អន្តរជាតិ
ក្រោយបែកធ្លាយ «Panama Papers» ពលរដ្ឋអ៊ីស្លង់ទាមទារឲ្យនាយករដ្ឋមន្ត្រីចេញពីតំណែង ប្រជាជនអ៊ីស្លង់ (Iceland) រាប់ពាន់នាក់បាននាំគ្នាប្រមូលផ្តុំគ្នាបាតុកម្មតាមផ្លូវទាមទារឲ្យនាយករដ្ឋមន្ត្រីខ្លួនចុះចេញពីតំណែង ក្រោយឯកសារលេចធ្លាយរបស់ក្រុមហ៊ុនមេធាវីប៉ាណាម៉ា ចោទថា នាយករដ្ឋមន្ត្រីអ៊ីស្លង់លាក់លុយរាប់លានដុល្លារនៅបរទេស។ បាតុករសុំឲ្យសភាបោះឆ្នោតដកសេចក្តីទុកចិត្តប្រឆាំងលោកនាយករដ្ឋមន្ត្រី។
ក្រោយមានការទម្លាយឯកសារសម្ងាត់របស់ក្រុមហ៊ុន Mossack Fonseca ពាក់ព័ន្ធការលាក់លុយរបស់អ្នកនយោបាយ មេដឹកនាំនិងសែស្រឡាយ រួមទាំងតារា និងកីឡាករល្បីលើពិភពលោក ប្រជាជនអ៊ីស្លង់រាប់ពាន់នាក់កើតទុកមិនសុខចិត្តចេញតវ៉ាប្រឆាំងប្រមុខរដ្ឋាភិបាលខ្លួន។
លោកនាយករដ្ឋមន្ត្រីអ៊ីស្លង់ Sigmundur David Gunnlaugsson មានឈ្មោះក្នុងបញ្ជីឯកសារសម្ងាត់នេះដែរ ហើយលោកនិងភរិយាក៏រងការចោទប្រកាន់ថា បានប្រើប្រាស់ក្រុមហ៊ុននៅបរទេសដើម្បលាក់លុយខ្លួនរាប់លានដុល្លារឯណោះ។
បើតាមឯកសារបែកធ្លាប់ដែលចែកចាយនិងផ្សព្វផ្សាយដោយសមាគមអ្នកសារព័ត៌មានស៊ើបអង្កេតអន្តរជាតិ លោក Sigmundur David Gunnlaugsson និងភរិយាលោកស្រី Anna Sigurlaug Palsdottir បានទិញក្រុមហ៊ុន Wintris ដែលស្ថិតក្នុងក្រុមហ៊ុន British Virgin Islands នៅក្នុងឆ្នាំ ២០០៧ ។
ក្រោយមកលោកបានផ្ទេរទ្រព្យរបស់លោក ៥០ភាគរយទៅឲ្យភរិយាខ្លួន ដោយប្រើតម្លៃតំណាងត្រឹម ១ដុល្លារ ប៉ុណ្ណោះ។ ប៉ុន្តែក្រោយពេលលោកក្លាយជាសមាជិកសភាឆ្នាំ ២០០៩ លោកមិនបានប្រកាសអំពីភាគហ៊ុនដែលលោកមានក្នុងក្រុមហ៊ុនខាងលើឡើយ ដែលវាផ្ទុយច្បាប់អ៊ីស្លង់។
បើតាមសារព័ត៌មានបារាំង France 24 បាតុករដែលប្រមូលផ្តុំគ្នាម្សិលមិនមានលើស ១ម៉ឺននាក់ ហើយពួកគេបានស្នើសុំឲ្យបក្សប្រឆាំងបាតុកម្មប្រឆាំងនាយករដ្ឋមន្ត្រីបច្ចុប្បន្ននេះដែរដើម្បីបង្ខំឲ្យលោកចុះចេញពីតំណែង។ ពួកគេបានលើកបដាថា «សូមទទួលខុសត្រូវ», «ឯណាទៅរដ្ឋធម្មនុញ្ញថ្មី» ជាដើម ហើយរដ្ឋធម្មនុញ្ញថ្មីនោះសំដៅដល់រដ្ឋធម្មនុញ្ញអ៊ីស្លង់ដែលត្រូវបានព្រាងឡើងក្រោយវិបត្តិនយោបាយ ឆ្នាំ ២០០៩ ដែលមកទល់ពេលនេះហើយនៅជាប់ទ្រឹងនៅសភានៅឡើយ។
ប្រធានបក្ស Pirate ដែលប្រឆាំងធំបំផុតមួយរបស់អ៊ីស្លង់លោក Birgitta Jonsdottir បានថ្លែងម្សិលមិញថា « អ្វីដែលជារឿងធម្មជាតិនិងអ្វីដែលជារឿងរ៉ាវត្រឹមត្រូវដែលចាំបាច់ត្រូវធ្វើនៅពេលនេះគឺលាលែងពីតំណែងជានាយករដ្ឋមន្ត្រី។ យើងឃើញហើយពេលនេះ វាមានចលនាទាមទារទ្រង់ទ្រាយធំនិងខ្លាំងក្លាផងពីសំណាក់ប្រជាជនអ៊ីស្លង់ ហើយលោកនាយករដ្ឋមន្ត្រីក៏បាត់បង់រាល់ការទុកចិត្តនិងជឿជាក់ពីប្រជាជនដែរ»។
ស្របពេលដែលមានការទាមទារនេះ គណបក្សប្រឆាំងបានសម្រេចដាក់ញ្ញត្តិចួលក្នុងសភាដើម្បីស្នើឲ្យមានការបោះឆ្នោតដកសេចក្តីទុកចិត្តចំពោះនាយករដ្ឋមន្ត្រីខាងលើ។ ក្នុងចំណោមប្រជាជនអ៊ីស្លង់ ៣២ម៉ឺននាក់ មានប្រជាជនប្រហែល ២៨០០០នាក់រួចទៅហើយដែលបានចុះហត្ថលេខាលើញ្ញត្តិនោះ។
តាមពិតទៅភាគមេដឹកនាំនិងអ្នកនយោបាយភាគច្រើនទូទាំងពិភពលោកស្គាល់ក្រុមហ៊ុនមេធាវី Mossack Fonseca ច្បាស់ព្រោះក្រុមហ៊ុននេះធ្វើជាអន្តរការីដែលជួយឲ្យអ្នកនយោបាយឬមេដឹកនាំទាំងនោះផ្ទេរនិងលាក់លុយនៅបរទេសបានដោយសេរីដើម្បីគេចផុតពីការបង់ពន្ធជាដើម។ វាស្រួលត្រង់ថា អត្តសញ្ញាអតិថិជនមិនត្រូវបានគេទម្លាយឲ្យដឹងឡើយ ហើយការតម្រូវឲ្យត្រួតពិនិត្យប្រវត្តិរូបអតិថិជនក៏គ្មានដែរ។ ដូច្នេះប្រើប្រាស់លុយកខ្វក់ លុយបានមកពីពុករលួយ ឬប្រព្រឹត្តបទឧក្រិដ្ឋក៏អាចចរាចរបានដោយងាយដែរ៕
© រក្សាសិទ្ធិដោយ thmeythmey.com