អន្តរជាតិ
រៀបចំពិធីទទួលសញ្ញាបត្រក្រៅផ្លូវការដើម្បីឲ្យឪពុកបានឃើញមុនគាត់លាចាកលោក
×
ដោយដឹងថា៤ទៅ៥ថ្ងៃទៀត ឪពុកត្រូវទទួលមរណភាពដោយសារជំងឺមហារីកឈាមដំណាក់កាលចុងក្រោយ នារីវ័យក្មេងឈ្មោះ Bethany ដែលរស់នៅក្នុងរដ្ឋ Michigan បានរៀបចំពិធីទទួលសញ្ញាបត្រក្រៅផ្លូវការមួយនៅក្បែរគ្រែរបស់ឪពុក ដោយមានវត្តមានផងដែរពីគ្រូប្រចាំសាលា។
Bethany អាយុ១៨ឆ្នាំ និងអ្នកស្រី Melissa ដែលជាម្តាយ ដែលរស់នៅក្រុង Rockford រដ្ឋ Michigan បានសម្រេចចិត្តស្នើសុំទៅសាលា Rockford Public Schools ឲ្យរៀបចំធ្វើសញ្ញាបត្រមុនពេលកំណត់ដល់ Bethany។ ហេតុផលសំខាន់នោះ គឺអ្នកទាំងពីរចង់ឲ្យលោក Bob Chambers ដែលជាស្វាមី និងឪពុក បានឃើញជាលើកចុងក្រោយនូវថ្ងៃដ៏ពិសេសរបស់កូនស្រី មុនពេលលោកលាចាកលោកទៅ។
លោក Bob Chambers អាយុ៥១ឆ្នាំ ត្រូវបានពិនិត្យឃើញថា មានជំងឺមហារីកឈាមកាលពីចំឡុងខែមិថុនា ឆ្នាំ២០១៥ ហើយទើបឈានដល់ដំណាក់កាលចុងក្រោយកាលពីពេលថ្មីៗកន្លងមកនេះ។
តាមការផ្សាយរបស់សារព័ត៌មានថ្នាក់តំបន់ WoodTV លោក Bob ដែលគេងសន្ធឹងលើគ្រែបានមានប្រសាសន៍ថា៖ «ខ្ញុំដឹងថានិយាយយ៉ាងម៉េចនោះឡើយ តែវាមានន័យខ្លាំងណាស់សម្រាប់ខ្ញុំ»។
ដំបូងឡើយ អ្នកស្រី Melissa និង Bethany ចង់បានតែសន្លឹកសញ្ញាបត្រប៉ុណ្ណោះ ប៉ុន្តែខាងសាលាបានឆ្លើយតបវិញថា ពួកគេជួយរៀបចំឲ្យលើសពីនេះ។ គ្រាន់តែប៉ុន្មានម៉ោងក្រោយប៉ុណ្ណោះ សាលាបានរៀបចំសម្លៀកបំពាក់ដល់ Bethany រួមទាំងវត្តមានគ្រូបង្រៀន គ្រូបង្វឹកនាពិធីចែកសញ្ញាបត្រនៅក្បែរគ្រែរបស់លោក Bob។
លោកបណ្ឌិត Mike Shibler ថ្នាក់ដឹកនាំម្នាក់របស់សាលា Rockford Public Schools បានមានប្រសាសន៍ថា នេះជាពេលវេលាដ៏ល្អក្នុងការរៀបចំពិធីសម្រាប់គ្រួសារមួយនេះ។ វាជាអនុស្សាវរីយ៍ចុងក្រោយរបស់បុរសម្នាក់ក្នុងការមើលថ្ងៃដ៏ពិសេសមួយរបស់កូន។
៤ថ្ងៃក្រោយមក ពោលគឺចំថ្ងៃអាទិត្យ ទី២០ ខែមីនា លោក Bob បានទទួលមរណភាព ដោយអ្នកស្រី Melissa បានអះអាងថា ស្វាមីរបស់ខ្លួនចាកចេញទៅដោយសុខស្ងប់៕
© រក្សាសិទ្ធិដោយ thmeythmey.com