ខណៈពេលនេះ បងប្អូនកូរ៉េទាំងពីរ កំពុងតែបង្ហាញសាច់ដុំឌឺដងដាក់គ្នាតាមរយៈការធ្វើសមយុទ្ធយោធា ទ្រង់ទ្រាយធំ ក៏ដូចជាកំពុងតែធ្វើសង្គ្រាមពាក្យសម្តីដោយគំរាមកម្ទេចគ្នាទៅវិញទៅមកផងដែរ។ ស្រប ភាពតានតឹងនេះ ក្រុមសកម្មជនអភិរក្សកូរ៉េខាងត្បូង បានបង្ហោះប៉េងប៉ោងដោយភ្ជាប់ជាមួយ នឹងខិត្ត ប័ណ្ណប្រឆាំងកូរ៉េខាងជើងតាមព្រំដែនទៀតផង។
ក្រុមសកម្មជនកូរ៉េខាងត្បូងជាច្រើននាក់ នៅថ្ងៃទី២៨ ខែមីនានេះ បានធ្វើយុទ្ធនាការប្រឆាំងរបបក្រុង ព្យុងយ៉ាងតាមរយៈការបង្ហោះប៉េងប៉ោងដោយចងខិត្តប័ណ្ណប្រមាណ១០ម៉ឺនសន្លឹកដែលបានបញ្ជាក់ និងរិះគន់ការដឹកនាំរបស់លោកគីម ជុងអ៊ុននៅតាមព្រំដែន។ សកម្មភាពនេះ ត្រូវបានធ្វើឡើងពីរដងហើយក្នុងរយៈពេលត្រឹមបីថ្ងៃចុងក្រោយតែប៉ុណ្ណោះ។
«បាញ់កម្ទេចមនុស្សឆ្កួតនឹងនុយក្លេអ៊ែរ គីម ជុងអ៊ុន ឬ យើង ចង់បានក្បាលរបស់លោកគីម ជុងអ៊ុន»។ ទាំងនេះ គឺជាពាក្យស្លោកដែលក្រុមសកម្មជនកូរ៉េខាងត្បូង បានសរសេរក្នុងខិត្តប័ណ្ណដែលបានស្រង់ ដោយភ្នាក់ងារព័ត៌មាន AFP ដែលបានបន្ថែមដែរថា ក្រុមសកម្មជន ក៏គ្រោងនឹងបង្ហោះខិត្តប័ណ្ណ១០លានសន្លឹកបន្ថែមទៀតនៅរយៈពេលបីខែខាងមុខ។
តាមពិតទៅសកម្មភាពទាំងនេះ ត្រូវបានធ្វើឡើងជាញឹកញាប់មកហើយ។ តែលើកនេះ ការបង្ហោះខិត្តប័ណ្ណ គឺស្របជាមួយនឹងភាពតានតឹងរវាងប្រទេសទាំងពីរ។ ហើយប្រាកដណាស់ មេដឹកនាំកំពូល កូរ៉េខាងជើង លោក គីម ជុងអ៊ុន ប្រហែលជាក្តៅក្រហាយមិនតិចទេ ដ្បិតមេដឹកនាំកូរ៉េទាំងពីរកំពុង ឌឺដងក្នុងការវាយកម្ទេចគ្នាស្រាប់ផងដែរនោះ។
នៅថ្ងៃទី២៦ ខែមីនា រដ្ឋាភិបាលក្រុងព្យុងយ៉ាង បានគំរាមបាញ់គ្រាប់ផ្លោងចម្ងាយឆ្ងាយទៅកាន់ក្រុងសេអ៊ូល ប្រសិនបើលោកស្រីប្រធានាធិបតីកូរ៉េខាងត្បូងផាក ហ្គឺនហេ (Park Geun-hye) មិនសុំអភ័យទោស និងដាក់ទោសចំពោះអ្នកដែលបានរៀបចំគម្រោងផ្តួលរំលំរបបដឹកនាំកូរ៉េខាងជើង ។
ក្នុងលិខិតព្រមានដដែលនោះ ក៏បានទទូចឲ្យលោកស្រីផាក និងរដ្ឋបាលរបស់លោកស្រី ដាក់ទោសជនទាំងឡាយណាដែលរៀបចំប្រតិបត្តិការកម្ទេចកូរ៉េខាងជើង និងបញ្ចប់ដោយគ្មានមេត្តា។ ជាពិសេសនោះ លិខិតនោះក៏បានបញ្ជាក់ដែរថា ប្រសិនកូរ៉េខាងត្បូង មិនឆ្លើយតបនឹងការទទូចនោះទេ នោះគ្រាប់ផ្លោងរបស់ទាហានកូរ៉េខាងជើង នឹងចេញសកម្មភាពរបស់ខ្លួនហើយ។
សូមបញ្ជាក់ផងដែរថា ប៉ុន្មានថ្ងៃចុងក្រោយនេះ កូរ៉េខាងជើង បានធ្វើសមយុទ្ធយោធាទ្រង់ទ្រាយធំ និង ថែមទាំងព្រមានកម្ទេចវិមានប្រធានាធិបតីកូរ៉េខាងត្បូងលោកស្រីផាក ហ្គឺនហេម្តងហើយម្តងទៀត។ ហើយសកម្មភាពរបស់កូរ៉េខាងជើងទាំងនេះ ធ្វើឡើងដើម្បីឆ្លើយតបទៅនឹងសមយុទ្ធយោធាប្រចាំឆ្នាំរវាងអាមេរិក និងកូរ៉េខាងត្បូងដែលកូរ៉េខាជើង ចោទថាជាសកម្មភាពបំផ្លាញសន្តិភាព។
មួយវិញទៀត ការឈានមកដល់ការដាក់ឱសានវាទនៃការសុំអភ័យទោសរបស់កូរ៉េខាងជើង ធ្វើឡើង ក្រោយពីកូរ៉េខាងត្បូងប្រតិកម្មតបនឹងការគំរាមកូរ៉េខាងជើងដោយវាយបកក្រុងព្យុងយ៉ាងដោយគ្មាន ក្តីមេត្តា។ « ប្រសិនបើក្រុងព្យុងយ៉ាង ធ្វើសកម្មភាពបង្ករឿងណាមួយ កងទ័ពកូរ៉េខាងត្បូងនឹងវាយបកភ្លាមៗនិង គ្មានក្តីមេត្តាឡើយ។» នេះគឺការឆ្លើយតបរបស់កូរ៉េខាងត្បូងដែលចេញដោយក្រសួងរួបរួមក្រុងសេអ៊ូល នៅថ្ងៃទី២៣ ខែមីនាកន្លងទៅ៕