អន្តរជាតិ
លោក អូបាម៉ា អាចនឹងទៅគោរពវិញ្ញាណក្ខន្ធជនរងគ្រោះនៅហ៊ីរ៉ូស៊ីម៉ា
× នៅថ្ងៃ១១ ខែមេសាខាងមុខនេះ ប្រមុខការទូតអាមេរិក លោក ចន ឃែរី នឹងទស្សនកិច្ចនៅទីកន្លែងរំលឹកវិញ្ញាណក្ខន្ធហ៊ីរ៉ូស៊ីម៉ា។ លោក ឃែរី នឹងក្លាយជារដ្ឋមន្ត្រីការបរទេសអាមេរិកដំបូងដែលទៅគោរពវិញ្ញាណក្ខន្ធប្រជាជនជប៉ុនដែលស្លាប់ក្នុងការវាយប្រហារគ្រាប់បរមាណូអំឡុងសង្គ្រាមលោកលើកទី២នេះ។ ហើយគេរំពឹងថាលោក បារ៉ាក់ អូបាម៉ាក៏នឹងទៅគោរពវិញ្ញាណក្ខន្ធជនរងគ្រោះទាំងនោះក្នុងដំណើរទស្សនកិច្ចរបស់លោកក្នុងខែឧសភាខាងមុខដែរ។
សូមស្ដាប់ព័ត៌មានលម្អិត៖
រដ្ឋមន្ត្រីការបរទេសជប៉ុនលោក Fumio Kishida បានបញ្ជាក់នៅចុងសប្តាហ៍កន្លងទៅថា រដ្ឋមន្ត្រីការបរទេសនៃក្រុមប្រទេស ៧ នឹងនាំគ្នាទៅទស្សនកិច្ចសារមន្ទីររំលឹកដល់សន្តិភាព ហ៊ីរ៉ូស៊ីម៉ា នៅថ្ងៃ ១១ខែមេសាខាងមុខនេះ។ រដ្ឋមន្ត្រីទាំងអស់នឹងដាក់បាច់ផ្កាឧទ្ទិសដល់បណ្តាជនរងគ្រោះដែលស្លាប់ដោយសារការទម្លាក់គ្រាប់បែកបរមាណូ។
ក្នុងចំណោមរដ្ឋមន្ត្រីការបរទេសទាំង ៧នាក់នោះ មានរដ្ឋមន្ត្រីការបរទេសអាមេរិកលោក ចន ឃែរី ផងដែរ ហើយលោកក្លាយជាប្រមុខការទូតអាមេរិកដំបូងបំផុតក្នុងប្រវត្តិសាស្ត្រដែលគោរពវិញ្ញាណក្ខន្ធប្រជាជនជប៉ុន។
យោងតាមសម្តីរបស់ប្រមុខការទូតជប៉ុនខាងលើ ដំណើរទស្សនកិច្ចទៅកាន់ទីតាំងប្រវត្តិសាស្ត្រនៃគ្រោះមហន្តរាយនុយក្លេអ៊ែររបស់មន្ត្រីជាន់ខ្ពស់ក្រុមប្រទេស៧នេះ ធ្វើឡើងក្រៅកិច្ចប្រជុំរដ្ឋមន្ត្រីការបរទេសប្រទេស៧ ដែលរៀបចំឡើងដើម្បីកំណត់របៀបវារៈសម្រាប់កិច្ចប្រជុំប្រទេស៧ នៅខែឧសភាខាងមុខនេះដែរ។
បច្ចុប្បន្ននេះមន្ត្រីក្រុងវ៉ាស៊ីនតោនកំពុងតែពិចារណារកពេលវេលាសមស្របសម្រាប់រៀបចំដំណើរទស្សនកិច្ចរបស់ប្រធានាធិបតីអាមេរិក លោក បារ៉ាក់ អូបាម៉ា ទៅកាន់ទីកន្លែងប្រវត្តិសាស្ត្រសង្គ្រាមនេះ។ បើសិនមានទស្សនកិច្ចមែន ប្រហែលវានឹងត្រូវរៀបចំឡើងក្នុងពេលដែលលោកចូលរួមក្នុងកិច្ចប្រជុំកំពូលប្រទេស ៧ នៅជប៉ុនក្នុងខែឧសភាខាងមុខ។
ទស្សនកិច្ចរបស់ប្រមុខរដ្ឋអាមេរិកនឹងក្លាយជាព្រឹត្តិការណ៍ប្រវត្តិសាស្ត្រ ហើយវាក៏ឥរិយាបថមួយដែលបញ្ជាក់ថាអាមេរិកទទួលស្គាល់ប្រវត្តិសាស្ត្រ។ ក្នុងឆ្នាំ ១៩៤៥ គ្រាប់បរមាណូដំបូងបំផុតត្រូវបានទម្លាក់លើទីក្រុងហ៊ីរ៉ូស៊ីម៉ា ដោយសម្លាប់មនុស្សអស់ប្រហែល ១៤ម៉ឺននាក់ ហើយ៣ថ្ងៃក្រោយមកអាមេរិកទម្លាក់គ្រាប់បែកមួយគ្រាប់ទៀតលើទីក្រុងណាហ្កាសាគី បណ្តាលឲ្យមនុស្សស្លាប់ ជាង៧ម៉ឺននាក់។ តាំងពីពេលនោះមក រដ្ឋបាលក្រុងវ៉ាស៊ីនតោនមិនដែលទទួលស្គាល់និងសូមអភ័យទោសចំពោះការបង្កើតសោកនាដកម្មនេះឡើយ។
កន្លងមកមានមន្ត្រីជាន់ខ្ពស់អាមេរិកមួយចំនួនដែរ បានអញ្ជើញទៅកន្លែងរំលឹកវិញ្ញាណក្ខន្ធជនរងគ្រោះដោយការទម្លាក់គ្រាប់បែកនុយក្លេអ៊ែរ នេះ។ កាលពីឆ្នាំ ២០០៨ មន្ត្រីអាមេរិកជាន់ខ្ពស់បំផុតរបស់អាមេរិក ដែលអញ្ជើញទៅគោរពវិញ្ញាណក្ខន្ធគឺប្រធានសភាលោកស្រីNancy Pelosi ។ ហើយដល់ឆ្នាំមុន ឯកអគ្គរដ្ឋទូតអាមេរិកប្រចាំប្រទេសជប៉ុន Caroline Kennedy និងអនុរដ្ឋមន្ត្រីអាមេរិកទទួលបន្ទុកការគ្រប់គ្រងអាវុធ និងសន្តិសុខអន្តរជាតិលោកស្រី Rose Gottemoeller បានក្នុងរួមក្នុងខួបលើកទី៧០ នៃការទម្លាក់គ្រាប់បរមាណូរបស់អាមេរិកលើប្រទេសជប៉ុនផងដែរ។
តាំងពីដើមមក រដ្ឋាភិបាលជប៉ុនបានអំពាវនាវឲ្យបណ្តាមេដឹកនាំពិភពលោកទៅទស្សនកិច្ច ហ៊ីរ៉ូស៊ីម៉ា និង ណាហ្កាសាគី ដើម្បីមើលឲ្យឃើញច្បាស់ពីស្ថានភាពជាក់ស្តែង និងសោកនាដកម្មដែលមិនអាចបំភ្លេចបានក្នុងប្រវត្តិសាស្ត្រជប៉ុន។ ជប៉ុនចង់ឲ្យគ្រប់គ្នាដឹងនិងយល់ឲ្យច្បាស់ពីគ្រោះមហន្តរាយដែលបង្កដោយអាវុធប្រល័យលោកនេះ ហើយជំរុញឲ្យពិភពលោកបញ្ចប់ការសាយភាពនៃអាវុធនុយក្លេអ៊ែរ៕
© រក្សាសិទ្ធិដោយ thmeythmey.com