អន្តរជាតិ
លោក ម៉ាឌូរ៉ូ គំរាមកាត់បន្ថយអាណត្តិសភាពី ៥ឆ្នាំមក ៦០ថ្ងៃវិញ
× ប្រធានាធិបតីវ៉េណស៊ុយឡាលោក នីកូឡាស ម៉ាឌូរ៉ូ (Nicolas Maduro) បានគំរាមធ្វើវិសោធនកម្មរដ្ឋធម្មនុញ្ញប្រទេស ដើម្បីកាត់បន្ថយអាណត្តិសភាដែលបច្ចុប្បន្ននេះគ្រប់គ្រងដោយបក្សប្រឆាំង។ លោកក៏ប្រកាសដឹកនាំបដិវត្តន៍ ប្រសិនបើបក្សប្រឆាំងផ្ដួលរំលំរូបលោកចេញពីតំណែងប្រធានាធិបតីនោះ។
ក្នុងការប្រមូលផ្ដុំមួយនៅថ្ងៃទី៧ ខែមេសា មេដឹកនាំសង្គមនិយមវ៉េណេស៊ុយអេឡា នីកូឡាស ម៉ាឌូរ៉ូ គំរាមថា លោកនឹងធ្វើវិសោធនកម្មរដ្ឋធម្មនុញ្ញប្រទេស ដោយកាត់បន្ថយអាណត្តិសភាដែលគ្របដណ្ដប់ដោយបក្សប្រឆាំងពី៥ឆ្នាំមក៦០ថ្ងៃវិញ។ លោកក៏ព្រមានដែរថា លោកនឹងធ្វើបដិវត្តន៍ប្រសិនបើបក្សប្រឆាំងបណ្ដេញលោកចេញពីកៅអីប្រធានាធិបតី។
ការលើកឡើងខ្លាំងរបស់លោក ម៉ាឌូរ៉ូ ជះផលយ៉ាងខ្លាំងដល់វិបត្តិនយោបាយនៅវេណេស៊ុយអេឡាដែលកំពុងតែប្រេះឆាស្រាប់ផង នៅក្រោយពេលដែលក្រុមបក្សប្រឆាំងឈ្នះការបោះឆ្នោតសភាក្នុងខែធ្នូ ឆ្នាំ២០១៥។ បន្ទាប់ពីទទួលជោគជ័យ ក្រុមប្រឆាំងក៏ស្វះស្វែងទម្លាក់ប្រធានាធិបតី ម៉ាឌូរ៉ូ ចេញពីតំណែង។
ឆ្លៀតពេលប្រមូលផ្ដុំនោះ មេធាវីគាំទ្ររដ្ឋាភិបាលលោក Hermann Escarra និយាយថា លោក ម៉ាឌូរ៉ូ នឹងកែប្រែរដ្ឋធម្មនុញ្ញ។ ចំណែកឯលោក ម៉ាឌូរ៉ូ តបថា លោកនឹងពិនិត្យរឿងនេះឲ្យដិតដល់ ខណៈលោកនិងបាតុករប្រឆាំងរាប់ពាន់នាក់ប្រមូលផ្ដុំគ្នា ដើម្បីប្រឆាំងនិងច្បាប់របស់សភាដែលចង់ដោះលែងសកម្មជនប្រឆាំង។ លោកបន្តថា ប្រសិនបើរកមើលឃើញពីលទ្ធភាពកម្ចាត់ការធ្វើរដ្ឋប្រហារ និងការប្រើសភា លោកនឹងចេញសកម្មភាពបើប្រជាជនគាំទ្ររូបលោក។
ជុំវិញបញ្ហានេះដែរ តុលាការកំពូលដែលលំអៀងទៅរករដ្ឋាភិបាលលោក ម៉ាឌូរ៉ូ បានទាត់ចោលសំណើរបស់សភា។ ជាមួយគ្នានេះ គណៈកម្មាធិការបោះឆ្នោតជាតិក៏លូកដៃចូលរឿងនេះដែរ ដោយបានបដិសេធបំណងបក្សប្រឆាំងដែលចង់ស្នើធ្វើប្រជាមតិនៅឆ្នាំនេះផងដែរ។ ប៉ុន្តែ ផែនការវិសោធនកម្មរបស់លោក ម៉ាឌូរ៉ូ ដែលសំដៅកាត់បន្ថយអាណត្តិសសភា ក៏ត្រូវការបោះឆ្នោតជាតិដូចគ្នាដែរ។
សូមរម្លឹកថា ចាប់តាំងពីឡើងកាន់អំណាចនៅឆ្នាំ២០១៣ លោក នីកូឡាស ម៉ាឌូរ៉ូ បានចោទអាមេរិកនិងក្រុមប្រឆាំងថា ប៉ុនប៉ងធ្វើរដ្ឋប្រហារទម្លាក់លោកពីតំណែង។ លោកក៏បានចោទប្រកាន់គូសត្រូវថា ធ្វើសង្គ្រាមសេដ្ឋកិច្ចប្រឆាំងរូបលោក ទោះជាអ្នករិះគន់អះអាងថា គោលនយោបាយសង្គមនិយមជាមូលហេតុនៃការធ្លាក់យ៉ាងខ្លាំងសេដ្ឋកិច្ចវ៉េណេស៊ុយអេឡា និងការខ្វះខាតធ្ងន់ធ្ងរ៕
Tag:
វ៉េណេស៊ុយអេឡា
Nicolas Maduro
© រក្សាសិទ្ធិដោយ thmeythmey.com