ពីនេះ ពីនោះ
មួយឆ្នាំសំពះពុកម៉ែម្ដង កូនធ្វើមិនបានទេឬ?
× ភ្នំពេញ៖ បុណ្យចូលឆ្នាំ បុណ្យភ្ជុំបិណ្ឌ គឺជាពិធីបុណ្យជាតិដ៏សំខាន់សម្រាប់កូនខ្មែរ មានឱកាសបានជួបជុំក្រុមគ្រួសារ ជាពិសេសបានជួបមុខលោកឪពុកអ្នកម្ដាយ។ កូនកតញ្ញូ កូនដែលមានកតវេទីគេមិនខ្មាស់អៀន គេមិនលំបាកក្នុងការលើដៃទាំងពីររបស់ខ្លួនដើម្បីក្រាបសំពះចំពោះមុខឪពុកម្ដាយ។ ប៉ុន្តែកូនពាល ការលើកដៃទាំងពីសំពះអ្នកមានគុណគឺធ្ងន់ជាងលើដំថ្មរទៅទៀត។
ពីមួយឆ្នាំទៅមួយឆ្នាំ កូនបែកពីម្ដាយ ពីឪពុក ធ្វើឲ្យលោកព្រួយលោកបារម្ភស្ទើរៀងរាលថ្ងៃ សង្ឃឹមក្នុងចិត្តកូនមានសុខភាពល្អ គ្មានរឿងរ៉ាវអពមង្គលណាមួយចូលមកយាយីភាពសុខសាន្តរបស់កូនប្រុសស្រីរបស់លោក។ មួយវិញទៀតលោកទន្ទឹងរងចាំជួបមុខកូន រំពឹងថានៅពេលបានជួបមុខកូន គឺបានឃើញកូនដែលប្រកបដោយគន្លងធម៌ មានសីលធម៌រស់នៅល្អ មានគុណធម៌ក្នុងនាមជាមនុស្ស ចេះគោរពចាស់ទុំ ពាក្យសម្ដីពិរោះពិសារ ចេះស្ដាប់ពាក្យសម្ដីដែលលោកបានទូន្មាន និងមានគេរាប់អានច្រើនពីមនុស្សនៅក្នុងសង្គម។ ប៉ុន្តែអ្វីដែលលោករំពឹងពេលខ្លះមិនអាចទទួលបានតាមបំណង ព្រោះតែកូនខ្វះខាត់នូវសន្ដានជាមនុស្សល្អ តែងតែចូលចិត្តរាប់រកទង្វើជាបិសាច ផឹកស៊ី ស្រវឹង ឡូឡា ឈ្លោះទាស់ទែងគ្នារវាងបងនិងប្អូន ជាមួយមនុស្សនៅក្នុងសង្គមដែលធ្វើឲ្យលោកកាន់តែពិបាកចិត្តបន្ថែមទៀត។
រឿងមួយដែលកាន់តែសំខាន់ទៅទៀតនោះ គឺហេតុអ្វីបានជាកូនប្រុសស្រីទាំងឡាយមិនអាចលើកដៃទាំងពីរមកសំពះលោកឪពុកអ្នកម្ដាយ? តើគ្រាន់តែសំពះបង្ហាញពីចិត្តគោរពស្រឡាញ់ ចំពោះលោក កូនៗមិនអាចធ្វើបានទេ? ព្រោះការសំពះបង្ហាញពីសេចក្ដីគោរព ចំពោះលោកទាំងពីរ។ ចូលកូនប្រុសស្រីទាំងឡាយកុំធ្ងន់ដៃ បើគ្រាន់តែលើកសំពះមនុស្សដែលបានផ្ដល់កំណើតឲ្យខ្លួន ចិញ្ចឹមបីបាច់ខ្លួន ហើយហ៊ាននិយាយការពិតចំពោះកំហុសឆ្គងរបស់ខ្លួនដែលធ្លាប់បានធ្វើទៅលោកកន្លងមក។ ចូលអ្នកពិចារណារាល់ពាក្យពេចន៍ដែលអ្នកបាននិយាយទៅកាន់លោកទាំងពីរ អារម្មណ៍ដែលធ្លាប់មើលងាយទៅលើគុណោបការៈរបស់លោកទាំងពីរចំពោះអ្នក មកញញឹមនិងផ្ដល់ក្ដីសង្ឃឹមជូនលោកទាំងពីរវិញ។
ពេលវេលានៃជីវិតរបស់លោក គឺកាន់តែវិវដ្តន៍ទៅមុខ ការដង្ហោយហៅនៃធម្មជាតិក៏កាន់តែខិតមកជិត ទៅតាមអាយុកាលរបស់លោក។ ដូច្នេះហើយ វាល្មមដល់ពេលវេលា ដែលកូនៗទាំងឡាយចេះស្វែងយល់ពីច្បាប់ធម្មជាតិ ងាក់មកសម្លឹងមុខអ្នកមានគុណរបស់ខ្លួន ថា ការប្រែប្រួលស្បែក អាយុ និងសុខភាពរបស់លោកខុសប្លែកបែបណាហើយ? បើសិនជាអ្នកមានគុណរបស់ខ្លួនមានភាពខុសប្លែក ចូលធ្វើខ្លួនជាកូនដែលឧត្ដម ហើយតប់ស្នងគុណទៅលោកទាំងទ្វេរតាមដែលខ្លួនអាចធ្វើបាន។ មិនតែប៉ុណ្ណោះកិរិយាដ៏ឧត្ដមគួរណាស់កូនប្រុសស្រីនាំគ្នាប្រតិបត្តចំពោះ លោកអ្នកមានគុណឲ្យបានល្អប្រសើរ៕
© រក្សាសិទ្ធិដោយ thmeythmey.com