និស្សិតខ្មែររៀននៅប្រទេសអារ៉ាប់ធ្វើខ្លោងទ្វាររូបអង្គរវត្តតាំងបង្ហាញក្នុងពិធីតាំងពិព័រណ៍

ជាតិ

និស្សិតខ្មែររៀននៅប្រទេសអារ៉ាប់ធ្វើខ្លោងទ្វាររូបអង្គរវត្តតាំងបង្ហាញក្នុងពិធីតាំងពិព័រណ៍

30, Mar 2016 , 10:15 am

រូបភាព

ដោយ: អុីសា រ៉ហានី (Isa Rohany)

ក្រុមនិស្សិតខ្មែរឥស្លាម ដែលកំពុងសិក្សានៅប្រទេសអារ៉ាប៊ីសាអូឌីត បានរៀបចំធ្វើខ្លោងទ្វាររូបប្រាសាទអង្គរវត្ត ដើម្បីតាំងបង្ហាញស្នាដៃក្នុងពិធីតាំងពិព័រណ៍ប្រចាំឆ្នាំរបស់ខ្លួន។ ពិព័រណ៍ប្រចាំឆ្នាំ ដែលរៀបចំឡើងដោយសាលា គឺមានប្រទេសចំនួន៥៧ ចូលរួម។

ក្រុមនិស្សិតដែលកំពុងសិក្សានៅសាកលវិទ្យាល័យ ម៉ាឌីណាស់ ប្រទេសអារ៉ាប៊ីសាអូឌីត (Islamic University of Madinah) កំពុងរៀបចំបង្ហាញពិព័រណ៍ស្នាដៃរបស់ខ្លួន ដែលមានរយៈពេល៣ថ្ងៃ គឺចាប់ពីថ្ងៃទី២៩ ដល់ថ្ងៃទី៣១ មីនា ឆ្នាំ២០១៦នេះ។ ក្រុមនិស្សិតចម្រុះជាតិសាសន៍ និងស្ទើរជុំវិញពិភពលោក ដែលកំពុងសិក្សានៅសាកលវិទ្យាល័យ ម៉ាឌីណាស់ ត្រូវបានតម្រូវឲ្យរៀបចំបង្ហាញពីវប្បធម៌ ប្រពៃណី និងទំនៀមទំលាប់នៃជាតិសាសន៍របស់ខ្លួន ក្នុងពិព័រណ៍ប្រចាំឆ្នាំរបស់សាលា ដើម្បីប្រជែងយកជ័យលាភី។

មានប្រទេសចំនួន ៥៧ប្រទេស ដែលបានចូលរួមក្នុងកម្មវិធីពិព័រណ៍។ ក្នុងនោះក៏មានប្រទេសកម្ពុជាផងដែរ។ ក្រុមនិស្សិតខ្មែរឥស្លាម ដែលកំពុងសិក្សារៀនសូត្រនៅទីនោះ បានរៀបខ្លោងទ្វាររូបប្រាសាទអង្គរវត្ត ទង់ជាតិ បាវចនា និងរូបថ្នាក់ថ្នាក់កំពូលរបស់ប្រទេសផងនោះ ដើម្បីឲ្យជាតិសាសន៍ដទៃបានឃើញ និងស្គាល់ ក្នុងពិព័រណ៍ដែលមានមនុស្សរាប់រយនាក់ចូលរួម។

តំណាងនិស្សិតខ្មែរឥស្លាមមួយរូប លោក សូរីយ៉ានី មហាំម៉ាត់ បានឲ្យថ្នាក់ថា នេះជាលើកទី១ហើយ ដែលក្រុមនិស្សិតបានរួមគ្នាច្នៃបង្កើតរូបអង្គរវត្ត ដាក់បង្ហាញក្នុងពិធីពិព័រណ៍របស់សាលា។ បើតាមលោក សូរីយ៉ានី ក្រៅពីរូបអង្គរវត្ត ក្នុងនោះពួកគេក៏បានធ្វើឧបករណ៍ សម្ភារប្រើប្រាស់ប្រចាំថ្ងៃរបស់ជនជាតិខ្មែរ និងឧបករណ៍កសិកម្មជាដើមផងដែរ។ ក្នុងនោះដែរក៏មានការរៀបចំជាកំណាព្យរបស់ខ្មែរ ដែលសរសេរជាភាសាអារ៉ាប់ ដាក់តាំងក្នុងរោងពិព័រណ៍នោះផងដែរ៕