អន្តរជាតិ
លោកថាក់ស៊ីន៖ អ្នកនយោបាយត្រូវស្រលាញ់ប្រជាជន បើមិនដូច្នោះលទ្ធិប្រជាធិបតេយ្យនឹងស្លាប់ ប្រភពរូបភាព៖ គណនីហ្វេសប៊ុក Pheu Thai Party
× ក្រោយលាក់មុខក្រៅប្រទេសអស់រយៈពេលប្រមាណជាងពីរឆ្នាំដោយមិនពាក់ព័ន្ធនឹងកិច្ចការនយោបាយអតីតនាយករដ្ឋមន្ត្រីថៃ លោក ថាក់ស៊ីន ស៊ីនណាវ៉ាត់ត្រា (Thaksin Sinawattra) បានបង្ហាញក្តីសង្ឃឹមជាថ្មីទៅកាន់អ្នកគាំទ្ររូបលោកដោយលោកបានចេញមុខជាថ្មីជួបប្រជាជន។ ជាមួយគ្នានេះ ខណៈសង្ក្រានឆ្នាំថ្មីកាន់តែខិតជិតមកដល់ លោក ថាក់ស៊ីន បានព្រមានអ្នកនយោបាយត្រូវស្រលាញ់ប្រជាជន បើពិតជាស្រលាញ់លទ្ធិប្រជាធិបតេយ្យ។
«អ្នកនយោបាយ ត្រូវតែស្រលាញ់ប្រជាជន។ ប្រសិនបើពួកគេមិនស្រលាញ់ប្រជាជននោះទេ លទ្ធិប្រ ជាធិបតេយ្យ នឹងត្រូវស្លាប់ជាក់ជាពុំខាន»។ នេះគឺជាសារបស់លោកអតីតនាយករដ្ឋមន្ត្រីថៃថាក់ស៊ីន ស៊ីនណាវ៉ាត់ត្រាជាមួយនឹងអ្នកគាំទ្ររបស់លោកតាមរយៈវីដេអូ Skype នៅថ្ងៃទី០៧ ខែមេសាម្សិលមិញ ដែលបានរាយការណ៍ដោយសារព័ត៌មានបាងកកប៉ុស្តិ៍។
ក្នុងសន្និសីទវីដេអូ នាឱកាសសង្ក្រានឆ្នាំថ្មី ដែលមានការចូលរួមពីអ្នកគាំទ្រប្រមាណជាង១០០នាក់ លោកថាក់ស៊ីន ដែលកំពុងរស់នៅនិរទេសក្រៅប្រទេស បានទាំងផ្ញើសារជូនពរទៅកាន់អ្នកគាំទ្របក្សភឿ ថៃផង ក៏ដូចជាព្រមានពីស្ថានភាពសេដ្ឋកិច្ចប្រទេសដែលកំពុងតែដឹកនាំដោយរដ្ឋាភិបាលយោធាផងដែរ។
លោក ថាក់ស៊ីន ថា «បច្ចុប្បន្នប្រជាជនយើង កំពុងតែស្ថិតនៅក្នុងស្ថានភាពដ៏ពិបាកមួយ ហើយនោះ ក៏ព្រោះតែសេដ្ឋកិច្ចទន់ខ្សោយ»។ នេះបើយោងប្រភពព័ត៌មានដដែលដែលបានដកស្រង់សម្តីរបស់លោកដែរ ថាលោក ថាក់ស៊ីន បានអរគុណអ្នកនយោបាយសម្រាប់ការខិតខំកន្លងមក ហើយលោក បាននិងកំពុងតែតាមដាននិងរក្សានូវអ្វីដែលបក្សកំពុងធ្វើ។ លោក ថា ក្នុងវ័យ៦៧ឆ្នាំ រូបលោកនៅតែមានសុខភាពល្អ និងអាចដើរបានរាប់គីឡូម៉ែតផងដែរនោះ។
សូមរម្លឹកផងដែរ កាលពីពេលថ្មីៗនេះ លោកថាក់ ស៊ីន ក៏បានផ្ញើសារព្រមានទៅកាន់របបសឹកដែលត្រូវបានមើលឃើញថាជា«យុទ្ធនាការណ៍ព័ត៌មាន»។ នោះគឺលោក បានផ្តល់ឱកាសឲ្យសារព័ត៌មាន បរទេសជាលើកដំបូងក្រោយពីលោក បានរក្សាភាពស្ងប់ស្ងាត់អស់ជាង២ឆ្នាំហើយនោះ។ ហើយសារ នោះដែរ រួមបញ្ចូលទាំងបញ្ហាចម្រូងចម្រាសនៃសេចក្តីព្រាងរដ្ឋធម្មនុញ្ញថ្មី សេដ្ឋកិច្ច និងលទ្ធិប្រជាធិប តេយ្យ។
ក្រៅពីការជួបសំណេះសំណាលតាមវីដេអូ ថ្មីៗនេះអតីតនាយករដ្ឋមន្ត្រីថៃបងប្អូនពីនាក់ លោកថាក់ ស៊ីន ស៊ីនណាវ៉ាត់ត្រានិង លោកស្រីយីងឡាក់ ស៊ីនណាវ៉ាត់ត្រា ក៏បានផ្ញើសារតាមរយៈគណនីហ្វេស ប៊ុកផងដែរ។ សារលោកថាក់ស៊ីន បាននិយាយថា «ក្នុងឱកាសនៃបុណ្យសង្គ្រានឆ្នាំថ្មី ខ្ញុំ នឹកអ្នក, បងប្អូនប្រុសស្រី។ ខ្ញុំពិតជាចង់ជួយអ្នកដោះស្រាយបញ្ហា ប៉ុន្តែឥលូវ អ្វីដែលខ្ញុំអាចធ្វើគឺផ្តល់អ្នកនូវក្តី ការគាំទ្រ ស្រលាញ់ និងសេចក្តីគោរព»។ រីឯសាររបស់លោកស្រីយីងឡាក់ បានត្រឹមតែនិយាយថា «ក្នុងឱកាសសង្ក្រានឆ្នាំថ្មី សូមជូនពរឲ្យជួបតែសុភមង្គល និងជោគជ័យជាមួយនឹងកិច្ចការ»។
សួមបញ្ជាក់ផងដែរថា អតីតនាយករដ្ឋមន្ត្រីថៃក្រកូលស៊ីនណាវ៉ាត់ត្រា សុទ្ធសឹងតែបាត់បង់តំណែងដោយសារតែរដ្ឋប្រហារយោធា។ លោក ថាក់ស៊ីន បានធ្លាក់ពីតំណែងនៅក្នុងឆ្នា២០០៦។ នៅឆ្នាំ ២០០៨ លោក ត្រូវបានតុលាការចោទប្រកាន់ពីបទប្រព្រឹត្តអំពើពុករលួយ។ សម្រាប់លោកស្រីយីងឡាក់វិញ បានធ្លាក់ពីតំណែងដោយសាររដ្ឋប្រហារយោធាថ្ងៃទី២២ ខែឧសភា ឆ្នាំ២០១៤ ដែលដឹកនាំ ដោយលោកឧត្តមសេនីយ៍ប្រាយុទ្ធ ច័ន្ទអូចា។ លោកស្រី ត្រូវបានសភាថៃផ្អាកលតំណែងនយោបាយរយៈពេល៥ឆ្នាំ និងកំពុងតែជាប់ពីបទចោទរបស់តុលាការលើបទពុករលួយដែលប្រឈមនឹងទោស ពន្ធនាគារយ៉ាងតិច១០ឆ្នាំផងដែរ៕
© រក្សាសិទ្ធិដោយ thmeythmey.com