អន្តរជាតិ
នយោបាយអន្តរជាតិ
កងទ័ពជើងអាកាសឥណ្ឌូនេស៊ីត្រៀមពង្រាយកងកម្លាំងពិសេសបួនអង្គភាព ទៅកាន់កោះ Natuna Besar
×
កងទ័ពជើងអាកាសឥណ្ឌូនេស៊ីត្រៀមពង្រាយកងកម្លាំងពិសេសបួនអង្គភាព ហើយមានបំពាក់ជាមួយប្រព័ន្ធមីស៊ីលការពារដែនអាកាស និងយន្តហោះចម្បាំងផងទៅកាន់កោះ Natuna Besar ដែលស្ថិតក្នុងតំបន់សមុទ្រចិនខាងត្បូង។ ឥណ្ឌូនេស៊ីមិនមែនជាភាគីជម្លោះសមុទ្រចិនខាងត្បូងទេ ប៉ុន្តែផែនទីដែលគូសជាលក្ខណៈឯកតោភាគីរបស់ចិនបានគ្របដណ្តប់លើកោះរបស់ឥណ្ឌូនេស៊ីខាងលើដែរ។
កងទ័ពជើងអាកាសឥណ្ឌូនេស៊ីមានផែនការពង្រាយកងកម្លាំងពិសេស និង ពង្រាយសព្វាវុធមានប្រព័ន្ធការពារដែនអាកាសនិងយន្តហោះចម្បាំងជាច្រើនគ្រឿងផងទៅកាន់កោះ Natuna Besar ឬកោះ Natuna នៅពេលខាងមុខដើម្បីបង្កើនសមត្ថភាពយោធាប្រឆាំងការគំរាមកំហែងសន្តិសុខខាងក្រៅ។
ផែនការនេះត្រូវបានគេទម្លាយចេញក្រោយកិច្ចប្រជុំរវាងមេបញ្ជាការកងទ័ពជើងអាកាសឥណ្ឌូនេស៊ី និងគណកម្មាធិការការពារជាតិនៃរដ្ឋសភាឥណ្ឌូនេស៊ីកាលពីថ្ងៃ ៥ខែមេសាកន្លងមក។
បើយោងតាមសារព័ត៌មានរុស្ស៊ី Sputnik កងទ័ពពិសេស៤អង្គភាពនឹងត្រូវពង្រាយទៅកាន់កោះ Natuna ហើយមានបំពាក់ជាមួយប្រព័ន្ធមីស៊ីលការពារដែនអាកាស (Oerlikon Skyshield) ។ ប្រព័ន្ធការពារដែនអាកាសខាងលើនេះ មានបំពាក់កាំភ្លើងយន្តទំហំ ៣៥ មីលីម៉ែត្រ ដែលអាចបាញ់គ្រាប់ចេញ១០០០គ្រាប់ក្នុងមួយនាទី និងអាវុធផ្សេងទៀតដែលអាចបាញ់ទម្លាក់យន្តហោះយ៉ាងមានប្រសិទ្ធិភាព។
យោងតាមប្រភពដដែល ឥណ្ឌូនេស៊ីក៏ស្វះស្វែងនាំចូលប្រព័ន្ធមីស៊ីលរយៈចម្ងាយមធ្យម បន្ថែម និងដំឡើងសម្ភារៈចាំបាច់ដើម្បីសម្រួលដល់ការពង្រាយយន្តហោះចម្បាំង៨គ្រឿង មាន Su-27, Su-30, ឬក៏យន្តហោះ F-16 ផងនៅមូលដ្ឋានយោធា Ranai។ គម្រោងដំឡើងសម្ភារៈនេះ នឹងត្រូវចំណាយអស់ ជាង៩០លានដុល្លារអាមេរិក ហើយវានឹងត្រូវបញ្ចប់ជាស្ថាពរនៅត្រឹមឆ្នាំ ២០១៩ ខាងមុខ។
កាលពីឆ្នាំមុន ឥណ្ឌូនេស៊ីបានបង្ហើនថា ខ្លួនកំពុងសិក្សាពីលទ្ធភាពនៃការសាងសង់មូលដ្ឋានយោធានៅលើកោះ Natuna នេះ ហើយការពង្រឹងសមត្ថភាពកងទ័ពនេះធ្វើឡើងស្របពេលដែលចិនកាន់តែកើនឡើងឥទ្ធិពល។ ហើយប្រទេសមួយចំនួនក្នុងតំបន់និងជាភាគីជម្លោះសមុទ្រចិនខាងត្បូងនោះ បង្ហាញការបារម្ភចំពោះការកសាងកម្លាំងយោធានៅតំបន់ជម្លោះសមុទ្រចិនខាងត្បូង។ ចំណែកសហរដ្ឋអាមេរិកនោះក៏ប្រឹងប្រែងជំរុញឲ្យសមាជិកអាស៊ានរួមគ្នាដើម្បីទប់ទល់ជាមួយចិនផងដែរក្នុងបញ្ហាជម្លោះសមុទ្រចិនខាងត្បូងនោះ។
តាមពិតទៅអ្នកណាក៏ដឹង ឥណ្ឌូនេស៊ីមិនមែនជាភាគីជម្លោះ និងមិនដែលទារយកផ្នែកណានៃតំបន់ជម្លោះសមុទ្រចិនខាងត្បូងឡើយ។ ភាគីជម្លោះមានតែ វៀតណាម ហ្វីលីពីន តៃវ៉ាន់ ម៉ាឡេស៊ី ប្រ៊ុយណេ និងចិនតែប៉ុណ្ណោះ។ ហើយគម្រោងឥណ្ឌូនេស៊ីថានឹងពង្រាយទ័ព ពង្រាយសព្វាវុធ និងសង់មូលដ្ឋានទ័ព នៅលើកោះស្ថិតនៅតំបន់សមុទ្រចិនខាងត្បូងនោះ គឺដោយសារតែក្រុងប៉េកាំងបានប្រើប្រាស់ផែនទី ៩ចំណុច «រាងអណ្តាត» ដែលគូសចូលទាំងប្រជុំកោះឥណ្ឌូនេស៊ី Natuna ខាងលើផង ដោយអះអាងថា ផែនទីគូសឡើងតាមការកាន់កាប់ជាក់ស្តែងតាមប្រវត្តិសាស្ត្រ។ តាំងពីដើមមក ចិនអាងលើការកាន់កាប់ពីប្រវត្តិសាស្ត្រ និងផែនទី៩ចំណុច«រាងអណ្តាត»ដែលគូសជាលក្ខណៈឯកតោភាគីតាំងពីឆ្នាំ ១៩៤៧មុនប្រកាសខ្លួនជាសាធារណរដ្ឋមកម្ល៉េះ។
© រក្សាសិទ្ធិដោយ thmeythmey.com