កីឡាជាតិ
ជាតិ
កីឡាករអុកចត្រង្គទាំង៨ ដាក់ក្តីសង្ឃឹមខ្ពស់រៀងខ្លួនៗ សម្រាប់ដំណែងជើងឯក
× ការប្រកួតអុកចត្រង្គ ដើម្បីដណ្តើមជើងឯកប្រចាំព្រឹត្តការណ៍អង្គរសង្ក្រាន្តឆ្នាំ២០១៦ អមជាមួយនឹងប្រាក់រង្វាន់ ១២លានរៀល ដែលប្រព្រឹត្តទៅនៅមុខប្រាសាទអង្គរវត្ត លើទឹកដីនៃខេត្តសៀមរាប ក្នុងឱកាសបុណ្យចូលឆ្នាំថ្មី នឹងចាប់ផ្តើមប្រកួតវគ្គផ្តាច់ព្រ័ត្រ នាថ្ងៃទី១៥ ដល់ទី១៦ ខែមេសា ខណៈកីឡាករទាំង ៨ដែលចូលរួមប្រកួតសុទ្ធតែមានសង្ឃឹមខ្ពស់រៀងខ្លួនៗ ជាមួយនឹងការប្តេជា្ញថា នឹងដណ្តើមតំណែងជើងឯកឲ្យបាន។
កីឡាករចត្រង្គអង្គរសង្ក្រាន្តទាំង៨នាក់ដែលនឹងចូលរួមប្រកួតក្នុងដំណាក់កាលចុងក្រោយ បានដាក់ក្តីសង្ឃឹមរៀងខ្លួនៗ សម្រាប់ការប្រកួតដណ្តើមជើងឯកប្រចាំព្រឹត្តិការណ៍អង្គរសង្ក្រាន្ត ២០១៦ នាឱកាសបុណ្យចូលឆ្នាំថ្មីប្រពៃណីខ្មែរ ក្នុងខេត្តសៀមរាប។
ជាមួយគ្នានេះកីឡាករដែលទើបនឹងផ្តួលស្តេចអុក ឈាវ បូរ៉ា នៅក្នុងវគ្គ១៦នាក់ចុងក្រោយ ហេង សៅឌី ទោះបីជាយ៉ាងនេះកី្តរូបគេមិនហានដាក់ក្តីសង្ឃឹមខ្ពស់នោះទេគឺត្រឹមតែ៥០% ប៉ុណ្ណោះ ប៉ុន្តែរូបគេបានតាំងចិត្តខ្ពស់សម្រាប់ការប្រកួត និងបានប្តេជ្ញាថានឹងប្រឹងប្រែងលេងឲ្យអស់ពីសមត្ថភាពក្នុងការដណ្តើមជើងឯក។ ហើយរូបគេសង្ឃឹមថានឹងអាចឆ្លងផុតវគ្គ១/៨ នាជំនួបជាមួយកីឡាករ សេង សុធា ទោះបីជាមិនធ្លាប់បានប្រកួតជាមួយកីឡាកររួបនេះក៏ដោយ នេះជាលើកទី១សម្រាប់ការចូលរួមពីរលើក ដែលរូបគេអាចឡើងមកដល់វគ្គ១/៨នេះ ព្រោះកាលពីលើកមុនរូបគេធ្លាក់តាំងពីជុំទី១។
យ៉ាងណាមិញ កីឡាករ សេង សុធា ដែលជាដៃគូប្រកួតរបស់ ហេង សៅឌី ក្នុងវគ្គ១/៨ ក៏បានដាក់ក្តីសង្ឃឹមផងដែរថា រូបគេនឹងអាចឆ្លងផុតវគ្គនេះ ទោះបីរូបគេត្រូវជួបជាមួយកីឡករដែលបានផ្តួលស្តេចអុក ឈាវ បូរ៉ា ក៏ដោយ។ មិនត្រឹមតែប៉ុណ្ណោះរូបគេបានដាក់ក្តីសង្ឃឹម ៥០ភាគរយទៀតផងសម្រាប់តំណែងជាជើងឯក ហើយនេះក៏លើកទីមួយផងដែរសម្រាប់ការចូលរួមពីរលើករបស់រូបគេ ដែលអាចឡើងមកដល់វគ្គ១/៨ ព្រោះកាលពីមុនរូបគេបានធ្លាក់តាំងពីជុំទី២មកម្ល៉េះ។
ទោះបីជាការប្រកួតមិនទៀងមានឈ្នះមានចាញ់យ៉ាងណាក៏ដោយ កីឡាករ រៀម វាសនា ដែលនឹងត្រូវធ្វើការប្រកួតជាមួយកីឡាករ ហូយ សុខណា នៅវគ្គ១/៨ បានដាក់កីសង្ឃឹមយ៉ាងមុតមាំថា រូបគេនឹងឡើងទៅកាន់វគ្គ១/៤ ទោះបីដៃគូរបស់គេជាកីឡាករជើងខ្លាំងក៏ដោយ មិនត្រឹមតែប៉ុណ្ណោះរូបគេសង្ឃឹមរហូតដល់ ៧០ភាគរយទៅ៨០ភាគរយសម្រាប់ដំណែងជាជើងឯក ខណៈគូប្រកួត ហូយ សុខណា មិនហ៊ានសង្ឃឹមខ្ពស់ត្រឹមតែ៥០ភាគរយ ព្រោះលោកថា ការប្រកួតវាមិនទៀងអ្នកខ្លាំងអាចចាញ់ក្នុងដៃអ្នកខ្សោយក៏មានដែរ។
ចំណែកកីឡាករ នូ ច័ន្ទផានិត និងកីឡាករ សៅ ប៉ិចសុភា មិនហ៊ានសង្ឃឹមខ្ពស់នោះទេត្រឹម៥០ភាគរយប៉ុណ្ណោះសម្រាប់ការប្រកួតរបស់ពួកគេ ព្រោះ ប៉ិចសុភា យល់ថាសមត្ថភាពរបស់នៅមានកម្រិតទាប ទោះបីរូបគេបានឡើងមកដល់វគ្គ១/៨នេះក៏ដោយ។ កីឡាករទាំងពីរនឹងត្រូវជួបប្រកួតគ្នាក្នុងវគ្គ១/៨ នាថ្ងៃទី១៥ ខែមេសា ក្នុងខេត្តសៀមរាប នាឱកាលបុណ្យចូលឆ្នាំថ្មីប្រពៃណីខ្មែរ។ គួរបញ្ជាក់ថា កីលឡាករទាំងពីរនេះមិនធ្លាប់ជួបប្រកួតជាមួយគ្នានោះទេ ហើយនេះជាលើកទីមួយហើយសម្រាប់កីឡាករទាំងពីរ ដែលអាចឡើងមកដល់វគ្គ១/៨នេះ សម្រាប់ការប្រកួតកាលពីលើកមុន សុភា ធ្លាក់វគ្គ១/៣២ ខណៈ ផានិត ធ្លាក់តាំងពីរជុំដំបូង។
ដោយឡែកកីឡាករ រស់ រិទ្ធីយ៉ា ហាក់ដូចជាមានទំនុកចិត្តលើខ្លួនឯង សម្រាប់តំណែងជាម្ចាស់ឯកឆ្នាំនេះ ដោយលោកបានដាក់ក្តីសង្ឃឹមរហូតដល់ ៧០ភាគរយទៅ៨០ភាគរយ ជាមួយនឹងការតាំងចិត្តខ្ពស់ថា នឹងដណ្តើមយកលេខ១ ឲ្យបានសម្រាប់ឆ្នាំថ្មីនេះ ខណៈកីឡាករ ម៉េង សេរីសម្បត្តិ ដែលជាដៃគូប្រកួតរបស់ខ្លួន មិនហ៊ានសង្ឃឹមខ្ពស់នោះទេត្រឹមតែ៦០ភាគរយ ព្រោះដៃគូដែលរូបគេត្រូវប្រកួតនៅវគ្គ១/៨នេះមានសមត្ថភាព ប៉ុន្តែទោះជាយ៉ាងក៏ដោយរូបគេបានប្តេជ្ញាថា នឹងប្រកួតឲ្យអស់ពីសមត្ថភាព។
គួរបញ្ជាក់ថា ការប្រកួតអុកចត្រង្គអង្គរសង្ក្រាន្ត២០១៦ បានធ្វើការប្រកួតការប្រកួតជម្រុះរយៈ៤ថ្ងៃ នៅទីស្នាក់ការ NOCC ចាប់ពីថ្ងៃទី៥ ដល់ថ្ងៃទី៨ ខែមេសា ដោយបានស្វែងរកឃើញកីឡាករជើងខ្លាំងចំនួន៨នាក់ សម្រាប់ឡើងទៅប្រកួតនៅដំណាក់កាលផ្តាច់ព្រ័ត្រ នៅមុខប្រាសាទអង្គរវត្ត ខេត្តសៀមរាប ប៉ុន្តែឆ្នាំនេះមិនមានវត្តមានស្តេចអុកចត្រង្គពីររដូវកាល ឈាវ បូរ៉ា នោះទេបន្ទាប់ពីរូបគេបានចាញ់កីឡាករ ហេង សៅឌី នៅវគ្គ១/១៦ កាលពីថ្ងៃទី៨ ខែមេសា នៅទីស្នាក់ការ NOCC។ កីឡាករទាំង៨ចាប់ផ្តើមប្រកួតនៅថ្ងៃទី១៥ ត្រូវនឹងថ្ងៃទី៣នៃពិធីបុណ្យចូលឆ្នាំ និងប្រកួតបញ្ចប់នៅថ្ងៃទី១៦ ខែមេសា។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា «ការប្រកួតអុកចត្រង្គអង្គរសង្ក្រាន្ត២០១៦» ម្ចាស់ជើងឯកទទួលបាន ១២លានរៀល ខណៈជើងឯករង ៨លានរៀល និងចំណាត់ថ្នាក់លេខ៣ទទួលបាន ៤លានរៀល៕
Tag:
វ៉ាត់ ចំរើន
អុកចត្រង្គ
អង្គរសង្ក្រាន្ត
© រក្សាសិទ្ធិដោយ thmeythmey.com