អន្តរជាតិ
នយោបាយអន្តរជាតិ
អតីតនាយករដ្ឋមន្ត្រីណូវែលសេឡង់ប្រជែងកៅអីអគ្គលេខាអង្គការសហប្រជាជាតិ
×
អតីតនាយករដ្ឋមន្ត្រីណូវែលសេឡង់លោកស្រី Helen Clark បានសម្រេចចិត្តចូលរួមប្រជែងយកតំណែងកៅអីអគ្គលេខាធិការអង្គការសហប្រជាជាតិ ជំនួសលោក បាន គីមូន ដែលនឹងផុតអាណត្តិរបស់លោកនៅឆ្នាំនេះ។ លោកស្រីបានលើកឡើងពីសមត្ថភាពដឹកនាំរបស់លោកស្រីក្នុងការដឹកនាំណូវែលសេឡង់ ខណៈលោកស្រីចង់ក្លាយជាស្ត្រីទីមួយដែលគ្រប់គ្រងតំណែងកំពូលនេះ។
នៅស្របពេលដែលអគ្គលេខាធិការអង្គការសហប្រជាជាតិបច្ចុប្បន្នលោក បាន គីមូន នឹងត្រវចប់ការងារនៅឆ្នាំ២០១៦ មានបេក្ខជនជាច្រើនបានបញ្ចេញពីបំណងក្នុងការកាន់តំណែងសំខាន់នេះ។ អតីតនាយករដ្ឋមន្ត្រីណូវែលសេឡង់លោកស្រី Helen Clark បានបញ្ជាក់ពីជំហររបស់លោកស្រី សម្រាប់កៅអីអគ្គលេខាធិការនេះ។
ក្នុងកិច្ចសម្ភាសជាមួយទីភ្នាក់ងារព័ត៌មានAFP លោកស្រី Clark និយាយថា លោកស្រីនឹងឈរជាបេក្ខជនម្នាក់ ព្រោះលោកស្រីមានបទពិសោធដឹកនាំជិតបីទសវត្សរ៍ ទាំងក្នុងស្រុកនិងនៅឯអង្គការសហប្រជាជតិផ្ទាល់។ លោកបន្តថា លោកស្រីមានបទពិសោធ ព្រមទាំងសមត្ថភាពដើម្បីរ៉ាប់រ៉ងការងារនេះ។
សូមបញ្ជាក់ថា សព្វថ្ងៃនេះ លោកស្រី Helen Clark ជាស្ត្រីមានតួនាទីខ្ពស់ជាងគេនៅអង្គការសហប្រជាជាតិ។ លោកស្រីជាប្រធានកម្មវិធីអភិវឌ្ឍន៍សហប្រជាជាតិ (UNDP) ហើយលោកស្រីទទួលខុសត្រូវលើការងារអភិវឌ្ឍន៍នេះអស់រយៈពេល៧ឆ្នាំមកហើយ។
យ៉ាងណាក្ដី វាមិនជារឿងងាយស្រួលនោះទេ សម្រាប់អតីតនាយករដ្ឋមន្ត្រីរូបនេះក្នុងការដណ្ដើមកៅអីកំពូលមួយនេះ។ លោកស្រីត្រូវប្រជែងជាមួយបេក្ខជនដទៃទៀត ខណៈមានបេក្ខជន៦រួបផ្សេងទៀត ក៏ចង់បានតំណែងនេះដែរដូចជាប្រមុខ UNESCO លោកស្រី Irina Bokova មកពីប៊ុលហ្ការី និងអតីតស្នងការទទួលបន្ទុកជនភៀសខ្លួនលោក Antonio Guterres មកពីព័រទុយហ្កាល់ ដែលសុទ្ធសឹងជាបេក្ខជនមានសក្ដានុពល។
ប៉ុន្តែគេមើលឃើញថាលោកស្រី Helen Clark គឺជាបេក្ខជនគួរកត់សម្គាល់មួយរួប។ អ្នកការទូតនៅអង្គការសហប្រជាជាតិយល់ថា លោកស្រីជាបេក្ខជនសមស្របសម្រាប់តំណែងខ្ពង់ខ្ពស់នេះ តែគេត្រូវមើលថា លោកស្រីអាចទាញយកការគាំទ្រពីសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខបានឬទេ។
រុស្សីបាននិយាយហើយថា អគ្គលេខាធិការបន្ទាប់គួរតែមកពីតំបន់អឺរ៉ុបខាងកើត ដ្បិតតំបន់នេះមិនទាន់មានអ្នកណាធ្លាប់កាន់តំណែងនេះនៅឡើយទេ តាំងពីការបង្កើតអង្គការសហប្រជាជាតិមកនោះ។ ចំណែកចក្រភពអង់គ្លេសបញ្ជាក់ថា ខ្លួននឹងគាំទ្របេក្ខជនស្ត្រីសម្រាប់ការងារនេះ។
ក្រុមប្រឹក្សាសន្តិសុខអង្គការសហប្រជាជាតិនឹងសម្រេចជ្រើសយកបេក្ខជនណាម្នាក់នៅខែកក្កដាខាងមុខ បន្ទាប់ពីការពិនិត្យក្ខណៈសម្បត្តិជាសាធារណៈរបស់បេក្ខជននីមួយៗដោយមហាសន្និបាតដែលធ្វើឡើងនៅខែមេសានេះ។ ក្រោយពីក្រុមប្រឹក្សាសន្តិសុខជ្រើសរើសបេក្ខជនរួចរាល់ មហាសន្និបាតនឹងសម្រេចចិត្តចុងក្រោយលើបេក្ខជនដែលត្រូវបានជ្រើសរើស ដែលនឹងក្លាយជាអគ្គលេខាធិការអង្គការសហប្រជាជាតិសម្រាប់អាណត្តិប្រាំ បន្តពីលោក បាន គីមូន។ អគ្គលេខាធិការថ្មី នឹងត្រូវចូលកាន់តំណែងនៅថ្ងៃទី១ ខែមករា ឆ្នាំ២០១៧ ខាងមុខ៕
Tag:
Helen Clark
អង្គការសហប្រជាជាតិ
© រក្សាសិទ្ធិដោយ thmeythmey.com