អន្តរជាតិ
នយោបាយអន្តរជាតិ
ជម្លោះ Nagorno-Karabakh៖ អាស៊ែបៃហ្សង់គំរាមប្រើមីស៊ីលកម្ទេចរដ្ឋធានី Hankendi
×
ថ្ងៃអង្គារនេះ រដ្ឋាភិបាលអាស៊ែបៃហ្សង់បានព្រមានថានឹងបាញ់មីស៊ីលកម្ទេចរដ្ឋធានី Hankendi នៃតំបន់ប្រកាសឯករាជ្យដោយខ្លួនឯង Nagorno-Karabakh បើសិនជាទ័ពអាមេនីមិនព្រមបញ្ឈប់ការវាយប្រហារដោយប្រើប្រាស់កាំភ្លើងធំលើទឹកដីរបស់ខ្លូនទៀត។ ជម្លោះប្រដាប់អាវុធរវាងភាគីទាំងពីរនេះកាន់តែធ្ងន់ធ្ងរ ហើយអាស៊ែបៃហ្សង់ក៏ប្រកាសថាខ្លួនបានកម្ទេចទីបញ្ជាការ មូលដ្ឋានទ័ពអាមេនីមួយកន្លែងផងដែរ។ នេះបើយោងតាមសារព័ត៌មានរុស្ស៊ី Sputnik ។
ជម្លោះប្រដាប់អាវុធរវាងអាស៊ែបៃហ្សង់ និង អាមេនីកាន់តែធ្ងន់ធ្ងរ ដោយភាគីបន្តប្រយុទ្ធគ្នាដោយប្រើប្រាស់អាវុធធុនធ្ងន់។ ចំណែកអាស៊ែបៃហ្សង់បានគំរាមថា នឹងបាញ់មីស៊ីលកម្ទេចរដ្ឋធានី Hankendi នៃតំបន់ប្រកាសផ្តាច់ខ្លួន សាធារណរដ្ឋ Nagorno-Karabakh នៅថ្ងៃអង្គានេះដែរ។
អ្នកនាំពាក្យក្រសួងការពារជាតិអាស៊ែបៃហ្សង់ Vagif Dargahl បានអះអាងថា កងទ័ពអាមេនីបានបន្តវាយប្រហារនៅតាមតំបន់ភាគឦសាន និងភាគអាគ្នេយ៍នៃតំបន់ Nagorno-Karabakh ដែលជាប់ប្រទេសទាំងពីរ។ ហើយស្ថានភាពជារួមមិនមានថមថយបន្តិចសោះ តែកាន់តែក្តៅនិងតានតឹងឡើង។
អ្នកនាំពាក្យខាងលើបានបន្តថា៖« យើងព្រមានជាមុនឲ្យហើយ ប្រសិនបើការវាយប្រហារលើលំនៅដ្ឋានប្រជាជននៅតាមបន្ទាត់ព្រំដែន Karabakh ដែលភ្ជាប់ប្រទេសទាំងពីរ រដ្ឋមន្ត្រីការពារជាតិបានដាក់បទបញ្ជារួចហើយថា ឲ្យកងទ័ពត្រៀមខ្លួនដើម្បីប្រើប្រាស់មីស៊ីលវាយកម្ទេចលើរដ្ឋធានី Hankendi »។
អ្នកនាំពាក្យខាងលើបានបន្តថា គ្រាន់តែក្នុងរយៈពេល ២៤ម៉ោង កងទ័ពអាមេនីបានវាយប្រហារដោយប្រើប្រាស់គ្រាប់ប្រភេទ ៦០,៨២ និង ១២០ មីលីម៉ែត្រ រួមជាមួយការគប់គ្រាប់បែកលើទីតាំងកងទ័ព និងលំនៅប្រជាជនចំនួនចំនួន១២០ដងក្រៅពីចោទព្រមាន និង ចោទប្រកាន់ ហើយកងទ័ពអាស៊ែបៃហ្សង់នោះក៏បានប្រកាសផងដែរថាខ្លួនបានកម្ទេចទីបញ្ជាការកណ្តាលមូលដ្ឋានទ័ពអាមេនីដែលស្ថិតនៅក្នុងទឹកដី Nagorno-Karabakh។ បើតាមសេចក្តីប្រកាសក្រសួងការពារជាតិអាស៊ែបៃហ្សង់ កងទ័ពខ្លួនបានកម្ទេចសម្ភារៈយោធារបស់កងទ័ពអាមេរិកចំនួន ២០ និងសម្លាប់ទ័ពអាមេនីប្រហែល ៧០នាក់។ តែអាស៊ែបៃហ្សង់ក៏បាត់បង់កងទ័ព ចំនួន ១៦នាក់ផងដែរ។
កាលពីចុងសប្តាហ៍នេះ ក្រោយជម្លោះប្រដាប់អាវុធផ្ទុះឡើងភ្លាមៗ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានបង្ហាញក្តីបារម្ភចំពោះការកើនកម្តៅនៃជម្លោះ ហើយលោកក៏ស្នើឲ្យភាគីទាំងពីរអត់ធ្មត់កុំប្រើប្រាស់កម្លាំងប្រឆាំងគ្នា។
សូមបញ្ជាក់ថា ជម្លោះនៅ Nagorno-Karabakh បានចាប់ផ្តើមឡើងនៅក្នុងឆ្នាំ ១៩៨៨ នៅពេលដែលតំបន់ស្វយ័តដែលគ្រប់គ្រងដោយជនជាតិអាមេនីនេះ ស្វែងរកការផ្តាច់ខ្លួនចេញពីសាធារណរដ្ឋអាស៊ែបៃហ្សង់។ ក្រោយមក ក្រោយសហភាពសូវៀតដួលរលំ តំបន់ស្វយ័តនេះបានសម្រេចប្រកាសឯករាជ្យតែម្តងតែម្តង តែមិនមានការទទួលស្គាល់ពីអន្តរជាតិឡើយ៕
© រក្សាសិទ្ធិដោយ thmeythmey.com