អន្តរជាតិ
នយោបាយអន្តរជាតិ
អាជ្ញាធរក្រិកចាប់ផ្តើមបញ្ជូនជនភៀសខ្លួនចេញទៅតួកគីវិញ
× អាជ្ញាធរក្រិកបានសម្រេចបញ្ជូនជនភៀសខ្លួនចេញពីកោះ Lesbos ទៅកាន់ប្រទេសតួកគី ដោយការបញ្ជូនជនភៀសខ្លួននេះធ្វើឡើងក្រោមគម្រោងរបស់សហភាពអឺរ៉ុបទប់ស្កាត់ជនភៀសខ្លួនហូរចូលអឺរ៉ុប។ ការបញ្ជូនចេញលើកទី១ នេះមានជនភៀសខ្លួនសរុបប្រហែល ២០០នាក់ ហើយតួកគីបានប្រកាសថាខ្លួនអាចទទួលយកជនភៀសខ្លួនពី ៤០០ ទៅ ៥០០នាក់។
ជនភៀសខ្លួនជាង២០០នាក់ត្រូវបានបញ្ជូន ចេញទៅតាមទូកដោយមន្ត្រីប៉ូលិសក្រិកទៅកាន់ប្រទេសតួកគីនៅថ្ងៃ ទី៤មេសា ម្សិលមិញនេះ។ ការបញ្ជូនជនភៀសខ្លួនចេញពីក្រិចនេះធ្វើឡើងតាមកិច្ចព្រមព្រៀងដែលសហភាពអឺរ៉ុបបានចុះជាមួយតួកគីដើម្បីទប់ស្កាត់លំហូរជនភៀសខ្លួនចូលមកកាន់តំបន់អឺរ៉ុប។ ហើយគ្រាន់តែមុនការអនុវត្តកិច្ចព្រមព្រៀងនេះមួយថ្ងៃ ជនភៀសខ្លួនប្រហែលជា ៥០០នាក់បានធ្វើដំណើរមកដល់ឆ្នេសមុទ្រក្រិក។
បើតាមសារព័ត៌មាន Al Jazeera ជនភៀសខ្លួនទាំងនោះបានស្នាក់នៅកោះ Lesbos និងកោះ Chios មុនត្រូវគេបញ្ជូនចេញទៅកាន់ប្រទេសតួកគី។ ចំណែកអាជ្ញាធរតួកគីឯណោះវិញបានអះអាងថា ខ្លួនអាចទទួលយកជនភៀសខ្លួនបានចន្លោះពី ៤០០ ទៅ ៥០០នាក់ដែរ។ ក្នុងចំណោមមនុស្ស ជាង ២០០នាក់នោះ មាន១៣៦នាក់ចេញពីកោះ Lesbos និង ៦៦នាក់ផ្សេងទៀតចេញពីកោះ Chios ។
អភិបាលខេត្ត Izmir បានបញ្ជាក់ម្សិលមិញថា ទូកចំនួន ៣ ដែលដឹកជនភៀសខ្លួនចំនួន២០២ នាក់នោះបានមកដល់ខេត្តរបស់លោកហើយ ប៉ុន្តែក្នុងចំណោមជនភៀសខ្លួនទាំងនោះមិនមានជនជាតិស៊ីរីឡើយ។ តែយ៉ាងណាក៏ដោយមុនមានការបញ្ជូនជនភៀសខ្លួនទៅនោះ មន្ត្រីរដ្ឋាភិបាលក្រិកបានអះអាងថា ក្នុងចំណោមអ្នកដែលត្រូវបញ្ជូនទៅកាន់តួកគីនោះជាជនជាតិប៉ាគីស្ថានទាំងអស់ តែមានពីរនាក់ស្ម័គ្រចិត្តទៅជាមួយគេនោះមកពីស៊ីរី។
ក្រោមកិច្ចព្រមព្រៀងដែលសហភាពអឺរ៉ុបចុះជាមួយតួកគីនេះ រាល់ជនអន្តោប្រវេសន៍ទាំងអស់មកដល់ប្រទេសក្រិកក្រោយចាកចេញពីតួកគីរាប់ចាប់ពីថ្ងៃ ២០ខែមីនានឹងប្រឈមមុខការបញ្ជូនត្រលប់ទៅវិញ។ អាចនិយាយថា រាល់ជនអន្តោប្រវេសន៍ខុសច្បាប់ទាំងឡាយ នឹងមិនត្រូវបានអឺរ៉ុបទទួលស្វាគមន៍ដូចមុនឡើយ ហើយពួកគេនឹងត្រូវត្រលប់ទៅទីកន្លែងដែលខ្លួនបានចាកចេញមកនោះដែរ។
យ៉ាងណាក៏ដោយ កិច្ចព្រមព្រៀងដែលមានការអនុវត្តវិធានការតឹងរ៉ឺង ដោយបញ្ជូនជនភៀសខ្លួនចេញពីអឺរ៉ុបទៅរស់នៅតួកគីវិញនោះរងការចោទប្រកាន់ខ្លាំងពីក្រុមសិទ្ធិមនុស្សកន្លងមក។ គេអះអាងថា អឺរ៉ុបកំពុងយករួចខ្លួន ដោយចុះកិច្ចព្រមព្រៀងអាក្រក់មួយជាមួយតួកគី ព្រោះជនភៀសខ្លួនទាំងនោះនឹងស្ថិតក្នុងស្ថានភាពគ្រោះថ្នាក់ពេលស្នាក់នៅតួកគី។
អង្គការលើកលែងទោសអន្តរជាតិលើកឡើងថាថា គ្មានឡើយការការពារខ្លួនត្រឹមត្រូវសម្រាប់ជនភៀសខ្លូននៅទួកគី ហើយការអនុវត្តច្បាប់ការពារសិទ្ធិសេរីភាពរបស់ជនភៀសខ្លួននៅតួកគីក៏អាក្រក់ទៀត។ តែ បើមើលស្ថានភាពជាក់ស្តែង សហភាពអឺរ៉ុបក៏គ្មានជម្រើសអ្វីក្រៅពីធ្វើបែបនេះដែរ ព្រោះជនភៀសខ្លួនដែលសម្រុកមកកាន់តំបន់អឺរ៉ុបនោះវាច្រើនលើសលុប និងលើសបន្ទុកសម្រាប់រដ្ឋអឺរ៉ុបទទួលខុសត្រូវ៕
© រក្សាសិទ្ធិដោយ thmeythmey.com