អន្តរជាតិ
អូបាម៉ានៅតែមានប្រជាប្រិយភាពខ្ពស់ជាងបេក្ខជនប្រធានាធិបតី
× យោងតាមរបាយការណ៍ស្ទង់មតិ លោក បារ៉ាក់ អូបាម៉ា នៅតែមានប្រជាប្រិយភាពខ្ពស់ ពោលគឺខ្ពស់ជាងបណ្តាបេក្ខជនប្រធានាធិបតីអាមេរិកទាំងអស់។ ការកើនឡើងនៃប្រជាប្រិយភាពរបស់លោក នឹងធ្វើលោកកាន់តែមានទឹកមាត់ប្រៃក្នុងការកំណត់លទ្ធផលបោះឆ្នោតប្រធានាធិបតីអាមេរិកខែវិច្ឆិកាខាងមុខនេះ។ គណបក្សប្រជាធិបតេយ្យអាចនឹងមានប្រៀបខ្លាំង។
សូមស្ដាប់ព័ត៌មានលម្អិត៖
ប្រធានាធិបតីអាមេរិកលោក បារ៉ាក់ អូបាម៉ា កើនឡើងប្រជាប្រិយភាពក្នុងរយៈពេលចុងក្រោយនេះ ថ្វីបើលោកជិតផុតអាណត្តិក៏ដោយក្តី។ យោងតាមរបាយការណ៍ស្ទង់មតិដែលចុះផ្សាយដោយសារព័ត៌មាន Time អង់គ្លេស លោក មានប្រជាប្រិយភាពខ្ពស់ជាងបណ្តាបេក្ខជនប្រធានាធិបតីទាំងអស់។
អ្វីដែលសំខាន់ការកើនឡើងនៃប្រជាប្រិយភាពលោក បើសិនវានឹងបន្តកើនឡើងរហូតដល់ថ្ងៃបោះឆ្នោតប្រធានាធិបតីនាខែវិច្ឆិកានោះ លោកនឹងកាន់តែមានឥទ្ធិពលខ្លាំងក្នុងការកំណត់នូវលទ្ធផលបោះឆ្នោតផងដែរ។ វាមានន័យថា បើសិនជាលោកនៅតែត្រូវគេគាំទ្រច្រើន លោកនឹងមានឱកាសបញ្ចុះបញ្ចូលឲ្យមានការគាំទ្របេក្ខជនមកពីបក្សប្រជាធិបតេយ្យជាក់ជាមិនខាន។
យោងតាមរបាយការណ៍ស្ទង់មតិ ដែលរៀបចំ ដោយ Associated Press-GfK poll ប្រធានាធិបតី អូបាម៉ា ត្រូវបានប្រជាជនចាត់ទុកជាមេដឹកនាំដែលគួរឲ្យទុកចិត្ត ហើយការដឹកនាំរបស់លោកបានធ្វើឲ្យប្រជាជនពេញចិត្តពេញថ្លើមផងដែរ។ ការស្ទង់មតិនេះធ្វើឡើងក្នុងរយៈពេល ៥ថ្ងៃពី ថ្ងៃ ៣១ មីនា ដល់ថ្ងៃ ៤មេសា ហើយមនុស្ស ១០៧៦ នាក់ត្រូវបានគេជ្រើសរើសសម្រាប់ការស្ទង់មតិនេះ។
អ្នកដែលត្រូវបានសាកសួរប្រហែល ពាក់កណ្តាលបានបង្ហាញការពេញចិត្តចំពោះអ្វីដែលលោក អូបាម៉ាបានធ្វើកន្លងមកក្នុងនាមជាប្រធានាធិបតី។ អត្រានេះ មានការកើនឡើង ហើយពួកគេពេញចិត្តចំពោះនយោបាយការបរទេស ការដោះស្រាយបញ្ហាសេដ្ឋកិច្ចនិងអន្តោប្រវេសន៍ជាដើម។ អ្នកចួលរួម ៥៣ភាគរយបានបង្ហាញថាខ្លួនពេញចិត្តលោក អូបាម៉ា ស្របពេលដែលបេក្ខជនប្រធានាធិបតីផ្សេងទៀតដូចជាលោក ប៊ែនី សេនដឺ បានត្រឹម ៤៨ភាគរយ លោកស្រី ហ៊ីឡារី គ្លីនតុន បានត្រឹម៤០ ហើយលោក ដូណាល់ត្រាំ បានត្រឹម២៦ភាគរយប៉ុណ្ណោះ។
តែទាក់ទិនបញ្ហាសេដ្ឋកិច្ច មនុស្សភាគតិចប៉ុណ្ណោះដែលមើលឃើញក្នុងផ្លូវវិជ្ជមាននិងមានសុទិដ្ឋិនិយមចំពោះស្ថានភាពសេដ្ឋកិច្ចនិងហិរញ្ញវត្ថុរបស់ខ្លួនបច្ចុប្បន្ន ហើយ៥៤ភាគរយនៃប្រជាជនដែលផ្តល់ការសាកសួរនោះនៅតែយល់ថាខ្លួននៅក្នុងស្ថានភាពក្រីក្រនៅឡើយ ស្ថិតក្រោមការដឹកនាំរបស់លោក អូបាម៉ា ៕
Tag:
បារ៉ាក់ អូបាម៉ា
ហ៊ីឡារី គ្លីនតុន
© រក្សាសិទ្ធិដោយ thmeythmey.com