អន្តរជាតិ
ម៉ាឡេស៊ី៖សាលាជិត៣០០ត្រូវបិទដោយសាររលកកម្តៅខ្លាំង
× សាលារៀនចំនួន ២៥៩ កន្លែងនៅក្នុងរដ្ឋ Perlis និង Pahang នៅក្នុងប្រទេសម៉ាឡេស៊ីត្រូវបិទទ្វារនៅថ្ងៃចន្ទទី ១១ ខែមេសានេះ ដោយសារតែរលកកម្តៅខ្លាំង ដែលបង្កដោយបាតុភូត El Nino ។ ក្រសួងអប់រំម៉ាឡេស៊ីបានដាក់បទបញ្ជានេះដើម្បីការពារសុវត្ថិភាពនិងសុខភាពសិស្ស ព្រោះសីតុណ្ហភាពជាមធ្យមក្តៅជាង ៣៧ អង្សាសេឯណោះ។
ក្រសួងអប់រំម៉ាឡេស៊ីបានដាក់បទបញ្ជាឲ្យបិទសារចំនួន ២៥៩ នៅក្នុងរដ្ឋ Perlis និង រដ្ឋ Pahang បណ្តោះអាសន្នសិន ដោយសារតែបណ្តារដ្ឋទាំងនោះរងផលប៉ះពាល់ពីរលកកម្តៅខ្លាំងបង្កដោយបាតុភូត El Nino។ ការដាក់ចេញវិធានការនេះគឺដើម្បីការពារសុខភាពនិងសុវត្ថិភាពរបស់សិស្សានុសិស្ស ដែលត្រូវចេញពីផ្ទះទៅរៀនខណៈដែលសីតុណ្ហភាពខ្ពស់ជាង៣៧អង្សាសេ។
យោងតាមសារព័ត៌មាន Channel New Asia បទបញ្ជាខាងលើត្រូវបានដាក់បិទដើម្បីបិទសាលាអនុវិទ្យាល័យចំនួន ៦៨កន្លែង បឋមសិក្សាចំនួន ១៩១ កន្លែងផង។ ហើយសិស្សដែលត្រូវឈប់សម្រាកទាំងនោះមានចំនួន ៩៧៥៣៣នាក់ ដោយមាន ៩១៨៦២នាក់សិក្សានៅកម្រិតបឋមសិក្សានិងអនុវិទ្យាល័យ និង ៥៦៧១នាក់ជាសិស្សមតេយ្យផងដែរ។
វាជាវិធានការមួយចាំបាច់ព្រោះក្មេងៗតូចៗភាគច្រើនរងផលប៉ះពាល់ខ្លាំងពីចរន្តរលកកម្តៅខ្លាំងនេះណាស់។ ហើយការអនុញ្ញាតឲ្យពួកគេនៅផ្ទះមិនចាំបាច់មករៀន អាចជួយបញ្ចៀសគ្រោះថ្នាក់បានច្រើនដែរ។
យ៉ាងណាមិញ យោងតាមបទបញ្ជានោះ សកម្មភាពរដ្ឋបាលនានារបស់សាលានៅបន្តជាធម្មតា លើកលែងតែការបង្រៀន និងការសិក្សារបស់សិស្សប៉ុណ្ណោះ។ ដើម្បីធានាពីប្រសិទ្ធភាពនៃការអនុវត្តបទបញ្ជារបស់ក្រសួងអប់រំ មន្ត្រីក្រសួងសម្រេចតាមដានសកម្មភាពនិងឃ្លាំមើលរបស់សាលាផងដែរ។ ហើយស្របពេលជាមួយគ្នានោះ ក្រសួងការនឹងបន្តចេញសេចក្តីជូនដំណឹងនានាពាក់ព័ន្ធការបិទសាលានិងបញ្ហារលកកម្តៅនេះ នៅពេលខាងមុខ បើសិនមានអ្វីប្រែប្រួល។
© រក្សាសិទ្ធិដោយ thmeythmey.com