អន្តរជាតិ
ចិន ទទូចជប៉ុនគិតគូររឿងស្ថិរភាពក្នុងតំបន់ ក្រោយជប៉ុនដំឡើងរ៉ាដាស៊ើបការណ៍ក្បែរតំបន់ជម្លោះ
× រដ្ឋាភិបាលក្រុងប៉េកាំង ព្រួយបារម្ភពីសកម្មភាពថ្មីរបស់រដ្ឋាភិបាលក្រុងតូក្យូក្នុងការដំឡើងប្រព័ន្ធរ៉ាដា ស៊ើបការណ៍ដែលស្ថិតមិនឆ្ងាយពីកោះរបស់ចិនប៉ុន្មាននោះទេ។ ជាមួយគ្នាក្រុងប៉េកាំងសង្ឃឹមថាសកម្ម ភាពនោះ នឹងប៉ះពាល់ដល់សន្តិភាព និងស្ថិរភាពនៅក្នុងតំបន់ផងដែរ។
« ចិន មានគោលជំហរច្បាស់លាស់ និងមិនប្រែប្រួលលើបញ្ហាសមុទ្រខាងកើត និងបញ្ហាកោះ Diaoyu ហើយ ចិន សង្ឃឹមថា ជប៉ុន អាចធ្វើសកម្មភាពច្រើនដែលជួយធានាដល់សន្តិភាព និងស្ថិរភាពនៅក្នុង តំបន់»។ នេះជាលើកឡើងរបស់អ្នកនាំពាក្យក្រសួងការបរទេសចិនលោក Hong Lie នៅថ្ងៃទី២៨ ខែ មីនា ម្សិលមិញ ក្នុងឱកាសនៃការធ្វើសន្និសីទប្រចាំថ្ងៃ។
ការលើកឡើងនេះ ធ្វើឡើងដើម្បីឆ្លើយតបទៅនឹងរបាយការណ៍ដែលបញ្ជាក់ថាជប៉ុន បានដំឡើងប្រព័ន្ធរ៉ាដាស៊ើបការណ៍នៅលើកោះ Yonaguni។ ប្រព័ន្ធរ៉ាដានោះ គឺជាមូលដ្ឋានកងទ័ពស្វ័យការពារ ដែលមានទីតាំងស្ថិតនៅចម្ងាយត្រឹមតែ១៥០គីឡូម៉ែតពីកោះ Diaoyu នៃប្រទេសចិនតែប៉ុណ្ណោះ។
ជុំវិញបញ្ហានេះ ក្រសួងការពារជាតិចិន បានទទូចឲ្យសហគមន៍អន្តរជាតិត្រូវចាប់អារម្មណ៍ពីសកម្ម ភាពនៃការពង្រីកឥទ្ធិពលយោធារបស់ជប៉ុនផងដែរ ។ នេះបើយោងតាមភ្នាក់ងារព័ត៌មាន Reuters ដែលបានដកស្រង់ចេញពីសេចក្តីថ្លែងការណ៍នៃក្រសួងនោះ ដែលបានបន្ថែមដែរថា កោះ Diaoyu គឺស្ថិតនៅក្នុង អធិបតេយ្យរបស់ចិន ហើយ ចិនពិតជាប្រឆាំងដាច់ខាតចំពោះសកម្មភាពបង្ករឿង របស់ជប៉ុននៅក្បែរតំបន់អធិបតេយ្យរបស់ខ្លួន។
បើទោះបីជា ប្រព័ន្ធរ៉ាដា មិនបានបំពាក់ទៅក្នុងអធិបតេយ្យចិនក៏ដោយ បញ្ហាដែលចិន ប្រតិកម្មខ្លាំងនោះគឺ ទីតាំងបំពាក់នោះ ស្ថិតនៅក្បែរទាំងកោះចិន និងតំបន់ជម្លោះរវាងចិន និងជប៉ុនទៀតផង។ តំបន់ជម្លោះនោះគឺ កោះស៊ិនកាគុ ដែលជាតំបន់ជម្លោះសមុទ្រខាងកើតរវាងប្រទេសទាំងពីរជាច្រើន ទសវត្សរ៍មកហើយ។
សូមបញ្ជាក់ផងដែរថា រយៈពេលចុងក្រោយនេះ ចិន ហាក់ដូចជាមានបញ្ហាប្រឈមនឹងបណ្តាប្រទេស ជិតខាងច្រើនទាក់ទងនឹងជម្លោះអធិបតេយ្យ។ ហើយបញ្ហាទាំងនោះ រួមមានជម្លោះសមុទ្រខាងកើត ជាមួយនឹងជប៉ុន និងជម្លោះសមុទ្រចិនខាងត្បូងជាមួយនឹងព្រុយណេ ម៉ាឡេស៊ី ហ្វីលីពីន វៀតណាម និង តៃវ៉ាន់៕
© រក្សាសិទ្ធិដោយ thmeythmey.com