អន្តរជាតិ
នយោបាយអន្តរជាតិ
×![]()
មន្ត្រីជាន់ខ្ពស់ក្រុងវ៉ាស៊ីនតោនបានបញ្ជាក់ថា រដ្ឋមន្ត្រីការពារជាតិអាមេរិកលោក Ashton Carter នឹងទៅទស្សនកិច្ចតំបន់ចំនួនពីរក្នុងចំណោមតំបន់ចំនួនប្រាំដែលកងទ័ពអាមេរិកនឹងឈរជើងនៅក្នុងទឹកដីហ្វីលីពីន។ ហើយតំបន់មួយនោះវាស្ថិតនៅជាប់ជម្លោះសមុទ្រចិនខាងត្បូងផងដែរ។ 
ប្រមុខការពារជាតិអាមេរិកលោក Ashton Carter នឹងទៅទស្សនកិច្ចនៅហ្វីលីពីន ក្រោយពេលលោកចាកចេញពីប្រទេសឥណ្ឌា ដោយដំណើរទស្សនកិច្ចរបស់លោកចាប់ផ្តើមឡើងនៅថ្ងៃទី១០មេសានេះ។ពេលលោកទៅដល់ហ្វីលីពីន លោកនឹងទៅត្រួតពិនិត្យតំបន់សំខាន់ចំនួនពីរក្នុងចំណោមតំបន់៥ ដែលកងទ័ពអាមេរិកនឹងដាក់មូលដ្ឋានឈរជើង។ មូលដ្ឋានយោធាមួយដែលលោក Carter ទៅត្រួតពិនិត្យនោះមានចម្ងាយត្រឹមតែ១០០ម៉ាលប៉ុណ្ណោះពីប្រជុំកោះស្ព្រាត់លីដែលជាកោះដែលចិននិងភាគីជម្លោះផ្សេងទៀតនោះដណ្តើមគ្នាផង។
នេះជាទស្សនកិច្ចលើកដំបូងបំផុតរបស់រដ្ឋមន្ត្រីការពារជាតិអាមេរិក ទៅក្បែរតំបន់ជម្លោះសមុទ្រចិនខាងត្បូង ហើយទស្សនកិច្ចនេះក៏ធ្វើឡើងស្របពេលដែលស្ថានភាពនៅក្នុងតំបន់កាន់តែតានតឹងខ្លាំងដែរ។
មន្ត្រីជាន់ខ្ពស់អាមេរិកម្នាក់ដែលមិនបង្ហាញអត្តសញ្ញាណត្រូវបានស្រង់សម្តីដោយសារព័ត៌មាន CNN ថា ទស្សនកិច្ចរបស់ប្រមុខការពារជាតិអាមេរិកនេះធ្វើឡើងពង្រឹងទំនាក់ទំនងនិងកិច្ចសហប្រតិបត្តិការជាមួយបណ្តាប្រទេសធំៗក្នុងតំបន់ដូចជាឥណ្ឌានិងជាមួយសម្ព័ន្ធមិត្តហ្វីលីពីនជាដើម។
មន្ត្រីខាងលើបានលើកឡើងថា ដំណើរទស្សនកិច្ចរបស់លោក Carterទៅក្បែតំបន់ជម្លោះសមុទ្រចិនខាងត្បូង ជាសារមួយផ្ញើទៅកាន់តំបន់ទាំងមូល ដែលបង្ហាញឲ្យឃើញពីកិច្ចខិតខំប្រឹងប្រែងរបស់អាមេរិកក្នុងការរក្សាសន្តិភាពនិងសន្តិសុខនៅក្នុងតំបន់។ វាក៏បញ្ជាក់ថា អាមេរិកបន្តចាត់ទុកតំបន់សមុទ្រចិនខាងត្បូងជាតំបន់ស្នូលនៃប្រយោជន៍សន្តិសុខរបស់អាមេរិកនិងមានសារសំខាន់ខ្លាំងសម្រាប់អាមេរិកទៅថ្ងៃមុខដែរ។ លោកបន្តថា វាក៏បង្ហាញទៅកាន់ប្រជាជនប្រជាជនហ្វីលីពីនផងដែរ ថាអាមេរិកមិនបោះបង់ហ្វីលីពីនចោលឡើយទោះក្នុងកាលៈទេសៈណាក៏ដោយ។
តាមពិតទៅ អាមេរិកអាចបញ្ជូនទ័ពទៅឈរជើងនៅមូលដ្ឋានទ័ចំនួន៥ ក្នុងប្រទេសហ្វីលីពី ដោយអនុលោមតាមឧបសម្ព័ន្ធថ្មីដែលបន្ថែមលើ កិច្ចព្រមព្រៀងសហប្រតិបត្តិការការពារជាតិអាមេរិកនិងហ្វីលីពីន។ សហរដ្ឋអាមេរិកដាក់ដាក់ទ័ពបណ្តោះអាសន្ននៅមូលដ្ឋានទាំងនោះ ហើយមហាអំណាចនេះ នឹងចំណាយថវិកាដើម្បីអភិវឌ្ឍទីតាំងទាំងនោះផងដែរ។ មូលដ្ឋានទ័ពនៅហ្វីលីពីន នឹងជួយសម្រួលដល់ការប្រតិបត្តិការរបស់អាមេរិក ក្នុងតំបន់ទាំងមូលជាពិសេសតំបន់ជម្លោះសមុទ្រចិនខាងត្បូង ។ អាចថា វាក៏ជាការក្រើនរំលឹកដល់ក្រុងប៉េកាំង ថាអាមេរិកត្រលប់មកវិញ និងកសាងកម្លាំងយោធានៅក្នុងតំបន់ដើម្បីទប់ទល់ជាមួយចិនផងដែរ៕
© រក្សាសិទ្ធិដោយ thmeythmey.com
