អន្តរជាតិ
នយោបាយអន្តរជាតិ
អាសាដ ចង់មានឈ្មោះក្នុងប្រវត្តិសាស្ត្រជាអ្នកដែលរក្សាប្រទេសស៊ីរី?
× «បើសិនស៊ីរីដួលរលំ និងមានភាពចលាចល តំបន់ទាំងមូលនឹងរងផលប៉ះពាល់ជាក់ជាមិនខាន តែខ្ញុំបានសម្រេចជោគជ័យក្នុងការការពារស៊ីរីមិនឲ្យដួលរលំ។ នេះជាមូលហេតុខ្ញុំចង់មានឈ្មោះចារជាប់ក្នុងប្រវត្តិសាស្ត្រ »។ នេះជាការលើកឡើងរបស់ប្រធានាធិបតីស៊ីរី បាសា អាល់អាសាដ ក្នុងបទសម្ភាសន៍ជាមួយសារព័ត៌មានរុស្ស៊ី Sputnik។
លោក មុំ ពិទូរ្យ លម្អិតព័ត៌មាននេះ
ប្រធានាធិបតីស៊ីរី លោក បាសា អាល់អាសាដ បានថ្លែងថាលោកចង់មានឈ្មោះចារជាប់ក្នុងប្រវត្តិសាស្ត្រស៊ីរី ក្នុងនាមជាបុរសរដ្ឋដែលរក្សាមិនឲ្យស៊ីរី ដួលរលំក្រោយឆ្លងកាត់សង្គ្រាមស៊ីវិលអស់រាប់ឆ្នាំមកនេះ។ ហើយលោកក៏ជឿជាក់ផងដែរថា លោកជាមនុស្សដែលបានថែរក្សាតំបន់ទាំងមូលមិនឲ្យធ្លាក់ចូលក្នុងស្ថានភាពចលាចលខ្លាំង។
ក្នុងបទសម្ភាសន៍ផ្តាច់មុខជាមួយសារព័ត៌មានរុស្ស៊ី Sputnik លោក អាសាដ បានពន្យល់ថា បើសិនជា ជាស៊ីរីដួលរលំមែន ភាពចលាចលនឹងកើតឡើង ហើយវាប្រាកដណាស់ថា តំបន់ទាំងមូលនឹងរងផលប៉ះពាលខ្លាំងមិនខាន។ តែលោកសង្កត់ធ្ងន់ថា លោកសម្រេចជោគជ័យក្នុងការរក្សាមិនឲ្យស៊ីរីដួលរលំ បែកបាក់ខ្ចាត់ខ្ចាយ។
លោក បាសា អាល់ អាសាដ បានព្យាយាមពន្យល់ថា លោកបានប្រឹងប្រែងដឹកនាំប្រទេសក្នុងកាលៈទេសៈគ្រោះអាសន្ន រងការឈ្លានពានពីក្រៅផង និងត្រូវប្រឈមមុខជាមួយក្រុមភេរវជនផង។ ហើយសង្គ្រាមរយៈពេល ៥ ឆ្នាំមកនេះ បានបង្កវិនាសកម្មយ៉ាងធំធេងសម្រាប់ប្រទេសស៊ីរី ហើយបង្កការលំបាកខ្លាំងដល់រដ្ឋាភិបាលក្នុងការដឹកនាំ។
ស្របពេលជាមួយគ្នានោះ លោក អាសាដ ក៏សង្ឃឹមថា ក្រោយពេលបញ្ចប់វិបត្តិបច្ចុប្បន្ន សង្គមស៊ីរីនឹងស្គាល់ការអភិវឌ្ឍ ហើយការផ្លាស់ប្តូរដោយភាពវិជ្ជមានមួយនឹងកើតមានឡើងជាក់ជាមិនខាន។ ប៉ុន្តែការកសាងសន្តិភាពនៅស៊ីរីហាក់ដូចជាផុយស្រួយនៅឡើយ ព្រោះមិនទាន់មានដំណោះស្រាយនយោបាយត្រូវបានភាគីបង្កើតឡើងនៅឡើយទេ។
បច្ចុប្បន្ននេះ ការប្រយុទ្ធគ្នារវាងភាគីជម្លោះបានស្ងប់ស្ងាត់ខ្លះ ក្រោយពេលដែលបទឈប់បាញ់ដែលផ្តួចផ្តើមបង្កើតឡើងដោយ រុស្ស៊ី និងអាមេរិកនោះបានចូលជាធរមានកាលពីថ្ងៃ ២៧ ខែកុម្ភៈកន្លងទៅ។ចំណែកការចរចាសន្តិភាពជុំទី១ នៅហ្សឺណែវ បានបញ្ចប់កាលពីចុងខែមីនា ហើយក្រុមភាគីពាក់ព័ន្ធប្រហែលជានឹងចាប់ផ្តើមចរចាឡើងវិញ នៅថ្ងៃ១០ ខែមេសាខាងមុខដែរ។
រឿងចម្រូងចម្រាសបច្ចុប្បន្នសម្រាប់ដំណោះស្រាយ ក្រៅពីសំណើរទាមទារឲ្យ អាសាដ ចុះចេញពីតំណែង មានការជជែកដេញដោលរឿងបង្កើតរដ្ឋសហព័ន្ធស៊ីរីដើម្បីបញ្ចប់វិបត្តិផងដែរ។
កន្លងមកលោកអាសាដ បានជំទាស់រាល់គំនិតបង្កើតរដ្ឋសហព័ន្ធនៅក្នុងទឹកដីស៊ីរីព្រោះវាធ្វើឲ្យមានការបែកខ្ញែកគ្នា តែលោកយល់ឃើញថា រដ្ឋតូចដូចជាស៊ីរីនេះអាចដើរតាមប្រព័ន្ធវិមជ្ឈការ ដោយបង្កើតឲ្យមានការផ្ទេរអំណាចទៅរដ្ឋបាលមូលដ្ឋានបាន៕
© រក្សាសិទ្ធិដោយ thmeythmey.com