ជាតិ
សាលាអន្តរទ្វីប និងបឋមសិក្សាទួលគោករួមគ្នាធ្វើយុទ្ធនាការសម្អាតបរិស្ថានតាមដងវិថី
×![]()
ដោយ: ថ្មីៗ
វិទ្យាស្ថាន និងសាលារៀន អន្ដរទ្វីប អាមេរិកាំង សាខាទួលគោក សហការជាមួយសាលាបឋមសិក្សាទួលគោក បានរៀបចំយុទ្ធនាការសម្អាតបរិស្ថានតាមដងវិថីមួយចំនួនក្នុងខណ្ឌទួលគោក រាជធានីភ្នំពេញ ដែលមានការចូលរួមដើររើសសំរាមយ៉ាងច្រើនកុះករពីសំណាក់លោកគ្រូ អ្នកគ្រូ បុគ្គលិកសិក្សា ពិសេសគឺប្អូនៗសិស្សានុសិស្សប្រមាណជាង៨០០នាក់ កាលពីព្រឹកថ្ងៃទី២៦ ខែមីនា ឆ្នាំ២០១៦ កន្លងទៅនេះ។
យុទ្ធនាការសម្អាតបរិស្ថានដែលប្រព្រឹត្តទៅនេះ លោកគ្រូ អ្នកគ្រូ បុគ្គលិកសិក្សា និងប្អូនៗសិស្សានុសិស្សមានសកម្មភាពយ៉ាងសស្រាក់សស្រាំស្វាហាប់ប្រដាប់ដោយដង្កៀបចាប់សំរាម ថង់ដាក់សំរាម អំបោស និងពាក់ស្រោមដៃនាំគ្នាដើររើសសំរាមសម្អាតបរិស្ថាននៅបរិវេណសាលាបឋមសិក្សាទួលគោក និងនៅតាមផ្លូវ២៨៩ ផ្លូវ៥២៨ រួមទាំងវិថីមួយចំនួនទៀតក្រោមការដឹកនាំដោយគណៈគ្រប់គ្រងវិទ្យាស្ថាន និងសាលារៀន អន្តរទ្វីប អាមេរិកាំង លោកនាយក លោកនាយករងសាលាបឋមសិក្សាទួលគោក និងមានការចូលរួមគាំទ្រពីអាជ្ញាធរសង្កាត់បឹងកក់១។
លោក ធន សុភ័ក្ត្រ ប្រធានចាងហ្វាងសាលារៀន អន្តរទ្វីប អាមេរិកាំង សាខាទួលគោក បានឱ្យអ្នកយកព័ត៌មានដឹងថា យុទ្ធនាការនេះត្រូវបានរៀបចំឡើងក្នុងគោលបំណងដើម្បីចូលរួមចំណែកក្នុងការអប់រំផ្សព្វផ្សាយឱ្យប្អូនៗសិស្សានុសិស្ស ក៏ដូចជាសាធារណជនទូទៅបានយល់ដឹងបន្ថែមពីវិធីងាយៗក្នុងការទុកដាក់សំរាមឱ្យបានត្រឹមត្រូវ មានសណ្តាប់ធ្នាប់ងាយស្រួលដល់ការប្រមូល ផ្តល់នូវអនាម័យសុខភាពរស់នៅ ទាំងនៅលំនៅឋាន និងទីសាធារណៈ ពិសេសគឺបំផុសសា្មរតីមហាជនដើម្បីចូលរួមចំណែកលើកម្ពស់សោភ័ណភាពទីក្រុង និងផ្តល់ជាគំរូដ៏ល្អក្នុងការចូលរួមថែរក្សាអនាម័យបរិស្ថានទៅដល់ប្អូនៗសិស្សានុសិស្ស ដែលជាទំពាំងស្នងឫស្សីទៅថ្ងៃអនាគត។
លោកបានបន្តថា បរិស្ថានរស់នៅមានសារៈសំខាន់ណាស់សម្រាប់សុខភាពរបស់យើងគ្រប់គ្នា ក៏ដូចជាសុខុមាលភាពសាធារណៈ។ បរិស្ថានល្អ បង្កភាពងាយស្រួលដល់ការអភិវឌ្ឍវិស័យទេសចរណ៍ សុខាភិបាល សេដ្ឋកិច្ច និងសង្គម បញ្ហាបរិស្ថានទាមទារឱ្យមានការចូលរួមទាំងអស់គ្នាដើម្បីជាឧត្តមប្រយោជន៍សម្រាប់យើងគ្រប់ៗគ្នា ហើយការរួមចំណែករបស់យើងអស់គ្នាពិតជាកត្តាចាំបាច់បំផុតសម្រាប់ពិភពលោកទាំងមូល។ ផ្ទុយទៅវិញ ការបញ្ចេញចោលនូវកាកសំណល់គ្រប់ប្រភេទពាលវាលពាសកាលទៅក្នុងបរិស្ថានធម្មជាតិ ដោយគ្មានការទុកដាក់ឱ្យបានសមស្របនាំឱ្យបរិស្ថានធម្មជាតិបាត់បង់លក្ខណៈដើម បាត់បង់សោភ័ណភាព ភាពស្រស់ត្រកាល និងជះឥទ្ធិពលជាអវិជ្ជមានយ៉ាងធ្ងន់ធ្ងរដល់ការអភិវឌ្ឍប្រកបដោយចីរភាពរបស់សង្គមជាតិ៕
(អត្ថបទសាលា)
Tag:
aii
© រក្សាសិទ្ធិដោយ thmeythmey.com
