អន្តរជាតិ
តួកុនកូរ៉េក្នុងរឿង Descendants of the Sun នឹងទៅជួបលោកប្រាយុទ្ធនៅថៃ
×
តារាភាពយន្តកូរ៉េខាងត្បូង Song Joong-ki ដែលជាតួឯកក្នុងរឿងភាគ «Descendants of the Sun» នឹងទៅបំពេញទស្សនកិច្ចនៅប្រទេសថៃ តាមការអញ្ជើញរបស់អាជ្ញាធរទេសចរណ៍ជាតិថៃ (TAT)។ តារាសម្តែងរូបនេះ នឹងមានជំនួបជាមួយលោកនាយករដ្ឋមន្ត្រី ប្រាយុទ្ធ ចាន់អូចា ដែលជាអ្នកគាំទ្ររឿង «Descendants of the Sun» ដ៏ស្មោះស្ម័គ្រម្នាក់ផងដែរ។ នេះបើតាមការផ្សាយរបស់កាសែត The Nation។
ចាប់តាំងពីការចាក់បញ្ចាំងនៅថ្ងៃទី២៤ ខែកុម្ភៈមក ភាពយន្តរឿង «Descendants of the Sun» បានទទួលភាពល្បីល្បាញ និងការគាំទ្រយ៉ាងខ្លាំងនៅកូរ៉េខាងត្បូង និងចិន រួមទាំងបណ្តាប្រទេសផ្សេងទៀតនៅអាស៊ី ដែលក្នុងនោះលោកនាយករដ្ឋមន្ត្រីថៃ ប្រាយុទ្ធ ចាន់អូចា បានសំណូមពរដល់ពលរដ្ឋខ្លួនឲ្យមើលរឿងដែលបង្ហាញពីវីរភាពរបស់ទាហានចំពោះប្រទេសជាតិបែបនេះ។
កាសែត The Nation បានអះអាងថា អាជ្ញាធរទេសចរណ៍ជាតិថៃ (TAT) ក្រោមកិច្ចសហការជាមួយស្ថាប័នទទួលបន្ទុកទេសចរណ៍កូរ៉េ (KTO) បានជួយសម្រួលឲ្យមានជំនួបរវាងតារាភាពយន្ត Song Joong-ki និងលោកប្រាយុទ្ធ ចាន់អូចា នៅក្នុងប្រទេសថៃ។
រឿងដែលកំពុងមានប្រជាប្រិយភាព និងទាក់ទាញលោកប្រាយុទ្ធ យ៉ាងខ្លាំងនេះ គឺនិយាយពីជីវិតរបស់ទាហានដែលបំពេញបេសកកម្មសន្តិភាពនៅក្នុងប្រទេស សិប្បនិម្មិតមួយ ហើយនាយទាហាននៅក្នុងសាច់រឿងបានធ្វើពលីកម្មគ្រប់បែបយ៉ាងដើម្បី មនុស្សជាតិ។
ជាមួយគ្នានេះផងដែរ ឧបនាយករដ្ឋមន្ត្រីថៃ Somkid Jatusripitak បានបញ្ជាក់ថា ទស្សនកិច្ចរបស់តារាភាពយន្តកូរ៉េខាងត្បូងនេះសប្តាហ៍ខាងមុខនេះ នឹងជួយសម្រួលដល់កិច្ចសហការរបស់អ្នកជំនាញនៃប្រទេសទាំងពីរក្នុងផលិតភាពយន្តដែលមានលក្ខណៈស្នេហាជាតិ ខណៈថៃ និងកូរ៉េខាងត្បូងមានទំនាក់ទំនងល្អជាមួយគ្នា៕
អានអត្ថបទដែលទាក់ទង៖
http://www.thmeythmey.com/?page=detail&ctype=article&id=37800&lg=kh
Tag:
Descendants of the Sun
© រក្សាសិទ្ធិដោយ thmeythmey.com