លោកស្រីស៊ូជី បោះបង់តំណែងជារដ្ឋមន្ត្រីនៃក្រសួងចំនួនពីរវិញហើយ

អន្តរជាតិ

លោកស្រីស៊ូជី បោះបង់តំណែងជារដ្ឋមន្ត្រីនៃក្រសួងចំនួនពីរវិញហើយ

04, Apr 2016 , 10:19 pm

រូបភាព

ដោយ: ថ្មីៗ

ប្រមុខបក្សកាន់អំណាចសម្ព័ន្ធជាតិដើម្បីប្រជាធិបតេយ្យ លោកស្រី អ៊ុងសាន ស៊ូជី បានបោះបង់តំណែង ជារដ្ឋមន្ត្រីនៃក្រសួងពីរក្នុងចំណោមក្រសួងទាំងបួនដែលលោកស្រីទើបតែស្បថចូលកាន់តំណែងកាលពី សបា្តហ៍មុន។ តែមូលហេតុច្បាស់លាស់នៃការបោះបង់នោះ មិនទាន់ត្រូវបានបកស្រាយនោះទេ។

ប្រធានសភាជាន់ខ្ពស់មីយ៉ាន់ម៉ា លោក Mahn Win Khaing Than នៅថ្ងៃទី០៤ ខែមេសានេះ បានប្រកាសថាប្រធានាធិបតី Htin Kyaw បានតែងតាំងលោក Myo Thein Gyi និង Pe Zin Tun សម្រាប់តំណែងរដ្ឋមន្ត្រីក្រសួងអប់រំ និងរដ្ឋមន្ត្រីអគិ្គសនី និងថាមពល ដែលជាតំណែងរបស់លោកស្រី ស៊ូជី ក្នុងគណៈរដ្ឋមន្ត្រីថ្មី។ នេះបើយោងតាមសារព័ត៌មាន Irrawaddy ។

សូមបញ្ជាក់ផងដែរ នៅថ្ងៃទី៣០ ខែមីនា កន្លង លោក Mann Win Khaing Than ក៏បានអនុម័ត និងប្រកាសជាផ្លូវការនូវតំណែងរបស់លោកស្រីអ៊ុងសាន ស៊ូជី ដែលលោកស្រី ត្រូវក្លាយ រដ្ឋមន្ត្រីការបរទេសថ្មី និងដឹកនាំក្រសួងបីបន្ថែមទៀតរួមមានក្រសួងនៃការិយាល័យប្រធានាធីបតី ក្រសួងអប់រំ និងក្រសួងអគ្គិសនី និងថាមពលផងដែរ។

យ៉ាងណាក៏ដោយ លោកស្រី ស៊ូជី បានបោះបង់នូវតំណែងពីរហើយ ពោលគឺជារដ្ឋមន្ត្រីនៃក្រសួងអប់រំ និងក្រសួងអគ្គិសនី និងថាមពល ជាមួយនឹងអវត្តមាននៃហេតុផលច្បាស់លាស់។ តែអ្វីដែលគួរកត់សម្គាល់នោះ ការបោះបង់របស់លោកស្រី ស្របជាមួយនឹងការអនុម័តសេចក្តីព្រាងច្បាប់ថ្មីដែលស្នើដោយបក្សកាន់អំណាចដើម្បីសុំតែងតាំងលោកស្រី ស៊ូជី ជាទីប្រឹក្សាកំពូលរដ្ឋ ដែលសេចក្តីព្រាងច្បាប់នោះ ក៏កំពុងតែប្រឈមនឹងភាពចម្រូងចម្រាសជាមួយនឹងសមាជិកសភាតំណាងក្រុមយោធា៕