ចិន ចាត់វិធានការក្តៅហ៊ុមព័ទ្ធសេដ្ឋកិច្ចកូរ៉េខាងជើង ក្រោយដាស់តឿនច្រើនដងមិនស្តាប់

អន្តរជាតិ

នយោបាយអន្តរជាតិ

ចិន ចាត់វិធានការក្តៅហ៊ុមព័ទ្ធសេដ្ឋកិច្ចកូរ៉េខាងជើង ក្រោយដាស់តឿនច្រើនដងមិនស្តាប់

06, Apr 2016 , 10:24 am

រូបភាព

លោកប្រធានាធិបតីកូរ៉េខាងជើង ក្នុងឱកាសនៃការធ្វើសមយុទ្ធថ្ងៃទី២៥ ខែមីនា ឆ្នាំ២០១៦

ដោយ:

ទំនងជាការក្រើនរម្លឹករបស់ចិនលែងមានឥទ្ធិពលហើយបានជារដ្ឋាភិបាលក្រុងប៉េកាំង សម្រេចប្រកាស រឹតត្បិតលើពាណិជ្ជកម្មទាំងការនាំចេញ និងការនាំចូលជាមួយនឹងរដ្ឋាភិបាលក្រុងព្យុងយ៉ាង។ ការរឹត ត្បិតនេះ ត្រូវបានមើលឃើញថាជាចំណាត់ការមួយថ្មីរបស់ចិនក្នុងការអនុវត្តសេចក្តីសម្រេចរបស់ក្រុមប្រឹក្សាសន្តិសុខប្រឆាំងកូរ៉េខាងជើង ។

រដ្ឋាភិបាលក្រុងប៉េកាំង នៅថ្ងៃទី០៥ ខែមេសា ម្សិលមិញនេះ បានប្រកាសរឹតត្បិតលើការនាំចូលដោយ ហាមមិនឲ្យមានការទិញធ្យូងថ្ម មាស រ៉ែ និងវត្ថុធាតុដើមមួយចំនួនផ្សេងទៀតពីកូរ៉េខាងជើង។ រីឯការ នាំចេញវិញ គឺមិនមានសាំងយន្តហោះ នាំចេញទៅកូរ៉េខាងជើងឡើយ។

ក្រសួងពាណិជ្ជកម្មចិន បានបញ្ជាក់នៅក្នុងសេចក្តីថ្លែងការណ៍មួយលើគេហទំព័ររបស់ខ្លួនថា ការហាមឃាត់នេះ ធ្វើឡើងដោយយោងតាមសេចក្តីរបស់ក្រុមប្រឹក្សាសន្តិសុខអង្គការសហប្រជាជាតិ។ នេះបើយោងតាមភា្នក់ងារព័ត៌មាន Xinhua ដែលបានបន្ថែមដែលថា ការហាមឃាត់នោះ គឺមានប្រសិទ្ធ ភាពទៅលើតែពាណិជ្ជកម្មទាំងឡាយណាដែលជាប់ពាក់ព័ន្ធកម្មវិធីនុយក្លេអ៊ែរ ឬមីស៊ីលកូរ៉េខាងជើងប៉ុណ្ណោះនោះទេ តែ សម្រាប់ការនាំចូលធ្យូងថ្ម សម្រាប់ការប្រើប្រាស់ស៊ីវិលគឺបន្តធ្វើដូចធម្មតា។

សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក។

សេចក្តីសម្រេច ក៏បានបញ្ញត្តិឲ្យសមាជិកទាំងអស់តម្រូវឲ្យមានការត្រួតពិនិត្យលើទំនិញទាំងអស់ដែលនាំចេញនិងនាំចូលពីកូរ៉េខាងជើង មិនថាធ្វើឡើយតាមផ្លូវអាកាសឬសមុទ្រ កំណត់ពីការហាមឃាត់ការនាំចេញធ្យូងថ្ម ដែក មាស និងរ៉ែមានតម្លៃដទៃទៀត ពីកូរ៉េខាងជើងផងដែរ ដែលនេះគឺសំដៅដល់ការកាត់ផ្ដាច់ធនធានហិរញ្ញវត្ថុរបស់ក្រុងព្យុងយ៉ាង។

ក្រុមប្រឹក្សាសន្តិសុខក៏ពង្រឹងលើការហាមធ្វើពាណិជ្ជកម្មអាវុធ ជាពិសេសអាវុធធុនស្រាល និងបានអនុញ្ញាតឲ្យឃាត់កប៉ាល់ដែលសង្ស័យថា មានដឹកទំនិញខុសច្បាប់ទៅកូរ៉េខាងជើង។ សូម្បីនាឡិកាទំនើប ដូចជាសម្ភារៈកីឡាក៏ត្រូវបានហាមឃាត់ចូលទៅកូរ៉េខាងជើងផងដែរ ដែលការហាមឃាត់នេះសំដៅដល់ក្រុមមេដឹកនាំជាន់ខ្ពស់កូរ៉េខាងជើង។ លើសពីនេះទៅទៀត ប្រទេសជាសមាជិកអង្គការសហប្រជាជាតិមានសិទ្ធិបណ្ដេញអ្នកការទូត កូរ៉េខាងជើង ដែលពាក់ព័ន្ធនឹងការរត់ពន្ធអាវុធខុសច្បាប់ផងដែរ។

យ៉ាងណាក៏ដោយ មុននឹងឈានមកដល់ការដាក់កំហិតពាណិជ្ជកម្មរបស់រដ្ឋាភិបាលក្រុងប៉េកាំងលើរដ្ឋាភិបាលក្រុងព្យុងយ៉ាង ចិន ក៏ធ្លាប់ដាស់តឿនកូរ៉េខាងជើងជុំវិញសកម្មភាពដ៏គឃ្លើនជាបន្តបន្ទាប់ផង ដែរ។ នៅថ្ងៃទី២១ ខែមីនាកន្លងទៅ រដ្ឋាភិបាលចិន បានអះអាងថា ចិន ពិតជាព្រួយបារម្ភអំពីស្ថានភាពនៅក្នុងឧបទ្វីបកូរ៉េ។ ហើយ ចិនសង្ឃឹមថា កូរ៉េខាងជើង ធានាឲ្យបាននូវសកម្មភាពរបស់ខ្លួនដោយមិនបំពានទៅនឹងសេចក្តីសម្រេចរបស់អង្គការសហប្រជាជាតិ៕