អន្តរជាតិ
អាមេរិកថា ការបំពាក់សម្ភារយោធាការពារផលប្រយោជន៍ស៊ីវិលរបស់ចិន មិនគួរធ្វើក្នុងសមុទ្រចិនខាងត្បូងឡើយ
× ជម្លោះសមុទ្រចិនខាងត្បូង បានក្លាយជាបញ្ហាដ៏ចម្រូងចម្រាសមួយនៅក្នុងតំបន់ ដែលមានការប្រឈមមុខគ្នារវាងចិន ភាគីជម្លោះ និងអាមេរិក រដ្ឋខាងក្រៅដែលចិន ចោទថាកំពុងតែបង្កបញ្ហាតាមរយៈសកម្ម ភាពក្នុងតំបន់ជម្លោះនោះ។ តែមន្ត្រីជាន់ខ្ពស់អាមេរិក បានពន្យល់ និងបញ្ជាក់ជាថ្មីហើយថាសកម្មភាពរបស់អាមេរិក គឺស្របច្បាប់អន្តរជាតិ ហើយអាមេរិក បានធ្វើជាច្រើនទសវត្សរ៍ហើយ។
លោកស្រី Colin Willett ភារធារីទទួលបន្ទុកកិច្ចការអាស៊ីបូព៌ា និងអាស៊ីប៉ាស៊ីហ្វិក បានថ្លែងពីការព្រួយ បារម្ភចំពោះសកម្មភាពប៉ុន្មានខែចុងក្រោយរបស់ចិនក្នុងការបន្តវាតទី និងការដាក់ពង្រាយយោធានា ពេលខាងមុខនៅក្នុងសមុទ្រចិនខាងត្បូង ដែលភាគីទាមទារក្នុងតំបន់ជម្លោះមិនអាចប្រជែងជាមួយនោះ។
ការលើកឡើងនេះ ធ្វើឡើងនាឱកាសនៃសន្និសីទសារព័ត៌មានតាមរយៈទូរសព្ទស្តីពីជម្លោះអធិបតេយ្យ និងដែនសមុទ្រក្នុងសមុទ្រចិនខាងត្បូងពីក្រុងវ៉ាស៊ីនតោនកាលពីសបា្តហ៍មុន។
លោកស្រី Colin Willett បានក៏អះអាងដែលថា អាមេរិក បានជួបសន្ទនាដោយផ្ទាល់ជាមួយនឹងចិន ហើយការអះអាងរបស់ចិន គឺសំណង់យោធាដែលស្ថិតនៅក្នុងតំបន់នោះ ជាសកម្មភាពស៊ីវិល និងដើម្បីបម្រើ ផលប្រយោជន៍ស៊ីវិលតែប៉ុណ្ណោះ។ លោកស្រី ថាអាមេរិក មិនត្រូវការប្រភេទនៃសំណង់ទាំងនោះដើម្បីការពារជនស៊ីវិល និងជំនួយសម្រាប់ការនេសាទ ឬគ្រប់គ្រងអាកាសធាតុឡើយ។
សូមរំលឹកផងដែរថា រយៈពេលចុងក្រោយនេះ អាមេរិក និងចិន ហាក់ដូចជាមានភាពតានតឹងនឹងគ្នាច្រើន ជាពិសេសនោះ ភាគីទាំងពីរ ក៏បានចោទដាក់គ្នាថាកំពុងតែធ្វើយោធូបនីយកម្មនៅក្នុងសមុទ្រចិនខាងត្បូងទៀតផង។ រដ្ឋាភិបាលក្រុងវ៉ាស៊ិនតោន ថាចិន កំពុងតែរៀបចំបំពាក់សម្ភារយោធា ខណៈ ចិន ចោទសកម្មភាពនៃបញ្ជូននាវាល្បាត និងយន្តហោះទម្លាប់គ្រាប់អាមេរិកក្នុងតំបន់ជម្លោះនោះថា ជាសកម្មភាពយោធានិងរំខានស្ថិរភាពក្នុងតំបន់។
យ៉ាងណាក៏ដោយ នាសន្និសីទសារព័ត៌មាននោះ លោកស្រី Colin Willett បានសង្កត់ធ្ងន់ថា គ្រប់ប្រតិបត្តិការរបស់អាមេរិកមិនថាតែក្នុងសមុទ្រចិនខាងត្បូង និងជាសកលនោះទេ គឺសុទ្ធសឹងតែធ្វើឡើងក្រោមច្បាប់អន្តរជាតិ ហើយ អាមេរិក ក៏ទទួលស្គាល់ពីសិទ្ធិនៃប្រទេសទាំងអស់ក្នុងការអនុវត្តសេរីភាពស្មើគ្នាផងដែរ។
ជាមួយគ្នានេះ លោកស្រី ក៏បានបន្ថែមដែរថា អាមេរិក បានប្រតិបត្តិការនៅក្នុងសមុទ្រចិនខាងត្បូងជាច្រើនទសវត្សរ៍មកហើយដើម្បីការពារសិទ្ធិទាំងនោះ ហើយ វា ពិតជាពិបាកនឹងយល់ដែរថាប្រតិបត្តិការរបស់អាមេរិក ត្រូវចាត់ទុកថាជាយោធូបនីយកម្ម ខណៈតំបន់ទាមទារដែលមានពង្រាយយោធានោះ មានភាពតានតឹងស្រាប់ហើយនោះ។
សូមបញ្ជាក់ផងដែរថា ជម្លោះសមុទ្រចិនខាងត្បូង គឺជាជម្លោះអធិបតេយ្យរវាងភាគីពាក់ព័ន្ធអាស៊ាន រួមមាន ព្រុយណេ ម៉ាឡេស៊ី ហ្វីលីពីន និងវៀតណាមជាមួយនឹងចិន។ ចិន ជាភាគីតែមួយគត់ដែលបានទាមទារស្ទើរតែតំបន់ទាំងស្រុងនៃតំបន់ជម្លោះដោយយោងតាមអំណះអំណាងប្រវត្តិសាស្ត្រ ខណៈ រដ្ឋអាស៊ាន ទាមទារលើតំបន់ត្រួតស៊ីគ្នានោះដែរដោយយោងតាមច្បាប់អន្តរជាតិ៕
© រក្សាសិទ្ធិដោយ thmeythmey.com