ជាតិ
ប្រភពរូបភាព៖ គេហទំព័រ ASEAN Center of Military Medicine
×![]()
ដោយ: ថ្មីៗ
មជ្ឈមណ្ឌលវេជ្ជសាស្ត្រយោធាអាស៊ាន (ACMM) បានដាក់ដំណើរការជាផ្លូវការនៅថ្ងៃទី០៧ ខែមេសា ក្នុងក្រុងបាងកក នៃប្រទេសថៃហើយ។ មជ្ឈមណ្ឌលនេះ បង្កើតឡើងដើម្បីជំរុញកិច្ចសហប្រតិបត្តិការ លើវិស័យវេជ្ជសាស្ត្រយោធា ក្នុងការអភិវឌ្ឍនូវផែនការឆ្លើយតបរួមផ្នែកវេជ្ជសាស្ត្រ ការដំណើរការនូវ តម្រូវផ្នែកវេជ្ជសាស្ត្រក្នុងស្ថានភាពមានអាសន្ន ក៏ដូចជាការដាក់អនុវត្តវគ្គបណ្តុះបណ្តាល និស្រាវជ្រាវ បន្ទាន់លើសេវាកម្មវេជ្ជសាស្ត្រផងដែរ។
នាឱកាសនៃការបើកសម្ពោធនៃមជ្ឈមណ្ឌលវេជ្ជសាស្ត្រយោធាអាស៊ាន លោកអគ្គលេខាធិការអាស៊ាន Le Luong Minh បានបញ្ជាក់ថាការដាក់ដំណើរការមជ្ឈមណ្ឌលនេះ បានបង្ហាញឆន្ទៈរបស់សមាជិកអាស៊ានក្នុងការលើកកម្ពស់កិច្ចសហប្រតិបត្តិការពិតប្រាកដនៃសេវាកម្មវេជ្ជសាស្ត្រយោធាក្នុងតំបន់។ នេះបើយោងតាមសេចក្តីប្រកាសព័ត៌មានរបស់អគ្គលេខាអាស៊ានដែលចុះផ្សាយនៅថ្ងៃទី០៨ ខែមេសាម្សិលមិញ។
ក្នុងឱកាសដដែលនោះ លោក Le Luong Minh ក៏បានសង្កត់ធ្ងន់ដែរថា តាមរយៈកិច្ចសហប្រតិបត្តិការវេជ្ជសាស្ត្រយោធាជាក់លាក់ ACMM នឹងលើកកម្ពស់បន្ថែមលើជំនួយមនុស្សធម៌ និងការជួយបន្ធូរបន្ថយគ្រោះមហន្តរាយក្នុងក្រោមខណ្ឌតំបន់។ ជាមួយគ្នានេះ ACMM ក៏នឹងជួយបំពេញបន្ថែមការងារនៃមជ្ឈមណ្ឌលសម្របសម្រួលអាស៊ានលើជំនួយមនុស្សធម៌ ក្នុងការបង្កើនយន្តការឆ្លើយតប និងសម្របសម្រួលក្នុងតំបន់ផងដែរ។
សូមបញ្ជាក់ផងដែរថា សមាគមប្រជាជាតិអាស៊ីអាគ្នេយ៍ ឬហៅកាត់ថាអាស៊ាន ត្រូវបានបង្កើតឡើងនៅថ្ងៃទី០៨ ខែសីហា ឆ្នាំ១៩៦៧។ បច្ចុប្បន្នស្ថាប័ននេះ មានសមាជិកសរុប១០ប្រទេសរួមមានព្រុយណេ កម្ពុជា ឥណ្ឌនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និង វៀតណាម។
ជាមួយគ្នានេះ ការដាក់ដំណើរនៃមជ្ឈមណ្ឌលវេជ្ជសាស្ត្រយោធាអាស៊ាននេះដែរ ត្រូវបានបង្កើតឡើង ក្រោមផែនការមេនៃសហគមន៍សន្តិសុខ-នយោបាយអាស៊ាន២០២៥ (APSC Blueprint ) ដែលជាគោលការណ៍នៃសសរស្តម្ភមួយនៃសសរស្តម្ភទាំងបីរបស់អាស៊ានដែលបានអនុម័តដោយមេដឹកនាំ អាស៊ាននៅខែវិច្ឆិកាឆ្នាំ២០១៥កន្លងទៅផងដែរ។ សសរស្តម្ភទាំងបីរបស់អាស៊ានរួមមាន សហគមន៍សេដ្ឋកិច្ច សហគមន៍សន្តិសុខ-នយោបាយ និងសហគមន៍សង្គម-វប្បធម៌៕
Tag:
អាស៊ាន
ACMM
© រក្សាសិទ្ធិដោយ thmeythmey.com
