លោក វ៉ាង យី ៖ កិច្ចប្រជុំប្រទេស៧ មិនគួរនិយាយពីបញ្ហាសមុទ្រចិនខាងត្បូងឡើយ

អន្តរជាតិ

លោក វ៉ាង យី ៖ កិច្ចប្រជុំប្រទេស៧ មិនគួរនិយាយពីបញ្ហាសមុទ្រចិនខាងត្បូងឡើយ

11, Apr 2016 , 8:59 pm

រូបភាព

ដោយ: ថ្មីៗ

បញ្ហាជម្លោះអធិបតេយ្យសមុទ្រចិនខាងត្បូងរវាងចិនជាមួយប្រទេសជិតខាង បានក្លាយជារឿងដែលសហគមន៍អន្តរជាតិ និងក្នុងតំបន់ ចាប់អារម្មណ៍។ ខណៈដែលបញ្ហាជម្លោះមានភាពតានតឹង រដ្ឋមន្ត្រីការបរទេសចិន លោក វ៉ាង យី បានទទូចឲ្យរដ្ឋមន្ត្រីនៃកិច្ចប្រជុំ G7 ចៀសវាងជជែកពីបញ្ហារបស់ចិននៅក្នុងកិច្ចប្រជុំឡើយ។

រដ្ឋមន្ត្រីការបរទេសចិន លោក វ៉ាង យី (Wang Yi) បានបង្ហាញពីការជឿជាក់ជាមួយនឹងរដ្ឋមន្ត្រីការបរទេសអង់ គ្លេសលោក Philip Hammond ថាអង់គ្លេស នឹងអនុវត្តគោលការណ៍ មិនលម្អៀង និងផលប្រយោជន៍ទៅលើបញ្ហាណាមួយ និង មិនប្រកាន់យកភាគីណាមួយឡើយ។ លោក វ៉ាង ក៏បានថ្លែងបញ្ជាក់ថាបញ្ហាសមុទ្រចិនខាងត្បូង ក៏មិនគួរលើកឡើងនៅក្នុងកិច្ចប្រជុំកំពូលG7ផងដែរ។

ការលើកឡើងនេះ ធ្វើឡើងនៅក្នុងជំនួប មុនកិច្ចប្រជុំរដ្ឋមន្ត្រីការបរទេសG7 ដែលមានការចូលរួមពីបណ្តាសមាជិករួមមាន អង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក។ កិច្ចប្រជុំG7 បានចាប់ផ្តើមនៅថ្ងៃទី១០ ខែមេសា នៅក្នុងក្រុង Hiroshima នៃប្រទេសជប៉ុន។

នាជំនួបនោះដែរ ប្រមុខការបរទេសចិន លោក វ៉ាង ក៏បានបញ្ជាក់ជាថ្មីលើបញ្ហានៅហុងកុងផងដែរ។ លោក ថា បញ្ហានៅក្នុងហុងកុង គឺជាកិច្ចការផ្ទៃក្នុងរបស់ចិន ហើយរដ្ឋាភិបាលចិន នឹងប្រកាន់ខ្ជាប់ គោលការណ៍ «ប្រទេសមួយ ប្រព័ន្ធពីរ » ហើយប្រជាជនហុងកុង គឺនៅតែជាអ្នកគ្រប់គ្រងហុងកុង ជាមួយកម្រិតស្វ័យភាពខ្ពស់ផងដែរ។

ជុំវិញទំនាក់ទំនងចិន-អង់គ្លេស លោក វ៉ាង ក៏បានស្នើឲ្យភាគីទាំងពីរបន្តនូវការផ្លាស់ជិតស្និទកម្រិតខ្ពស់ និងពង្រឹងការយោគយល់ និងការទុកចិត្ត ដើម្បីធានាពីការចាប់ផ្តើមមួយដ៏ល្អនៃ«សករាជមាស»នៃចំណងទ្វេភាគី។

សូមបញ្ជាក់ផងដែរថា ទំនាក់ទំនងចិន និងអង់គ្លេស បានកាន់តែជិតស្និទគ្នាចាប់តាំងពីដំណើរទស្សនកិច្ចផ្លូវរដ្ឋរបស់លោកប្រធានាធិបតីចិន លោក ស៊ី ជិនពីងក្នុងប្រទេសអង់គ្លេសកាលពីខែតុលាកន្លងទៅ៕