អត្ថបទពាណិជ្ជកម្ម
ប៉ូលិសស្វ៊ីសសម្រុកចូលស្នាក់ការ UEFA ខណៈរឿងអាស្រូវ Panama Papers រាលដាលខ្លាំង
× ប៉ូលិសស្វ៊ីសបានឆ្មក់ចូលទីសា្នក់ការរបស់ UEFA ដើម្បីរឹបអូសព័ត៌មានទាក់ទងនឹងកិច្ចព្រមព្រៀងមួយ ដែលលេចធ្លាយតាមរយៈឯកសារ Panama Papers ត្រូវបានចុះហត្ថលេខាដោយលោក Gianni Infantino ដែលជាប្រធានសហព័ន្ធកីឡាបាល់ទាត់ពិភពលោក FIFA ។ ការវាយឆ្មក់កើតឡើង នៅចំពេលដែលរឿងអាស្រូវពាក់ព័ន្ធនឹងការបែកធ្លាយឯកសារ Panama Papers កំពុងតែរីករាលដាលដល់មេដឹកនាំជាច្រើននៅជុំវិញពិភពលោក។
រឿងរ៉ាវបែកធ្លាយឯកសារ Panama Papers កំពុងតែជ្រៀតចូលដល់ស្ថាប័នកីឡា ខណៈដែលប៉ូលិសស្វ៊ីសបានសម្រុកចូលសា្នក់ការសហព័ន្ធកីឡាបាល់ទាត់ទ្វីបអឺរ៉ុប (UEFA)។ គោលបំណងឆ្មក់ចូល គឺស្វែងរកព័តមានស្ដីពីកិច្ចព្រមព្រៀងមួយដែលធ្លាយចេញពី Panama Paper ហើយមានហត្ថលេខារបស់ប្រធាន FIFA លោក Gianni Infantino។
នេះមានន័យថា ប្រធានFIFA រូបនេះនឹងចូលក្នុងបញ្ជីនៃមេដឹកនាំពិភពលោកដែលជាប់ពាក់ព័ន្ធនិងការលាក់ទុកហិរញ្ញវត្ថុ ក្រោយការលេចធ្លាយឯកសារចំនួនជាង១១លានទំព័រ។ យ៉ាងណាមិញ លោក Gianni Infantino បង្ហាញការស្រងាកចិត្តយ៉ាងខ្លាំងចំពោះការសង្ស័យលើសុច្ចរិតភាពរបស់លោកពីសំណាក់សារព័ត៌មាន។ របាយការណ៍ជាច្រើនផ្សាយថា កិច្ចព្រមព្រៀងស្ដីពីសិទ្ធិផ្សាយផ្ទាល់ដែលលោក Infantino ចុះហត្ថលេខានៅប៉ុន្មានឆ្នាំមុនក្នុងនាមជាមន្ត្រីFIFA ត្រូវបានលក់ក្នុងតម្លៃថោក ហើយត្រូវបានក្រុមហ៊ុនលើកបន្តក្នុងតម្លៃខ្ពស់។
បន្ទាប់ពីការឆ្មក់ចូលរបស់ប៉ូលិស UEFA បានចេញថ្លែងការណ៍មួយបញ្ជាក់ពីរឿងនេះ ដោយនិយាយថា៖« UEFA អាចបញ្ជាក់បានថា យើងបានទទួលមន្ត្រីសហព័ន្ធស្វ៊ីស ដែលមកស្នាក់ការដើម្បីស្វែងរកកិច្ចសន្យារវាងUEFA និងក្រុមហ៊ុន Cross Trading/Teleamazonas។ ក្នុងសេចក្ដីថ្លែងការណ៍ដដែល លោក Infantino និយាយដែរថា កិច្ចសន្យានោះគឺធ្វើតាមបែបបទត្រឹមត្រូវ។
សូមបញ្ជក់ថា ឯកសារកម្រាស់ ១១.៥លានច្បាប់របស់ក្រុមហ៊ុន Mossack Fonseca ដែលបង្ហាញពីវិធីលាងលុយ លាក់លុយ ឲ្យរួចផុតពីការបង់ពន្ធរបស់អ្នកនយោបាយ មេដឹកនាំពិភពលោក កីឡាករ តារាសម្តែងល្បីៗ បានបង្ខំឲ្យរដ្ឋាភិបាលជាច្រើនលើពិភពលោកខ្នះខ្នែងស៊ើប អង្កេតនិងត្រួតពិនិត្យតើរឿងរ៉ាវនេះកើតឡើងយ៉ាងដូចម្តេច ឬមានជាប់ពាក់ព័ន្ធជាមួយប្រជាជនឬក្រុមហ៊ុនរបស់ខ្លួនឬអត់។
ប្រទេសជាច្រើននៅជុំវិញពិភពលោកតួយ៉ាង ប្រទេស សិង្ហបុរី ប៉ាគីស្ថាន អូស្ត្រាលី ណូវែលសេឡង់ និងបណ្តាប្រទេសជាច្រើនទៀតនៅអឺរ៉ុបដូចជាបារាំងផងនោះបានប្រកាសត្រួតពិនិត្យនិងបើកការស៊ើបអង្កេតពាក់ព័ន្ធឯកសារបែកធ្លាយនេះផងដែរ៕
Tag:
ស្វ៊ីស
UEFA
Panama papers
© រក្សាសិទ្ធិដោយ thmeythmey.com