាន់រដ្ឋាភិបាលថ្មីដែលជារដ្ឋាភិបាលស៊ីវិលដំបូងដឹកនាំប្រទេសក្នុងរយៈពេល៥ទសវត្សរ៍ចុងក្រោយ ។ លោក មិន អ៊ុងឡាំង បានសង្កត់ធ្ងន់ថា យោធា នឹងការពារប្រទេស ធានាពីសន្តិសុខសាធារណៈនិង ជំរុញប្រតិបត្តិការរបស់រដ្ឋាភិបាលសម្រាប់ដំំណើរការអភិវឌ្ឍន៍ប្រទេស។ ហើយ លោកបន្ថែមថា លោក នឹងមិនអនុញ្ញាតឲ្យមីយ៉ាន់ម៉ាដើរថយក្រោយវិញឡើយ។
ស្របជាមួយនឹងគ្នានោះដែរ លោក ក៏បានក្រើនរម្លឹក និងបញ្ជាក់ពីតួនាទីដែលមិនអាចខ្វះបាននៃក្រុមយោធានៅក្នុងនយោបាយមីយ៉ាន់ម៉ា។ លោក ថា យោធា គឺមានតួនាទីនាំមុខនៅក្នុងនយោបាយជាតិ ពោលគឺក្រុមយោធា នៅតែបន្តតួនាទីស្នូលនៃកិច្ចការមីយ៉ាន់ម៉ា។ លោក បានលើកពីឧបសគ្គពីរនៃដំណើរការឆ្ពោះទៅរកលទ្ធិប្រជាធិបតេយ្យ។ ទី១នោះគឺ កម្សោយនៃការគោរពបទបញ្ជា និងច្បាប់។ ទី២នោះគឺ ក្រុមទាហានឧទ្ទាម នៅតែបន្តកើតមាន។
ប្រមុខយោធា សង្កត់ធ្ងន់ថា «ឧបសគ្គទាំងពីរនេះហើយ ដែលអាចធ្វើឲ្យលទ្ធិប្រជាធិបតេយ្យរញ៉ែរញ៉ៃ។ ប្រសិនបើយើងអាចដោះស្រាយបញ្ហាទាំងនេះបានហើយ នោះដំណើរការនៃលទ្ធិប្រជាធិបតេយ្យ នឹងប្រព្រឹត្តឡើងដោយរលូន»។ ការលើកឡើងនេះ បានបង្ហាញឲ្យឃើញច្បាស់ហើយថា យោធាមិនអាចស្ថិតក្រោមអ្នកនយោបាយបានឡើយ។
ហេតុអ្វីយោធាមានឥទ្ធិពលម្ល៉េះក្នុងនយោបាយមីយ៉ាន់ម៉ា?
គិតចាប់ពីរដ្ឋប្រហារយោធាឆ្នាំ១៩៦២ ពោលគឺរយៈពេល៥ទសវត្សរ៍កន្លងទៅនេះ មីយ៉ាន់ម៉ា ត្រូវបានដឹកនាំដោយយោធា។ គ្រប់វិស័យទាំងអស់សុទ្ធសឹងតែកាន់កាប់ដោយមេដឹកនាំយោធា។ ការគ្រប់គ្រងប្រទេសដ៏ច្រើនទសវត្សរ៍ រួមជាមួយនឹងភូមិសាស្ត្រនយោបាយស្មុគស្មាញផងដែរនោះ បានជំរុញឲ្យក្រុមយោធា ចាក់ឬសអំណាចខ្លួនទៅក្នុងនយោបាយមីយ៉ាន់ម៉ាយ៉ាងជ្រៅ។ ភូមិសាស្ត្រនយោបាយមីយ៉ាន់ម៉ា សំដៅលើភាពចម្រុះគ្នានៃជាតិសាសន៍ និងក្រុមឧទ្ទាមដែលយាយី និងបង្កជម្លោះដែល ទាមទារឲ្យយោធាត្រូវសកម្មដើម្បីទប់ទល់ និងគ្រប់គ្រងស្ថានភាពក្នុងប្រទេសឲ្យមានសុវត្ថិភាព។
ជាមួយគ្នានេះ រដ្ឋធម្មនុញ្ញមីយ៉ាន់ម៉ាឆ្នាំ២០០៨ ដែលធ្វើដោយក្រុមយោធា បានផ្តល់អំណាចឯករាជ្យ និងស្វ័យសម្រេចទៅឲ្យយោធា។ ជាពិសេសនោះ គឺការផ្តល់អាសនៈ២៥ភាគរយទៅឲ្យយោធាដោយ ស្វ័យប្រវត្តិ ដែលអាសនៈនេះហើយ ដែលបានរារាំងម្ចាស់ពានរង្វាន់សន្តិភាពណូបែល និងមេដឹកនាំលទ្ធិប្រជាធិបតេយ្យលោកស្រីអ៊ុងសាន ស៊ូជី ជាប្រធានាធិបតីមីយ៉ាន់ម៉ាបាន បើទោះបីជាលោកស្រី ជាមេបក្សឈ្នះឆ្នោតក៏ដោយ។
ជារួម ហេតុផលសំខាន់ដែលក្រុមយោធាលើកឡើងដើម្បីរក្សាឥទ្ធិពលនៅក្នុងនយោបាយមីយ៉ាន់ម៉ា នោះគឺមីយ៉ាន់ម៉ា មិនទាន់មានសន្តិសុខពេញលេញនោះឡើយនោះទេ។ ដូច្នេះ យោធាត្រូវតែមាន អំណាចដើម្បីអាចឆ្លើយតបភ្លាមៗជាមួយនឹងក្រុមឧទ្ទាមប្រដាប់អាវុធដែលតែងតែប៉ះទង្គិចជាមួយនឹង ក្រុមរដ្ឋាភិបាលជារឿយៗក្នុងការបំពេញមហិច្ឆតាកាប់កាន់ទឹកដោយស្វ័យភាពនោះ៕
© រក្សាសិទ្ធិដោយ thmeythmey.com