ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
អន្តរជាតិ
លាក់លុយនៅបរទេស៖ លោក អង្គ វង្សវឌ្ឍនា, Poroshenko, ឈិន ឡុង, Messi…?
04, Apr 2016 ,
1:20 pm
រូបភាព
×
ដោយ:
សៅ ផលនិស្ស័យ (Sao Phal Niseiy)
ការបែកធ្លាយឯកសារសម្ងាត់ ១១.៥ លានឯកសាររបស់ក្រុមហ៊ុនមេធាវីប៉ាណាម៉ាបានបង្ហាញឲ្យឃើញច្បាស់ពីវិធីដែលមេដឹកនាំពិភពលោក និងមនុស្សល្បីសម្បូរទ្រព្យប្រើប្រាស់លាក់លុយរបស់ខ្លួនដើម្បីរួចផុតពីការបង់ពន្ធជាដើម។ ក្រុមអ្នកនយោបាយដែលយកលុយលាក់នៅក្រៅប្រទេសទាំងនោះមាន១២ នាក់កំពុងជាប្រមុខរដ្ឋនិងអតីតប្រមុខរដ្ឋដែរ ហើយរដ្ឋមន្ត្រីក្រសួងយុត្តិធម៌កម្ពុជាលោក អង្គ វង្សវឌ្ឍនា ក៏ស្ថិតក្នុងចំណោមអ្នកនយោបាយទាំងនោះដែរ។
ថ្ងៃអាទិត្យទី ៣ខែមេសា ម្សិលមិញនេះ របាយការណ៍សម្ងាត់ដែលមានចំនួន ១១.៥លានឯកសារឈ្មោះ «ឯកសារប៉ាណាម៉ា» របស់ក្រុមហ៊ុនមេធាវីដ៏ធំមួយនៅប៉ាណាម៉ា Mossack Fonseca ដែលត្រូវបានគេចាត់ទុកជាអន្តរការី នោះបានបង្ហាញយ៉ាងច្បាស់ពីរបៀបលាក់លុយរបស់មេដឹកនាំពិភពលោក ក្រុមគ្រួសារមេដឹកនាំទាំងនោះ រួមទាំងតារាល្បីៗដើម្បីរួចផុតពីការបង់ពន្ធ និងអាចពាក់ព័ន្ធបញ្ហាលាងលុយ និងពុករលួយផងដែរ។
សារព័ត៌មានអាឡឺម៉ង់ Sueddeutsche Zeitung ទទួលបានឯកសារសម្ងាត់នេះពីប្រភពអនាមិក ហើយក្រោយមកខាងក្រុមសមាគមអ្នកសារព័ត៌មានស៊ើបអង្កេតអន្តរជាតិ (International Consortium of Investigative Journalist) បានចែកចាយជាមួយបណ្តាសារព័ត៌មានអន្តរជាតិទូទាំងពិភពលោកតែម្តង។
បច្ចុប្បន្ននេះ ការស៊ើបអង្កេតនិងសិក្សាលម្អិតពាក់ព័ន្ធឯកសារសម្ងាត់ដែលលេចធ្លាយនេះត្រូវបានធ្វើឡើង ដោយមានការចូលរួមពីស្ថាប័នផ្សព្វផ្សាយច្រើនជាង១០០ ទូទាំងពិភពលោកផងនោះ។ អ្នកសារព័ត៌មានច្រើនជាង៣៧០នាក់ មកពី ៧០ ប្រទេសកំពុងដុតដៃដុតជើងស៊ើបអង្កេតបន្តទៀត។
យ៉ាងណាក៏ដោយ ការលេចធ្លាយឯកសារសម្ងាត់នេះ ជាការបែកធ្លាយធំបំផុតមិនធ្លាប់មានពីមុនឡើយ ហើយករណីនេះបានបង្ហាញឲ្យឃើញច្បាស់ថា ក្រុមអ្នកនយោបាយនិងមេដឹកនាំពិភពលោកជាង ១៤០នាក់ ហើយក្នុងនោះមានប្រមុខរដ្ឋនិងអតីតប្រមុខរដ្ឋចំនួន ១២នាក់ផងដែរ។
ក្នុងចំណោមអ្នកទាំងនោះមានដូចជា លោក Deng Jiagui បងប្អូនថ្លៃលោក ប្រធានាធិបតី ស៊ី ជិនពីង,កូនប្រុសនាយករដ្ឋមន្ត្រីម៉ាឡេស៊ី ណាជីប រ៉ាហ្សាក់, រដ្ឋមន្ត្រីក្រសួងយុត្តិធម៌កម្ពុជាលោក អង្គ វង្សវឌ្ឍនា, កូននាយករដ្ឋមន្ត្រី ប៉ាគីស្ថាន Nawaz Sharif , បងប្អូនប្រធានាធិបតី ស៊ីរី បាសា អាល់អាសាដ, មនុស្សជំនិតលោក វ្ល៉ាឌីមៀ ពូទីន, ប្រធានាធិបតីអ៊ុយក្រែនលោក Petro Poroshenko , ព្រះមហាក្សត្រអារ៉ាប៊ីសាអូឌីត , តួសម្តែងដ៏ល្បី Jackie Chan និងកីឡាករបាល់ទាត់ Lionel Messi ផងដែរ។
យោងឯកសារដែលចុះផ្សាយក្នុង គេហទំព័រ សមាគមអ្នកសារព័ត៌មានសើបអង្កេតអន្តរជាតិ ក្នុងខែឧសភាឆ្នាំ ២០០៧ រដ្ឋមន្ត្រីក្រសួងយុត្តិធម៌កម្ពុជាលោក អង្គ វង្សវឌ្ឍនា បានក្លាយជាម្ចាស់ភាគហ៊ុនមួយក្នុងចំណោមម្ចាស់ភាគហ៊ុនចំនួន ៥ នៃក្រុមហ៊ុន British Virgin Islands ។ លោកបានចំណាយលុយទិញភាគហ៊ុនចំនួន ៥ពាន់ ក្នុងតម្លៃ ៥ពាន់ដុល្លារអាមេរិក។ ប៉ុន្តែយ៉ាងណាមិញឯកសារដែលលេចធ្លាយនេះមិនបានបង្ហាញថា ក្រុមហ៊ុន Mossack Fonseca បានសិក្សានិងត្រួតពិនិត្យឲ្យបានលម្អិតពីប្រវត្តិរូបលោក អង្គ វង្សវឌ្ឍនាដែលជាអ្នកនយោបាយឡើយ។
បើតាមសា្ថប័ន សមាគមអ្នកកាសែតស៊ើបអង្កេតអន្តរជាតិ ក្រុមហ៊ុនមេធាវី Panama ខាងលើមិនបានធ្វើ តាមនីតិវិធីដែលកំណត់ឡើយចំពោះការត្រួតពិនិត្យមើលពីប្រវត្តិរូបអតិថិជនរបស់ខ្លួន ថាតើមានជាប់ពាក់ព័ន្ធសកម្មភាពឧក្រិដ្ឋកម្ម ប្រព្រឹត្តអំពើពុករលួយនយោបាយ សកម្មភាពលាងលុយកខ្វក់ និងដើម្បីកាត់បន្ថយឬរួចផុតពីការបង់ពន្ធជាដើមឡើយ។
យោងតាមទីភ្នាក់ងារព័ត៌មាន AFP ក្រុមហ៊ុន Mossack Fonseca អះអាងថាខ្លួនមិនដែលធ្លាប់រងការចោទប្រកាន់កន្លងមកពាក់ព័ន្ធកំហុសអ្វីឡើយ ហើយតំណាងស្ថាប័ននេះបានចោទប្រកាន់ថា ការទម្លាយឯកសារសម្ងាត់នេះជាបទឧក្រិដ្ឋ ព្រោះវារំលោភលើសិទ្ធិបុគ្គល និងសិទ្ធឯកជនរបស់គេថែមទៀត។
ក្រុមហ៊ុន Mossack Fonseca ចាប់ផ្តើមដំណើរការក្នុងឆ្នាំ ១៩៧៧ ហើយបច្ចុប្បន្នវាមានការិយាល័យ ៤០ ទូទាំងពិភពលោក ហើយក្រុមហ៊ុននេះជួយ ជនបរទេសឲ្យបង្កើតក្រុមហ៊ុនមិនធ្វើជំនួញតែមានឈ្មោះក្នុងទីផ្សារភាគហ៊ុន (Shell Company) ដើម្បីកាន់កាប់មូលធនហិរញ្ញវត្ថុ តែគេលាក់អត្តសញ្ញាណម្ចាស់មូលធនទាំងនោះ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
អង្គ វង្សវឌ្ឍនា
Panama papers
© រក្សាសិទ្ធិដោយ thmeythmey.com
អត្ថបទពេញនិយម
ផ្សារដើមគរថ្មី លើផ្ទៃដី៣០ហិកតា ត្រូវបានដាក់ដំណើរការជាផ្លូវការហើយ
4 ថ្ងៃ
ដំណឹងបឋម៖ ករណីផ្ទុះឃ្លាំងគ្រាប់នៅបន្ទាយភូមិភាគ៣ ក្រុងច្បារមន មានអ្នកស្លាប់ និងរបួសច្រើននាក ...
5 ថ្ងៃ
តើពាក្យងារជា «សម្តេច» មានន័យដូចម្តេច?
1 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
1 សប្តាហ៍
តើពាក្យ «ដុតដៃដុតជើង» មានន័យដូចម្តេច?
6 ថ្ងៃ
អត្ថបទពេញនិយមបន្ថែម