ជាតិ
ពីនេះ ពីនោះ
ឆ្នាំថ្មី កុំចាក់បៀតងកុំផ្សងអាប៉ោង!
× កំណាព្យបទ កាកគតិ
ដល់ហើយឆ្នាំថ្មី មកមិត្តប្រុសស្រី លេងអីសប្បាយ
ចង់ដើរជិតៗ ឬគិតទៅឆ្ងាយ បើខានតិចស្តាយ
មួយឆ្នាំមានម្តង។
ទោះដល់ឆ្ងាយជិត សូមកល្យាណមិត្ត គិតឃើញខ្លះផង
ល្បែងប្រជាប្រិយ កុំចោលប្អូនបង កុំចាក់បៀតង
កុំផ្សងអាប៉ោង។
ខ្លាឃ្លោកក៏កុំ អុងឌូក៏សុំ ក្រែងអស់ស្រូវស្បោង
ទាំងទឹកក្រហម គួរតមកុំតោង ចាយពេលរាប់ម៉ោង
ឈ្នះមេយើងសង។
ចោលឈូងអង្គុញ បើលេងទៅធុញ ប្តូរទាញព្រ័តម្តង
លេងលាក់កន្សែង ក្រែងជូបគូផ្សង ឬច្រៀងផ្តោះផ្តង
ចម្រៀងប្របកៃ។
ដណ្តើមស្លឹកឈើ លាក់មាន់លមើ សប្បាយពេកក្រៃ
ស្តេចចង់ក៏បាន តាមតែអ្នកច្នៃ ល្បែងខ្លាំងជើងដៃ
ឡើងសរសរខ្លាញ់។
ខ្ញុំលើកខ្លីៗ រំលឹកប្រុសស្រី ឲ្យលៃគិតកាញ់
ល្បែងប្រជាប្រិយ ខ្មែរធ្លាប់ស្រឡាញ់ ពេលនេះចុះចាញ់
ក្រុមល្បែងស៊ីសង៕
© រក្សាសិទ្ធិដោយ thmeythmey.com